Habakkuk 1

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

Jump to: Chapter 2 →

1Habaqqúq nabí kí royá ká bár i nubuwwat.

2Ai Ḳhudáwand, maiṉ kab tak nála karúṉgá, aur tú na sunegá? maiṉ tere huzúr kab tak chilláúṉgá, Zulm! zulm! aur tú na bacháegá.

3Tú kyúṉ mujhe badkirdárí aur kajraftárí dikhátá hái? kyúṉki zulm aur sitam mere sámne haiṉ: fitna o fasád barpá hote rahte haiṉ.

4Is liye sharí‘at kamzor ho gayí, aur insáf mutlaq járí nahíṉ hotá; kyúṉki sharír sádiqoṉ ko gher lete haiṉ; pas insáf ká ḳhún ho rahá hai.

5Qaumoṉ par nazar karo, aur dekho, aur muta‘ajjib ho; kyúṉki maiṉ tumháre aiyám meṉ ek aisá kám karne ko húṉ, ki agar koí tum se us ká bayán kare, to tum hargiz báwar na karoge.

6Kyúṉki dekho, maiṉ Kasdíoṉ ko chaṛhá láúṉgá; wuh turshrú aur tundmizáj qaum haiṉ jo wus‘at i zamín se hokar guzarte haiṉ, táki un bastiyoṉ par jo un kí nahíṉ haiṉ qabza kar leṉ.

7Wuh ḍaraune aur haibatnák haiṉ; wuh ḳhud hí apní ‘adálat aur shán ká masdar haiṉ.

8Un ke ghoṛe chítoṉ se bhí tezraftár haiṉ, aur shám ko nikalnewále bheṛiyoṉ se ziyáda ḳhúnḳhor haiṉ: aur un ke sawár kúdte pháṉdte áte haiṉ; háṉ, wuh dúr se chale áte haiṉ; wuh ‘uqáb kí mánind haiṉ jo apne shikár par jhapaṭtá hai.

9Wuh sab g̣áratgarí ko áte haiṉ; wuh sídhe baṛhe chale áte haiṉ, aur un ke asír ret ke zarroṉ kí mánind beshumár hote haiṉ.

10Wuh bádsháhoṉ ko ṭhaṭṭhoṉ meṉ uṛáte, aur umará ko masḳhara banáte haiṉ; wuh qil‘oṉ ko haqír jánte haiṉ, kyúṉki wuh miṭṭí se damdame báṉdhkar un ko fath kar lete haiṉ.

11Tab wuh girdbád kí tarah guzarte; aur ḳhatá karke gunahgár hote haiṉ; kyúṉki un ká zor hí un ká Ḳhudá hai.

12Ai Ḳhudáwand mere Ḳhudá, ai mere Quddús, kyá tú azal se nahíṉ hai? ham nahíṉ mareṉge. Ai Ḳhudáwand, tú ne un ko ‘adálat ke liye ṭhahráyá hai; aur ai merí Chaṭán, tú ne un ko tádíb ke liye muqarrar kiyá hai.

13Terí áṉkheṉ aisí pák haiṉ ki tú badí ko dekh nahíṉ saktá, aur kajraftárí par nigáh nahíṉ kar saktá: phir tú dag̣ábázoṉ par kyúṉ nazar kartá hai, aur jab sharír apne se ziyáda sádiq ko nigal játá hai, tab tú kyúṉ ḳhámosh rahtá hai;

14aur baní Ádam ko samundar kí machhliyoṉ, aur kíṛe makauṛoṉ kí mánind banátá hai, jin par koí hukúmat karnewálá nahíṉ?

15Wuh un sab ko shast se uṭhá lete haiṉ, aur apne jál meṉ phaṉsáte haiṉ, aur mahájál meṉ jama‘ karte haiṉ: is liye wuh shádmán aur ḳhushwaqt haiṉ.

16Isí liye wuh apne jál ke áge qurbáníáṉ guzránte haiṉ, aur apne mahájál ke áge baḳhúr jaláte haiṉ; kyúṉki in ke wasíle se un ká baḳhra lazíz, aur un kí g̣izá charb hai.

17Pas kyá wuh apne jál ko ḳhálí karne aur qaumoṉ ko mutawátir qatl karne se báz na áeṉge?

Jump to: Chapter 2 →