Joel 1

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

Jump to: Chapter 2 →

1Ḳhudáwand ká kalám jo Yúel bin Fatúel par názil húá:

2Ai búṛho suno, ai zamín ke sab báshindo, kán lagáo. Kyá tumháre yá tumháre bápdádá ke aiyám meṉ kabhí aisá húá?

3Tum apní aulád se is ká tazkira karo, aur tumhárí aulád apní aulád se, aur un kí aulád apní nasl se bayán kare.

4Ki jo kuchh ṭiḍḍiyoṉ ke ek g̣ol se bachá, use dúsrá g̣ol nigal gayá, aur jo kuchh dúsre se bachá, use tísrá g̣ol chaṭ kar gayá, aur jo kuchh tísre se bachá, use chauthhá g̣ol khá gayá.

5Ai matwálo, jágo aur mátam karo; ai mainoshí karnewálo, nayí mai ke liye chilláo; kyúṉki wuh tumháre muṉh se chhin gayí hai.

6Kyúṉki mere mulk par ek qaum chaṛh áí hai, jis ke log zoráwar aur beshumár haiṉ, un ke dáṉt sher i babar ke se haiṉ, aur un kí ḍáṛheṉ sherní kí sí haiṉ.

7Unhoṉ ne mere tákistán ko ujáṛ ḍálá, aur mere anjír ke daraḳhtoṉ ko toṛ ḍálá hai: unhoṉ ne un ko bi’lkull chhíl chhálkar pheṉk diyá; un kí ḍáliyáṉ safed nikal áíṉ.

8Tum mátam karo, jis tarah dulhan apní jawání ke shauhar ke liye ṭáṭ oṛhkar mátam kartí hai.

9Nazr kí qurbání aur tapáwan Ḳhudáwand ke ghar se mauqúf ho gaye; Ḳhudáwand ke ḳhidmatguzár káhin mátam karte haiṉ.

10Khet ujaṛ gaye, zamín mátam kartí hai, kyúṉki g̣alla ḳharáb ho gayá, nayí mai ḳhatm ho gayí, aur raug̣an zá‘i ho gayá.

11Ai kisáno, ḳhajálat uṭháo; ai tákistán ke bág̣báno, nauha karo; kyúṉki gehúṉ, aur jau, aur maidán ke taiyár khet barbád ho gaye.

12Ták ḳhushk ho gayí, anjír ká daraḳht murjhá gayá, anár aur khajúr aur seb ke daraḳht, háṉ, maidán ke tamám daraḳht murjhá gaye: aur baní Ádam se ḳhushí játí rahí.

13Ai káhino, kamareṉ kaskar mátam karo; ai mazbah par ḳhidmat karnewálo, wáwailá karo; ai mere Ḳhudá ke ḳhádimo, áo, rát bhar ṭáṭ oṛho, kyúṉki nazr kí qurbání aur tapáwan tumháre Ḳhudá ke ghar se mauqúf ho gaye.

14Roze ke liye ek din muqaddas karo, muqaddas mahfil faráham karo, buzurgoṉ aur mulk ke tamám báshindoṉ ko Ḳhudáwand apne Ḳhudá ke ghar meṉ jama‘ karke us se faryád karo.

15Us roz par afsos! kyúṉki Ḳhudáwand ká roz nazdík hai, wuh Qádir i mutlaq kí taraf se baṛí halákat kí mánind áegá.

16Kyá hamárí áṉkhoṉ ke sámne rozí mauqúf nahíṉ húí, aur hamáre Ḳhudá ke ghar se ḳhushí o shádmání játí nahíṉ rahí?

17Bíj ḍheloṉ ke níche saṛ gayá, g̣allaḳháne ḳhálí paṛe haiṉ, khatte toṛ ḍále gaye, kyúṉki khetí súkh gayí.

18Jánwar kaise karáhte haiṉ! gáe bail ke galle pareshán haiṉ, kyúṉki un ke liye charágáh nahíṉ hai; háṉ, bheṛoṉ ke galle bhí nest ho gaye haiṉ.

19Ai Ḳhudáwand, maiṉ tere huzúr faryád kartá húṉ, kyúṉki ág ne biyábán kí charágáhoṉ ko jalá diyá, aur shu‘le ne maidán ke sab daraḳhtoṉ ko bhasam kar diyá hai.

20Janglí jánwar bhí terí taraf takte haiṉ, kyúṉki pání kí nadiyáṉ súkh gayíṉ, aur ág biyábán kí charágáhoṉ ko khá gayí.

Jump to: Chapter 2 →