Nahum 2

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 1 Jump to: Chapter 3 →

1Paráganda karnewálá tujh par chaṛh áyá hai: qil‘e ko mahfúz rakh, ráh kí nigahbání kar, kamarbasta ho, aur ḳhúb mazbút rah.

2Kyúṉki Ḳhudáwand Ya‘qúb kí raunaq ko Isráíl kí raunaq kí mánind phir bahál karegá; agarchi g̣áratgaroṉ ne un ko g̣árat kiyá hai, aur un kí sháḳheṉ toṛ ḍálí haiṉ.

3Us ke baháduroṉ kí sipareṉ surḳh haiṉ, jangí mard qirmizí wardí pahine haiṉ; us kí taiyárí ke waqt rath faulád se jhalakte haiṉ, aur deodár ke neze hilte haiṉ.

4Rath saṛakoṉ par tundí se dauṛte, aur maidán meṉ betahashá játe haiṉ; wuh mash‘aloṉ kí mánind chamakte, aur bijlí kí tarah kauṉdte haiṉ.

5Wuh apne sardároṉ ko bulátá hai; wuh ṭakkareṉ kháte áte haiṉ: wuh jaldí jaldí fasíl par chaṛhte haiṉ, aur aṛtalá taiyár kiyá játá hai.

6Nahroṉ ke pháṭak khul játe haiṉ, aur qasr gudáz ho játá hai.

7Hussab beparda húí aur asírí meṉ chalí gayí; us kí lauṉḍiyáṉ qumríoṉ kí mánind karáhtí húí mátam kartí, aur chhátí píṭtí haiṉ.

8Nínawah to qadím se hauz kí mánind hai, taubhí wuh bháge chale játe haiṉ. Wuh pukárte haiṉ, ki Ṭhahro, ṭhahro! par koí muṛkar nahíṉ dekhtá.

9Chándí lúṭo, soná lúṭo: kyúṉki mál kí kuchh intihá nahíṉ; sab nafís chízeṉ kasrat se haiṉ.

10Wuh ḳhálí, sunsán, aur wírán hai; un ke dil pighal gaye, aur ghuṭne ṭakráne lage; har ek kí kamar meṉ shiddat se dard hai; aur in sab ke chihre zard ho gaye.

11Sheroṉ kí mánd, aur jawán babaroṉ kí kháne kí jagah kaháṉ hai, jis meṉ sher i babar, aur sherní, aur un ke bachche beḳhauf phirte the?

12Sher i babar apne bachchoṉ kí ḳhurák ke liye pháṛtá thá, aur apní sherníoṉ ke liye galá ghoṉṭtá thá, aur apní mándoṉ ko shikár se, aur g̣ároṉ ko pháṛe húoṉ se bhartá thá.

13Rabb u’l afwáj farmátá hai, Dekh, maiṉ terá muḳhálif húṉ, aur tere rathoṉ ko jalákar dhuwáṉ baná dúṉgá, aur talwár tere jawán babaroṉ ko khá jáegí: aur maiṉ terá shikár zamín par se miṭá ḍálúṉgá, aur tere elchíoṉ kí áwáz phir sunáí na degí.

← Chapter 1 Jump to: Chapter 3 →