Joshua 6

Umbundu Bible (Embimbiliya - Bíblia Sagrada em Umbundu)

← Chapter 5 Jump to: Chapter 7 →

1Yeriko puãi ya liyikila sito va Isareli posamua lovokati. Lomue wa tunda, lomue wa iñila.

2Yehova wa popia la Yehosua, hati, Tala, nda eca Yeriko peka liove, losoma, yaco lalume vaco va pama vakuotõi.

3Ene vosi walume vakuavita, ñuali imbo. Ñualiko lumosi. Eci oco vu linga oloneke epandu.

4Ovitunda epanduvali vi ambate anguena epanduvali olombinga viovitupi, kuenje vi pite kovaso yocikasa. Keteke liepanduvali ñuali imbo olonjanja epanduvali, kuenda ovitunda vi sike anguena.

5Eci va sika ombinga yocitupi, kuenda eci vu yeva ocileñi cenguena, oco omanu vosi va kaluke londaka yalua. Ocimbaka cimbo ci leñuha, kuenje omunu omunu, puosi a suñama haipo a lamanela.

6Oco Yehosua, omõla a Nune, wa kovonga ovitunda, wa popia lavo hati, Yeluli ocikasa covisila. Ovitunda epanduvali viambate anguena epanduvali olombinga viovitupi, kuenje vi pite kovaso yocikasa ca Yehova.

7Wa popia lomanu hati, Kuendi, ñuali imbo, kuenda alume va maleha va pite kovaso yocikasa ca Yehova.

8Eci Yehosua a popia lomanu, oco ovitunda epanduvali vina viambata anguena epanduvali olombinga viovitupi kovaso a Yehova, via fetika oku enda, yu via sika anguena. Ocikasa covisila via Yehova ca va kuama.

9Alume va maleha va pita kovaso yovitunda via sika anguena. Owiñi wosi wa kuama vonyima yocikasa, osimbu ovitunda via kala loku enda loku sika anguena.

10Yehosua wa handelekele omanu, hati, Ko ka kaluki, ondaka yene ka yi ka yevale, vomela wene ka mu ka tunde yimue ondaka toke eteke ndu tumili siti, Kaluki. Oco vu kaluka noke.

11Oco ocikasa ca Yehova ca ñuala imbo, ca ñualako lumosi. Noke va tiukila kocilombo kuenje va lala vocilombo.

12Yehosua wa pasuka omele ociteketeke, kuenje ovitunda via yelula ocikasa ca Yehova.

13Ovitunda epanduvali vina viambata anguena epanduvali olombinga viovitupi, via pita kovaso yocikasa ca Yehova, via enda loku sika anguena. Alume va maleha va pita kovaso yavo, kuenje owiñi wosi wa kuama vonyima yocikasa ca Yehova, osimbu ovitunda via kala loku enda loku sika anguena.

14Keteke liavali, va ñuala imbo lumosi, kuenje va tiukila kocilombo. Haico va linga oloneke epandu.

15Keteke liepanduvali, va pasuka omele kongula. Va ñuala imbo ndeci va lingainga ale, va ñualako olonjanja epanduvali. Te lika okuti keteke liaco va ñuala imbo olonjanja epanduvali.

16Oco konjanja yepanduvali, eci ovitunda via sika anguena, Yehosua wa popia lomanu, hati, Kaluki, momo Yehova wa wihi imbo.

17Imbo liaco la cosi ci kasimo, ca siñaliwa ku Yehova. Te lika Rahava ocipuepue, eye o kala lomuenyo la vosi va kasi laye vonjo, momo wa vundisile olomunga tua tumile.

18Puãi ene liuviki kocina cosi ca siñaliwa, sanga eci vu kuata kocina caco ca siñaliwa, vu kokela esiñalo ocilombo ca Isareli ho ci tatamisa.

19Puãi opalata yosi lulu, lovikuata viosipi lutale, vi kola ku Yehova, vi kapiwe vovokuasi a Yehova.

20Oco omanu va kaluka. Olombeta via totãla. Eci omanu va yeva ocileñi columbeta, oco omanu va kaluka londaka ya lua, kuenje ocimbaka ca leñuha lukutu! Oco omanu va iñila vimbo, omunu omunu puosi a suñama haipo a lamanela, kuenje va kuata imbo.

21Cosi ca kala vimbo, va ci kundula pe lomela wosipata, ci kale ulume lukãi, ci kale omõla lekongo, longombe lomeme locimbulu.

22Yehosua wa popia lalume vavali, vana va ka kulĩhĩsile ofeka, hati, Iñili vonjo yocipuepue, upimo ukãi waco lava vosi va kasi laye, ndeci wa lisilili laye.

23Amalehe vaco, olondavululi, va iñila, yu vopamo Rahava la isiaye, la inaye, la vamanjaye, la vosi vangandiaye. Vopamo vosi vakuepata liaye, yu va va tumalisa posamua yocilombo ca Isareli.

24Imbo va li yoka londalu leci cosi ca kalamo. Te lika opalata lulu, lovikuata viosipi levi viutale, va vi kapa vovokuasi onjo ya Yehova.

25Puãi Rahava, ocipuepue, locikumba ca isiaye, lava vosi va kala laye, Yehosua wa popela omuenyo wavo. Eye wa tunga pokati ka va Isareli, toke etaili lilo, momo wa vundisile olomunga vina Yehosua a tumile oku kũlĩhisa Yeriko.

26Yehosua wa va kundika ocikundi yu wa lisinga hati, Wosi o katuka ha tumbulula imbo eli lia Yeriko a siñaliwe kovaso a Yehova. Poku seveta ociseveto calio, o peselapo omuenyo womolaye uveli. Poku sembika olombundi vialio, o peselapo omuenyo wa kuasula kuaye.

27Oco Yehova wa kala kumue la Yehosua, kuenje oluhimo luaye lua yevala vofeka yosi.

← Chapter 5 Jump to: Chapter 7 →

Recommended Reading

Commentary Joshua Commentaries → Devotional Joshua Devotional Guide → Get This Bible Umbundu Bible (Embimbiliya - Bíblia Sagrada em Umbundu) Study Bible →