Jonah 4

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 3 Jump to:

1Lekin Yúnáh is se niháyat náḳhush aur náráz húá.

2Aur us ne Ḳhudáwand se yúṉ du‘á kí, ki Ai Ḳhudáwand, jab maiṉ apne watan hí meṉ thá, aur Tarsís ko bhágnewálá thá, to kyá maiṉ ne yihí na kahá thá? maiṉ jántá thá ki tú rahím o karím Ḳhudá hai, jo qahr karne meṉ dhímá aur shafaqat meṉ g̣aní hai, aur ‘azáb názil karne se báz rahtá hai.

3Ab, ai Ḳhudáwand, maiṉ terí minnat kartá húṉ, ki merí ján le le; kyúṉki mere is jíne se mar jáná bihtar hai.

4Tab Ḳhudáwand ne farmáyá, Kyá tú aisá náráz hai?

5Aur Yúnáh shahr se báhar mashriq kí taraf já baiṭhá, aur waháṉ apne liye ek chhappar banákar us ke sáye meṉ baiṭh rahá, ki dekhe shahr ká kyá hál hotá hai.

6Tab Ḳhudáwand Ḳhudá ne kaddú kí bel ugáí, aur use Yúnáh ke úpar phailáyá, ki us ke sir par sáyá ho, aur wuh taklíf se bache. Aur Yúnáh us bel ke sabab se niháyat ḳhush húá.

7Lekin dúsre din subh ke waqt Ḳhudá ne ek kíṛá bhejá, jis ne us bel ko káṭ ḍálá, aur wuh súkh gayí.

8Aur jab áftáb baland húá, to Ḳhudá ne mashriq se lúh chaláí; aur áftáb kí garmí ne Yúnáh ke sir meṉ asar kiyá; aur wuh betáb ho gayá, aur maut ká árzúmand hokar kahne lagá, ki Mere is jíne se mar jáná bihtar hai.

9Aur Ḳhudá ne Yúnáh se farmáyá, Kyá tú is bel ke sabab se aisá náráz hai? Us ne kahá, Maiṉ yaháṉ tak náráz húṉ, ki marná cháhtá húṉ.

10Tab Ḳhudáwand ne farmáyá, ki Tujhe is bel ká itná ḳhayál hai, jis ke liye tú ne na kuchh mihnat kí aur na use ugáyá, jo ek hí rát meṉ ugí, aur ek hí rát meṉ súkh gayí:

11aur kyá mujhe lázim na thá ki maiṉ itne baṛe shahr Nínawah ká ḳhayál karúṉ, jis meṉ ek lákh bís hazár se ziyáda aise haiṉ jo apne dahine aur báeṉ háth meṉ imtiyáz nahíṉ kar sakte, aur beshumár maweshí haiṉ?

← Chapter 3 Jump to: