Jonah 3

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 2 Jump to: Chapter 4 →

1Aur Ḳhudáwand ká kalám dúsrí bár Yúnáh par názil húá,

2ki Uṭh, us baṛe shahr Nínawah ko já, aur waháṉ us bát kí manádí kar jis ká maiṉ tujhe hukm detá húṉ.

3Tab Yúnáh Ḳhudáwand ke kalám ke mutábiq uṭhkar Nínawah ko gayá. Aur Nínawah bahut baṛá shahr thá; us kí masáfat tín din kí ráh thí.

4Aur Yúnáh shahr meṉ dáḳhil húá, aur ek din kí ráh chalá; us ne manádí kí, aur kahá, Chálís roz ke ba‘d Nínawah barbád kiyá jáegá.

5Tab Nínawah ke báshindoṉ ne Ḳhudá par ímán lákar roze kí manádí kí; aur adná o a‘lá sab ne ṭáṭ oṛhá.

6Aur yih ḳhabar Nínawah ke bádsháh ko pahuṉchí: aur wuh apne taḳht par se uṭhá, aur bádsháhí libás ko utár ḍálá, aur ṭáṭ oṛhkar rákh par baiṭh gayá.

7Aur bádsháh aur us ke arkán i daulat ke farmán se Nínawah meṉ yih i‘lán kiyá gayá, aur is bát kí manádí húí, ki Koí insán, yá haiwán, galla, yá rama, kuchh na chakkhe, aur na kháe piye;

8lekin insán aur haiwán ṭáṭ se mulabbas hoṉ, aur Ḳhudá ke huzúr girya o zárí kareṉ; balki har shaḳhs apní burí rawish, aur apne háth ke zulm se báz áe.

9Sháyad Ḳhudá rahm kare, aur apná iráda badle, aur apne qahr i shadíd se báz áe, aur ham halák na hoṉ.

10Jab Ḳhudá ne un kí yih hálat dekhí, ki wuh apní apní burí rawish se báz áe, to wuh us ‘azáb se, jo us ne un par názil karne ko kahá thá, báz áyá, aur use názil na kiyá.

← Chapter 2 Jump to: Chapter 4 →