Habakkuk 3

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 2 Jump to:

1Shigáyúnot ke sur par, Habaqqúq nabí kí du‘á.

2Ai Ḳhudáwand, maiṉ ne terí shuhrat suní, aur ḍar gayá: Ai Ḳhudáwand, isí zamáne meṉ apne kám ko bahál kar, Isí zamáne meṉ us ko záhir kar; Qahr ke waqt rahm ko yád farmá.

3Ḳhudá Temán se ayá, Aur Quddús koh i Fárán se. Us ká jalál ásmán par chhá gayá, Aur zamín us kí hamd se ma‘múr ho gayí.

4Us kí jagnagáhaṭ núr kí mánind thí; Us ke háth se kiraneṉ nikaltí thíṉ: Aur is meṉ us kí qudrat niháṉ thí.

5Wabá us ke áge áge chaltí thí, Aur átashí tír us ke qadamoṉ se nikalte the.

6Wuh khaṛá húá, aur zamín tharrá gayí; Us ne nigáh kí aur qaumeṉ paráganda ho gayíṉ: Azalí paháṛ pára pára ho gaye, Qadím ṭíle jhuk gaye; Us kí ráheṉ azalí haiṉ.

7Maiṉ ne Kúshan ke ḳhaimoṉ ko musíbat meṉ dekhá, Mulk i Midyán ke parde hil gaye.

8Ai Ḳhudáwand, kyá tú nadiyoṉ se bezár thá? Kyá terá qahr daryáoṉ par thá? Kyá terá g̣azab samundar par thá, Ki tú apne ghoṛoṉ aur fathyáb rathoṉ par sawár húá?

9Terí kamán g̣iláf se nikálí gayí, Terá ‘ahd qabáil ke sáth ustuwár thá. Tú ne zamín ko nadiyoṉ se chír ḍálá.

10Paháṛ tujhe dekhkar káṉp gaye; Sailáb guzar gaye; Samundar se shor uṭhá, Aur maujeṉ baland húíṉ.

11Tere uṛnewále tíroṉ kí raushní se, Tere chamkíle bhále kí jhalak se, Áftáb o máhtáb apne burjoṉ meṉ ṭhahr gaye.

12Tú g̣azabnák hokar mulk meṉ se guzrá. Tú ne qahr se qaumoṉ ko páemál kiyá.

13Tú apne logoṉ kí naját kí ḳhátir niklá, Háṉ, apne mamsúh kí naját kí ḳhátir; Tú ne sharír ke ghar kí chhat girá dí, Aur us kí bunyád bi’lkull khod ḍálí.

14Tú ne usí ke laṭh se us ke baháduroṉ ke sir phoṛe; Wuh mujhe paráganda karne ko girdbád kí tarah áe; Wuh g̣aríboṉ ko tanháí meṉ nigal jáne par ḳhush the.

15Tú apne ghoṛoṉ par sawár hokar samundar se, Háṉ, baṛe sailáb se pár ho gayá.

16Maiṉ ne suná, aur merá dil dahal gayá; Us shor ke sabab se mere hoṉṭh hilne lage: Merí haḍḍiyáṉ bosída ho gayíṉ: Aur maiṉ khaṛe khaṛe káṉpne lagá, Lekin maiṉ sabr se un ke bure din ká muntazir húṉ, Jo ikaṭṭhe hokar ham par hamla karte haiṉ.

17Agarchi anjír ká daraḳht na phúle, Aur ták meṉ phal na lage, Aur zaitún ká hásil zá‘i ho jáe, Aur khetoṉ meṉ kuchh paidáwár na ho, Aur bheṛḳháne se bheṛeṉ játí raheṉ, Aur taweloṉ meṉ maweshí na hoṉ;

18Taubhí maiṉ Ḳhudáwand se ḳhush rahúṉgá, Aur apne najátbaḳhsh Ḳhudá se ḳhushwaqt húṉgá.

19Ḳhudáwand Ḳhudá merí tawánáí hai, Wuh mere páṉw hirní ke se baná detá hai, Aur mujhe merí úṉchí jagahoṉ meṉ chalátá hai. (Mír mug̣anní ke liye, mere tárdár sázoṉ ke sáth.)

← Chapter 2 Jump to: