Haggai 1

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

Jump to: Chapter 2 →

1Dárá bádsháh kí saltanat ke dúsre baras ke chhaṭe mahíne kí pahlí táríḳh ko Yahúdáh ke názim Zarubbábul bin Siyáltíel, aur sardár káhin Yashú‘ bin Yahúsadaq ko Hajjaí nabí kí ma‘rifat Ḳhudáwand ká kalám pahuṉchá,

2ki Rabb u’l afwáj yúṉ farmátá hai, ki Yih log kahte haiṉ, Abhí Ḳhudáwand ke ghar kí ta‘mír ká waqt nahíṉ áyá.

3Tab Ḳhudáwand ká kalám Hajjaí nabí par názil húá,

4ki Kyá tumháre liye musaqqaf gharoṉ meṉ rahne ká waqt hai, jab ki yih ghar wírán paṛá hai?

5Aur ab Rabb u’l afwáj yúṉ farmátá hai, ki Tum apní rawish par g̣aur karo.

6Tum ne bahut sá boyá, par thoṛá káṭá; tum kháte ho, par ásúda nahíṉ hote; tum píte ho, par piyás nahíṉ bujhtí; tum kapṛe pahinte ho, par garm nahíṉ hote, aur mazdúr apní mazdúrí súráḳhdár thailí meṉ jama‘ kartá hai.

7Rabb u’l afwáj yúṉ farmátá hai, Apní rawish par g̣aur karo.

8Paháṛoṉ se lakṛí lákar yih ghar ta‘mír karo; aur maiṉ is se ḳhush húṉgá, aur merí tamjíd hogí, Ḳhudáwand farmátá hai.

9Tum ne bahut kí ummed rakkhí, aur dekho, thoṛá milá: aur jab tum use apne ghar meṉ láe, to maiṉ ne use uṛá diyá. Rabb u’l afwáj farmátá hai, Kyúṉ? Is liye ki merá ghar wírán hai, aur tum meṉ se har ek apne ghar ko dauṛá chalá játá hai.

10Is liye na ásmán se os girtí hai, aur na zamín apná hásil detí hai.

11Aur maiṉ ne ḳhushksálí ko talab kiyá, ki mulk, aur paháṛoṉ par, aur anáj, aur nayí mai, aur tel, aur zamín kí sab paidáwár par, aur insán o haiwán par, aur háth kí sárí mihnat par áe.

12Tab Zarubbábul bin Siyáltíel, aur sardár káhin Yashú‘ bin Yahúsadaq, aur logoṉ ká sab baqiya Ḳhudáwand apne Ḳhudá ke kalám aur us ke bheje húe Hajjaí nabí kí bátoṉ ke shanawá húe, aur log Ḳhudáwand ke huzúr tarsán húe.

13Tab Ḳhudáwand ke paig̣ambar Hajjaí ne Ḳhudáwand ká paig̣ám un logoṉ ko sunáyá, ki Ḳhudáwand farmátá hai, Maiṉ tumháre sáth húṉ.

14Phir Ḳhudáwand ne Yahúdáh ke názim Zarubbábul bin Siyáltíel kí, aur sardár káhin Yashú‘ bin Yahúsadaq kí, aur logoṉ ke baqiye kí rúh ko targ̣íb dí: pas wuh ákar Rabb u’l afwáj apne Ḳhudá ke ghar kí ta‘mír meṉ mashg̣úl húe.

15Aur yih wáqi‘a Dárá bádsháh kí saltanat ke dúsre baras ke chhaṭe mahíne kí chaubíswíṉ táríḳh ká hai.

Jump to: Chapter 2 →