Micah 1

Umbundu Bible (Embimbiliya - Bíblia Sagrada em Umbundu)

Jump to: Chapter 2 →

1Ondaka ya Yehova yeya ku Mika, u Morasiti, kovava a Yotama, la Ahasi kuenda Hesekiya, olosoma via Yuda, eyi a muĩla Samária kuenda Yerusalãi.

2Amanu vosi, yevi! Alofeka viosi, la vosi va kasimo, yeveleli! Ñala Yehova, una o kasi vonembele yaye yi kola a linge ombangi yoku vu pisa.

3Momo tala, Yehova o tunda vocitumãlo caye, o loka, enda loku liata kolonumbuko viongongo.

4Kuenje olomunda vi yengulukila vemẽhi liaye, vi pita vakungu ndesela konẽle yondalu, pamue ndovava a pesekela keñueñue.

5Eci cosi ciyilila okulueya kua Yakoba lekandu liepata lia Isareli. Okulueya kuaco kua Yakoba kue? Ha Samãriako? Lekandu liaco liepata lia Yuda lie? Ha Yerusalãiko?

6Oco ndingisa Samária elunda vofeka pamue ocumbo omo va tuika ayuva. Ovawe aye ndi a tiñuluĩla vekungu, ndi situlula oviseveto viaye.

7Oviñumañuma viaye viosi vi sasuĩwa, olombanjaile viaye viosi vi yokiwa londalu, loviteka viaye viosi ndi vi inasi; omo wa vi kongela lofeto yocipuepue, kuenje koku feta ocipuepue haiko vi tiukila.

8Oco ndi ci lilila loku liyuila; ndula uwalo si endi epõlõla; ndi lila ndolombulu; ndi sukoka ndolombo.

9Omo apute aye ka a sakuiwa, a sambukila ale Yuda, a pitila kombundi yomanu vange, ta ko Yerusalãi.

10Ku ka ci sapuile vo Gati, ku ka lile ndaño naito; tiñolõhãla voneketela ko Bete-le-afara.

11Alonungi via Safiri, piti vonjila yene, endi lepõlõla losõi. Va Sanana ka va tundi; oku lila kua Betecele ku u wupa ocitumãlo.

12Va Moroti va kasi lohele sanga ka va kala ciwa, momo ohali ya Yehova ya tunda kilu, ya lokila ta kombundi ya Yerusalãi.

13A Lakisi, kutila otuvalu kakalu: ove wa linga efetikilo liekandu komõla a Siono ukãi, momo okulueya kua va Isareli kua sangiwa kokuove.

14Oco weca olombanjaile vioku usika ku Moreseti-gati; apata a Akisiwi a linga onjanjo kolosoma via Isareli.

15A Moresia, hu nenẽla vali u o ku yula: ulamba wa Isareli wiya ka Adulami.

16Liputi asenya. Kulũhi kovitue ndongonga. Lipemuili omãla wa sanjukili, momo va litepa love ha va endi kumandekua.

Jump to: Chapter 2 →