Nahum 1

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

Jump to: Chapter 2 →

1Nínawah kí bábat bár i nubuwwat: Ilqúshí Náhúm kí royá kí kitáb.

2Ḳhudáwand g̣aiyúr aur intiqám lenewálá Ḳhudá hai; háṉ, Ḳhudáwand intiqám lenewálá aur qahhár hai; Ḳhudáwand apne muḳhálifoṉ se intiqám letá hai, aur apne dushmanoṉ ke liye qahr ko qáim rakhtá hai.

3Ḳhudáwand qahr karne meṉ dhímá, aur qudrat meṉ baṛhkar hai; aur mujrim ko hargiz barí na karegá; Ḳhudáwand kí ráh girdbád aur áṉdhí meṉ hai, aur bádal us ke páṉwoṉ kí gard haiṉ.

4Wuhí samundar ko ḍáṉṭtá, aur sukhá detá hai, aur sab nadiyoṉ ko ḳhushk kar ḍáltá hai; Basan aur Karmil kumlá játe haiṉ, aur Lubnán kí koṉpaleṉ murjhá játí haiṉ.

5Us ke ḳhauf se paháṛ káṉpte haiṉ, aur ṭíle pighal játe haiṉ; us ke huzúr zamín, háṉ, dunyá aur us kí sab ma‘múrí thartharátí hai.

6Kis ko us ke qahr kí táb hai? us ke qahr i shadíd ko kaun bardásht kar saktá hai? us ká qahr ág kí mánind názil hotá hai, wuh chaṭánoṉ ko toṛ ḍáltá hai.

7Ḳhudáwand bhalá hai, aur musíbat ke din panáhgáh hai: wuh apne tawakkul karnewáloṉ ko jántá hai.

8Lekin ab wuh us ke makán ko baṛe sailáb se nest o nábúd karegá, aur táríkí us ke dushmanoṉ ko ragedegí.

9Tum Ḳhudáwand ke ḳhiláf kyá mansúba báṉdhte ho? wuh bi’lkull nábúd kar ḍálegá: ‘azáb do bára na áegá.

10Agarchi wuh uljhe húe káṉṭoṉ kí mánind pechída, aur apní mai se tar hoṉ, taubhí wuh súkhe bhúse kí tarah bi’lkull jalá diye jáeṉge.

11Tujh se ek aisá shaḳhs niklá hai, jo Ḳhudáwand ke ḳhiláf bure mansúbe báṉdhtá aur sharárat ki saláh detá hai.

12Ḳhudáwand yúṉ farmátá hai, ki Agarchi wuh zabardast aur bahut se hoṉ, taubhí wuh káṭe jáeṉge, aur shahr barbád ho jáegá. Agarchi maiṉ ne tujhe dukh diyá, taubhí phir kabhí tujhe dukh na dúṉgá.

13Aur ab maiṉ us ká júá tujh par se toṛ ḍálúṉgá, aur tere bandhanoṉ ko ṭukṛe ṭukṛe kar dúṉgá.

14Lekin Ḳhudáwand ne terí bábat yih hukm sádir farmáyá hai, ki terí nasl báqí na rahe; maiṉ tere butḳháne se khodí húí aur ḍhálí húí múratoṉ ko nest karúṉgá; maiṉ tere liye qabr taiyár karúṉgá, kyúṉki tú nikammá hai.

15Dekh, jo ḳhushḳhabarí látá, aur salámatí kí manádí kartá hai, us ke páṉw paháṛoṉ par haiṉ; ai Yahúdáh, apní ‘ídeṉ maná, aur apní nazreṉ adá kar; kyúṉki phir ḳhabís tere darmiyán se nahíṉ guzregá; wuh sáf káṭ ḍálá gayá hai.

Jump to: Chapter 2 →