Haggai 2

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 1 Jump to:

1Sátweṉ mahíne kí ikkíswíṉ táríḳh ko Ḳhudáwand ká kalám Hajjaí nabí kí ma‘rifat pahuṉchá,

2ki Yahúdáh ke názim Zarubbábul bin Siyáltíel sardár káhin Yashú‘ bin Yahúsadaq aur logoṉ ke baqiye se yúṉ kah,

3ki Tum meṉ se kis ne is haikal kí pahlí raunaq ko dekhá? aur ab kaisí dikháí detí hai? kyá yih tumhárí nazar meṉ náchíz nahíṉ hai?

4Lekin, ai Zarubbábul, hausala rakh, Ḳhudáwand farmátá hai; aur ai sardár káhin, Yashú‘ bin Yahúsadaq hausala rakh; aur ai mulk ke sab logo, hausala rakkho, Ḳhudáwand farmátá hai, aur kám karo; kyúṉki maiṉ tumháre sáth húṉ, Rabb u’l afwáj farmátá hai,

5Misr se nikalte waqt maiṉ ne tum se jo ‘ahd kiyá thá, us ke mutábiq merí wuh rúh tumháre sáth rahtí hai: himmat na háro.

6Kyúṉki Rabb u’l afwáj yúṉ farmátá hai, ki Maiṉ thoṛí der meṉ phir ek bár ásmán o zamín, aur bahr o barr ko hilá dúṉgá;

7maiṉ sab qaumoṉ ko hilá dúṉgá, aur un kí marg̣úb chízeṉ áeṉgí, aur maiṉ is ghar ko jalál se ma‘múr karúṉgá, Rabb u’l afwáj farmátá hai.

8Chándí merí hai, aur soná merá hai, Rabb u’l afwáj farmátá hai.

9Is pichhle ghar kí raunaq pahle ghar kí raunaq se ziyáda hogí, Rabb u’l afwáj farmátá hai; aur maiṉ is makán meṉ salámatí baḳhshúṉgá, Rabb u’l afwáj farmátá hai.

10Aur Dárá bádsháh kí saltanat ke dúsre sál ke nauweṉ mahíne kí chaubíswíṉ táríḳh ko Ḳhudáwand ká kalám Hajjaí nabí kí ma‘rifat pahuṉchá,

11ki Rabb u’l afwáj yúṉ farmátá hai, ki Sharí‘at kí bábat káhinoṉ se daryáft kar,

12ki Agar koí pák gosht ko apne libás ke dáman meṉ liye játá ho, aur us ká dáman roṭí, yá dál, yá mai, yá tel, yá kisí tarah ke kháne kí chíz ko chhú jáe, to kyá wuh chíz pák ho jáegí? Káhinoṉ ne jawáb diyá, Hargiz nahíṉ.

13Phir Hajjaí ne púchhá, ki Agar koí kisí murde ko chhúne se nápák ho gayá ho, aur in meṉ se kisí chíz ko chhúe, to kyá wuh chíz nápák ho jáegí? Káhinoṉ ne jawáb diyá, Zarúr nápák ho jáegí.

14Phir Hajjaí ne kahá, Ḳhudáwand farmátá hai, Merí nazar meṉ in logoṉ, aur is qaum, aur in ke a‘mál ká yihí hál hai; aur jo kuchh is jagah guzránte haiṉ, nápák hai.

15Pas ab aur áyanda ko us waqt ká ḳhayál rakkho, jab ki abhí Ḳhudáwand kí haikal ká patthar par patthar na rakkhá gayá thá:

16us tamám zamáne meṉ jab koí bís paimánoṉ kí ás rakhtá, to das hí milte the; aur jab koí mai ke hauz se pachás paimáne nikálne játá, to bís hí nikalte the.

17Aur maiṉ ne tum ko tumháre sab kámoṉ meṉ bád i samúm, aur gerúí, aur oloṉ se márá; par tum merí taraf rujú‘ na láe, Ḳhudáwand farmáta hái.

18Ab aur áyanda is ká ḳhayál rakkho, áj Ḳhudáwand kí haikal kí bunyád ke ḍále jáne, ya‘ní nauweṉ mahíne kí chaubíswíṉ taríḳh se, is ká ḳhayál rakkho.

19Kyá is waqt bíj khatte meṉ hai? abhí to ták aur anjír aur anár, aur zaitún meṉ phal nahíṉ lagá; áj hí se maiṉ tum ko barakat dúṉgá.

20Phir isí mahíne kí chaubíswíṉ táríḳh ko Ḳhudáwand ká kalám Hajjáí nabí par názil húá,

21ki Yahúdáh ke názim Zarubbábul se kah de, ki Maiṉ ásmán aur zamín ko hiláúṉgá;

22aur saltanatoṉ ke taḳht ulaṭ dúṉgá, aur qaumoṉ kí saltanatoṉ kí tawánáí nest kar dúṉgá, aur rathoṉ ko sawároṉ samet ulaṭ dúṉgá, aur ghoṛe aur un ke sawár gir jáeṉge, aur har shaḳhs apne bháí kí talwár se qatl hogá.

23Rabb u’l afwáj farmátá hai, Ai mere ḳhádim Zarubbábul bin Siyáltíel, usí roz maiṉ tujhe lúṉgá, Ḳhudáwand farmátá hai, aur nagín ṭhahráúṉgá; kyúṉki maiṉ ne tujhe barguzída kiyá hai, Rabb u’l afwáj farmátá hai.

← Chapter 1 Jump to: