Luke 22

Umbundu Bible (Embimbiliya - Bíblia Sagrada em Umbundu)

← Chapter 21 Jump to: Chapter 23 →

1Oco ofesta yombolo ka yi kuete etumbisa haiyo ya tukuiwa yo Pascoa, ya kala ocipepi.

2Ovitunda vinene la vakuavisonehua va sanda evelo lioku u wipa, momo va kala lusumba womanu.

3Oco Satana wa wila Yuda, wa tukuiwa Isikariote, haeye umue pekui la vavali.

4Oco, oku tunda, wa ka vanguile lovitunda vinene la vakesongo vaco ondaka yoku pakuila Yesu kokuavo.

5Kuenje ovo va sanjuka, yu va likuminya oku u wiha olombongo.

6Oco eye wa tava, yu wa sanda evelo lioku u pakuila kokuavo eci owiñi ka wuko.

7Eteke liofesta yombolo ka yi kuete etumbisa, hailio eteke va ipa okameme ko Pascoa, lieya.

8Oco Yesu wa tuma Petulu la Yoano, hati, Kuendi. Ka tu yaleli o Pascoa oco tu yi lie.

9Yu vo pula, vati, O yongola okuti tu yi yalela pi?

10Eye wa va kumbulula hati, Eci wiñili vimbo, vu ñualẽhẽla lomunu wa ambata esanga liovava. U kuami toke vonjo omo a iñila.

11Noke, popi la muẽleonjo yaco hoti, Ulongisi wa tuma oku ku pula, hati, Onjo yakombe omo ndi lila o Pascoa kumue lolondonge viange yi kasi pi?

12Kuenje eye u lekisi ohondo yinene kosapalalo, lovikuata viaco via angiliyiwa ale. Omo vu tu yalela.

13Kuenje va enda, va ci sanga ndeci a popia lavo, kuenje va yala o Pascoa.

14Oco, eci ekumbi liaco lia pitila, eye wa tumala komesa, lovapostolo va kala laye kumue.

15Yu wa popia lavo hati, Oku livela nda livela oku lila o Pascoa eyi kumue lene osimbu sia talele ohali.

16Momo, mopia lene siti, Si yi li vali, te yi tẽlisiwa vusoma wa Suku.

17Oco wa tambula okopo yimue, kuenje, eci a yi panduila, wa linga hati, Yi tambuli, yi liaveli pokati kene.

18Momo ndu sapuili siti, Tunde opo si nyui vali kepako liuyuva, toke usoma wa Suku wiya.

19Yu wa nyañula ombolo, kuenje eci a yi panduila, wa yi timbula, yu wa yeca kokuavo hati, Eyi etimba liange lio wecelui. Ci lingili onjivaluiso yange.

20Eci va mala oku lia oco wa nyañula okopo hati, Okopo eyi ocisila cokaliye ca lisililua vosonde yange yo peselelui.

21Puãi, tali, eka liu o makula li kasi kumue lame komesa.

22Momo Mõlomanu endela vonjila yo sokiyilua, puãi u u pakula, ngongo yaye.

23Kuenje va fetika oku lipula pokati vati!, Elie pokati ketu o laika oku linga ocina eci?

24Va fetika oku lihoyela pokati kavo, vati, U o linga unene pokati ketu helie?

25Kuenje eye wa popia lavo hati, Olosoma via vakualofeka vi viala omanu vavo, kuenje olombiali viavo via tukuiwa olonekuli.

26Puãi ene, ko ka lingi ndoco. Pokati kene ukulu a linge ndumalehe, lusongui a linge ndukuakuvumba.

27Wa velapo elie, yu o tumala komesa ale, ele ukuakuvumba? Siti, Yu o tumala komesa. Ame puãi ñasi pokati kene ndukuakuvumba.

28Ene, ene wa pandakaisi lame eci nda nyikaiwa.

29Oco, ndeci Tate a nukuila usoma haico ndu tukuili usoma okuti

30vu lila loku nyuila komesa yange vusoma wange, kuenje vu tumala kovialo oku tetuluila apata ekui la avali a Isareli.

31Ñala wa popia hati, A Simono, a Simono, limbuka okuti Satana wa panga oku vu kuata vosi okuti o vu sisa ndotiliku,

32ame puãi nda ku likutilila okuti ekolelo liove ka li tokoka. Kuenda vali, ove, eci o tiuka vali kokuange, kolisa vakuẽle.

33Petulu wa popia laye hati, A Ñala, ngenda muẽle love ndaño vokayike, ndaño kokufa.

34Yesu wa linga hati, A Petulu, hu sapuila siti, Etaili ekondombolo ka li lili te o liñala lutatu, huti, Siu wi.

35Kuenje wa va pula, hati, Eci ndo tumili okuti ka wa ambateli ocipete, pamue opatolonya, pamue olohaku, wa sukili cimue? Va kumbulula vati, Lacimue.

36Yu wa popia lavo hati, Puãi kaliye, u o kuete ocipete a ci ambate, lopatolonya haico. Lu ka kuete osipata a landise ocikutu caye oco a lande yimue.

37Momo ndu sapuili siti, Ocisonehua cina ca popia citi, Wa tendiwila lava va lueya, ci lingiwila vokuange. Momo cosi ca sonehiwila ame ci lingiwa.

38Kuenje va linga vati, A Ñala, olosipata vivali vievi. Kuenje eye wa popia lavo hati, Ci tẽla.

39Kuenje Yesu wa tunda, yu wa enda komunda yo Oliveira ndeci a tuwa. Olondonge viaye vio kuama.

40Eci a pitilako, wa popia lavo hati, Likutilili okuti ka vu yonjiwa.

41Eye wa liamuha lavo ca soka ndoku imba ewe, yu wa kekama kolongolo kuenda wa likutilila,

42hati, A Tate, nda o ci panga, njupe okopo eyi, haimo lumue, ocipango cange ka ci ka lingiwe, te cove ci lingiwa.

43Kuo tukulukila ungelo wokilu oku u kolisa.

44Asangu a witaila, kuenje wa likutilila lolupili. Esalamiho liaye lia lokila posi ndalola osonde.

45Kuenje eci a votoka kokulikutilila kuaye, oco weya kolondonge viaye, yu wa va sanga va pekela otulo omo va sumua ca lua.

46Wa popia lavo hati, Wa pekeleli nye? Pasuki, likutilili okuti ka vu yonjiwa.

47Eci a kala loku popia kueya owiñi. U wa tukuiwa Yuda, haeye umue pekui la vavali, eye wa va pitila kovaso. Wa amela ocipepi la Yesu ho sipula.

48Puãi Yesu wa Popia laye hati, A Yuda, o pakula Mõlomanu lesipulo?

49Kuenje eci ava va kala kumue laye va limbuka eci ci laika oku lingiwa, oco va popia vati, A Ñala, tu veta losipata?

50Kuenje umue pokati kavo wa veta ukuenje wocitunda cinene, kuenje wa sonja etui liaye liokondio.

51Puãi Yesu wa imba ondaka, hati, Liwekipo. Kuenje oku lamba etui liaye wo sakula.

52Yesu wa pula ovitunda vinene la vakesongo vonembele kuenda akulu vo katukila, hati, Wa tundi hẽ lolosipata lolohunya ndava va yongola oku kuata ocingumba?

53Eci nda kala kala lene vonembele eteke keteke ka wa ndambeli. Puãi ola yilo ola yene muẽle, haiyo yunene wowelema.

54Kuenje vo kuata kuenda va enda laye, vo wiñisa vonjo yocitunda cinene. Puãi Petulu wo kuama ocituanyima.

55Eci va siakala ondalu vokati kocitali kuenda va tumala kumuamue, oco Petulu wa tumala pokati kavo.

56Kuenje ukãi umue upika, oku u mola eci a tumala vocinyi, oku u vanja suĩ wa popia hati, Ulume u layevo wa kala laye.

57Puãi Petulu wa likala hati, Okãi, siu wi.

58Okasimbu kaño, ukuavo, oku u mola, wa popia hati, Ove lovevo vu wavo. Puãi Petulu hati, Amunu, hameko.

59Puãi eci pa pita ola, umue ukuavo wa toñomala hati, Ocili, ulume u wa kalavo laye, momo u Galilea.

60Puãi Petulu hati, Amunu, eci o popia si ci. Osimbu a kala loku popia, haico ekondombolo lia lila.

61Kuenje Ñala wa pukuka oku vanja Petulu. Oco Petulu wa ivaluka ondaka ya Ñala ndeci a popia laye hati, Etaili o liñala lutatu osimbu ekondombolo ka lia lilile.

62Oco wa tunda kuenje wa lila ca lua.

63Kuenje alume va kuete Yesu vo fuanguila loku u veta.

64Kuenje oku u sitika vovaso, vo pula vati, Pilula. U wa ku veta helie?

65Kuenje va popia ovina via lua vikuavo vioku wimbula.

66Eci kua ca omele, akulu vomanu, okuti ovitunda vinene kuenda vakuavisonehua, va liongolola. Vo tuala vonjango yavo, kuenje vo pula vati,

67Nda ove u Mesiya, tu ci sapuile. Puãi eye wa va kumbulula hati, Ndaño ndu ci sapuili haimo ko tavi.

68Kuenda vali, ndaño ndu puli cimue, haimo ko ñumbululi.

69Puãi, tunde opo, Mõlomanu o tumala kondio yunene wa Suku.

70Oco vosi yavo vo pula vati, Oco hẽ, ca lomboloka okuti vumõla a Suku? Eye wa va kumbulula hati, Ene wa ci popi okuti ame.

71Oco va linga vati, Tu yonguila nye vali olombangi? Etu muẽle tua ci yeva vomẽla waye.

← Chapter 21 Jump to: Chapter 23 →