Micah 7

Umbundu Bible (Embimbiliya - Bíblia Sagrada em Umbundu)

← Chapter 6 Jump to:

1Ngongo yange we! momo nda soka ndotembo va yunga ale epako liokuenye kuenda va nolula ale ayuva oku linga ovinyu. Ka kuli ocisakaita cokulia, pamue ekuyu lina lia pia tete li yongola utima wange.

2Ukuakufendela Suku wa taka vofeka. Pokati komanu ka pali u wa sunguluka. Vosi va lavekela oku pesela osonde. Omunu omunu o seteka oku kuata manjaye lowanda.

3Ovaka avo a yayulako oku linga cĩvi. Ci kale osoma, ci kale onganji, vosi va yongola ovitukiko. Omunu unene o pangisa ndonjongole yĩvi yutima waye. Kuenje va likuta pamosi.

4Ndaño u wa velapo pokati kavo wa linga ndolosanyanya; lu wa sunguluka ca velapo pokati kavo wa linga ndolumbo luokapamãla. Eteke liolondavululi viavo leyambulo liavo lieya. Okukunduka kuavo ku kasi ocipepi.

5Ku ka kolele u o lisungue love, ndaño ekamba liove. Epito liomẽla wove li yilila u o pekaila vonete yove.

6Momo omõla ulume o sepula isiaye, omõla ukãi o vayela inaye; ufeko o vayela ndatembo yaye ukãi. Ovanyãli vomunu vakuepata liaye.

7Puãi ame, ame njimbila Yehova ovaso, nalamẽla Suku yeyovo liange. Suku yange o njeva.

8Onyãli wange, ku ka fuanguile, nda ñupuka minduka vali. Eci numãla vowelema Yehova o ndingila ocinyi.

9Omo ndo lingila ekandu oco mandikisa lokutema kua Yehova toke a netela ondaka yange kuenje o netuluila, O nundisila kocinyi. Mõla muẽle esunga liaye.

10Oco unyãli wange o ci mõla, kuenje osõi yi wila u wa popia lame hati, Yehova, Suku yove, o kasi pi? Ovaso ange o vanja lepembe. O kosiwa ndonata yovoluwa,

11Ku kala eteke lioku tunga ovimbaka viove. Keteke liaco olongave vi aviwila kupãla.

12Keteke liaco ava va tunda ka Asuria, lava va tunda kovaimbo oke Egito, tunde ke Egito toke ko Olui, tunde kokalunga toke kokalunga, tunde komunda toke komunda, vosi veya kokuove.

13Puãi ofeka yi linga ekalasoko mekonda liomanu va tungamo lovilinga viavo vĩvi.

14Omanu vove, haivo ocunda cocipiñalo cove, va songuila lombueti yove. Cilo va litungila vesisi vokati kofeka yovaima; veye, va lile vo Basiane lovo Gileada ndeci cosiahũlu.

15Ndi va lekisa ovikomo ndoloneke vina wa tundi kofeka ye Egito,

16Olofeka vi ci mõla kuenje vi kutisiwila osõi unene wavio. Ovimẽla viavo vi munihĩsua, ovatũi avio a sitikiwa.

17Vi lesa lesa oneketela ndonyõha, pamue ndovina vi yaila posi. Vi tunda kovikolo viavio loku luluma, viya ku Yehova Suku yetu lusumba, kuenje viu ku yokokela.

18Helie Suku wa soka ndove, u ecela olohõle, haeye ivala okulueya kuocisupe cocipiñalo caye? Eye ka kala ño-o hũ lonyeño yaye momo o sanjukila ohenda locisola.

19O tu kuatela vali ohenda, o kosa avĩho etu lolomãi viaye. Ove wimba ovakandu etu osi valondo okalunga.

20O tata Yakoba locili, o kuatela Avirahama ocisola ka ci pongoloka, ndeci wa lisilasila lolosekulu vietu tunde kosiãhũlu.

← Chapter 6 Jump to: