Psalms 119 — Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

1Mubárak haiṉ wuh jo kámilraftár haiṉ, Jo Ḳhudáwand kí sharí‘at par ‘amal karte haiṉ.

2Mubárak haiṉ wuh jo us kí shahádatoṉ ko mánte haiṉ, Aur púre dil se us ke tálib haiṉ.

3Un se nárástí nahíṉ hotí, Wuh us kí ráhoṉ par chalte haiṉ.

4Tú ne apne qawánín diye haiṉ, Táki ham dil lagákar un ko máneṉ.

5Kásh ki tere áín mánne ke liye Merí rawisheṉ durust ho jáeṉ.

6Jab maiṉ tere sab ahkám ká liház rakkhúṉgá To sharminda na húṉgá.

7Jab maiṉ terí sadáqat ke ahkám síkh lúṉgá To sachche dil se terá shukr adá karúṉgá.

8Maiṉ tere áín mánúṉgá: Mujhe bi’lkull tark na kar de.

9Jawán apní rawish kis tarah pák rakkhe? Tere kalám ke mutábiq us par nigáh rakhne se.

10Maiṉ púre dil se terá tálib húá húṉ: Mujhe apne farmán se bhaṭakne na de.

11Maiṉ ne tere kalám ko apne dil meṉ rakh liyá hai, Táki maiṉ tere ḳhiláf gunáh na karúṉ.

12Ai Ḳhudáwand, tú mubárak hai: Mujhe apne áín sikhá.

13Maiṉ ne apne laboṉ se Tere farmúda ahkám ko bayán kiyá.

14Mujhe terí shahádatoṉ kí ráh se aisí shádmání húí, Jaisí har tarah kí daulat se hotí hai.

15Maiṉ tere qawánín par g̣aur karúṉgá, Aur terí ráhoṉ ká liház rakkhúṉgá.

16Maiṉ tere áín meṉ masrúr rahúṉgá: Maiṉ tere kalám ko na bhúlúṉgá.

17Apne bande par ihsán kar táki maiṉ jítá rahúṉ, Aur tere kalám ko mántá rahúṉ.

18Merí áṉkheṉ khol de, Táki maiṉ terí sharí‘at ke ‘ajáib dekhúṉ.

19Maiṉ zamín par musáfir húṉ: Apne farmán mujh se poshída na rakh.

20Merá dil tere ahkám ke ishtiyáq meṉ Har waqt taṛaptá rahtá hai.

21Tú ne un mal‘ún mag̣rúroṉ ko jhiṛak diyá, Jo tere farmán se bhaṭakte rahte haiṉ.

22Malámat aur hiqárat ko mujh se dúr kar de; Kyúṉki maiṉ ne terí shahádateṉ mání haiṉ.

23Umará bhí baiṭhkar mere ḳhiláf báteṉ karte rahe, Lekin terá banda tere áín par dhyán lagáe rahá.

24Terí shahádateṉ mujhe marg̣úb Aur merí mushír haiṉ.

25Merí ján ḳhák meṉ mil gayí: Tú apne kalám ke mutábiq mujhe zinda kar.

26Maiṉ ne apní rawishoṉ ká izhár kiyá, aur tú ne mujhe jawáb diyá: Mujhe apne áín kí ta‘lím de.

27Apne qawánín kí ráh mujhe samjhá de, Aur maiṉ tere ‘ajáib par dhyán karúṉgá.

28G̣am ke máre merí ján ghulí játí hai: Apne kalám ke mutábiq mujhe taqwiyat de.

29Jhúṭh kí ráh se mujhe dúr rakh. Aur mujhe apní sharí‘at ‘ináyat farmá.

30Maiṉ ne wafádárí kí ráh iḳhtiyár kí hai: Maiṉ ne tere ahkám apne sámne rakkhe haiṉ.

31Maiṉ terí shahádatoṉ se lipṭá húá húṉ: Ai Ḳhudáwand, mujhe sharminda na hone de.

32Jab tú merá hausala baṛháegá To maiṉ tere farmán kí ráh meṉ dauṛúṉgá.

33Ai Ḳhudáwand, mujhe apne áín kí ráh batá, Aur maiṉ áḳhir tak us par chalúṉgá.

34Mujhe fahm ‘atá kar, aur maiṉ terí sharí‘at par chalúṉgá, Balki maiṉ púre dil se us ko mánúṉgá.

35Mujhe apne farmán kí ráh par chalá, Kyúṉki isí meṉ merí ḳhushí hai.

36Mere dil ko apní shahádatoṉ kí taraf rujú‘ dilá, Na ki lálach kí taraf.

37Merí áṉkhoṉ ko butlán par nazar karne se báz rakh, Aur mujhe apní ráhoṉ meṉ zinda kar.

38Apne bande ke liye apná wuh qaul púrá kar Jis se terá ḳhauf paidá hotá hai.

39Merí malámat ko jis se maiṉ ḍartá húṉ dúr kar de; Kyúṉki tere ahkám bhale haiṉ.

40Dekh, maiṉ tere qawánín ká mushtáq rahá húṉ: Mujhe apní sadáqat se zinda kar.

41Ai Ḳhudáwand, tere qaul ke mutábiq, Terí shafaqat aur terí naját mujhe nasíb ho.

42Tab maiṉ apne malámat karnewále ko jawáb de sakúṉgá, Kyúṉki maiṉ tere kalám par bharosá rakhtá húṉ.

43Aur haqq bát ko mere muṉh se hargiz judá na hone de, Kyúṉki merá i‘timád tere ahkám par hai.

44Pas maiṉ abadu’l ábád Terí sharí‘at ko mántá rahúṉgá.

45Aur maiṉ ázádí se chalúṉgá, Kyúṉki maiṉ tere qawánín ká tálib rahá húṉ.

46Maiṉ bádsháhoṉ ke sámne terí shahádatoṉ ká bayán karúṉgá, Aur sharminda na húṉgá.

47Tere farmán mujhe ‘azíz haiṉ; Maiṉ un meṉ masrúr rahúṉgá.

48Maiṉ apne háth tere farmán kí taraf, jo mujhe ‘azíz hai, uṭháúṉgá, Aur tere áín par dhyán karúṉgá.

49Jo kalám tú ne apne bande se kiyá use yád kar, Kyúṉki tú ne mujhe ummed diláí hai.

50Merí musíbat meṉ yihí merí tasallí hai, Ki tere kalám ne mujhe zinda kiyá hai.

51Mag̣rúroṉ ne mujhe bahut ṭhaṭṭhoṉ meṉ uṛáyá, Taubhí maiṉ ne terí sharí‘at se kanára nahíṉ kiyá.

52Ai Ḳhudáwand, maiṉ tere qadím ahkám ko yád kartá, Aur itmínán pátá rahá húṉ.

53Un sharíroṉ ke sabab se jo terí sharí‘at ko tark karte haiṉ, Maiṉ saḳht taish meṉ á gayá húṉ.

54Mere musáfirḳháne meṉ Tere áín merá gít rahe haiṉ.

55Ai Ḳhudáwand, rát ko maiṉ ne terá nám yád kiyá hai, Aur terí sharí‘at par ‘amal kiyá hai.

56Yih mere wáste is liye húá Ki maiṉ ne tere qawánín ko máná.

57Ḳhudáwand merá baḳhra hai: Maiṉ ne kahá hai, Maiṉ terí báteṉ mánúṉgá.

58Maiṉ púre dil se tere karam ká ḳhwáháṉ húá: Apne kalám ke mutábiq mujh par rahm kar.

59Maiṉ ne terí ráhoṉ par g̣aur kiyá Aur terí shahádatoṉ kí taraf apne qadam moṛe.

60Maiṉ ne tere farmán mánne meṉ Jaldí kí aur der na lagáí.

61Sharíroṉ kí rassiyoṉ ne mujhe jakaṛ liyá, Par maiṉ terí sharí‘at ko na bhúlá.

62Terí sadáqat ke ahkám ke liye Maiṉ ádhí rát ko terá shukr karne ko uṭhúṉgá.

63Maiṉ un sab ká sáthí húṉ jo tujh se ḍarte haiṉ, Aur un ká jo tere qawánín ko mánte haiṉ.

64Ai Ḳhudáwand, zamín terí shafaqat se ma‘múr hai: Mujhe apne áín sikhá.

65Ai Ḳhudáwand, tú ne apne kalám ke mutábiq Apne bande ke sáth bhaláí kí hai.

66Mujhe sahíh imtiyáz aur dánish sikhá, Kyúṉki maiṉ tere farmán par ímán láyá húṉ.

67Maiṉ musíbat uṭháne se pahle gumráh thá, Par ab tere kalám ko mántá húṉ.

68Tú bhalá hai aur bhaláí kartá hai: Mujhe apne áín sikhá.

69Mag̣rúroṉ ne mujh par buhtán báṉdhá hai: Maiṉ púre dil se tere qawánín ko mánúṉgá.

70Un ke dil chiknáí se farbih ho gaye, Lekin maiṉ terí sharí‘at meṉ masrúr húṉ.

71Achchhá húá ki maiṉ ne musíbat uṭháí, Táki tere áín síkh lúṉ.

72Tere muṉh kí sharí‘at mere liye Sone chándí ke hazároṉ sikkoṉ se bihtar hai.

73Tere háthoṉ ne mujhe banáyá aur tartíb dí: Mujhe fahm ‘atá kar táki tere farmán síkh lúṉ.

74Tujh se ḍarnewále mujhe dekhkar ḳhush hoṉge, Is liye ki mujhe tere kalám par i‘timád hai.

75Ai Ḳhudáwand, maiṉ tere ahkám kí sadáqat ko jántá húṉ, Aur yih ki wafádárí hí se tú ne mujhe dukh meṉ ḍálá.

76Us kalám ke mutábiq jo tú ne apne bande se kiyá Terí shafaqat merí tasallí ká bá‘is ho.

77Terí rahmat mujhe nasíb ho, táki maiṉ zinda rahúṉ, Kyúṉki terí sharí‘at merí ḳhushnúdí hai.

78Mag̣rúr sharminda hoṉ, kyúṉki unhoṉ ne náhaqq mujhe giráyá; Lekin maiṉ tere qawánín par dhyán karúṉgá.

79Tujh se ḍarnewále merí taraf rujú‘ hoṉ, To wuh terí shahádatoṉ ko ján leṉge.

80Merá dil tere áín mánne meṉ kámil rahe, Táki maiṉ sharmindagí na uṭháúṉ.

81Merí ján terí naját ke liye betáb hai, Lekin mujhe tere kalám par i‘timád hai.

82Tere kalám ke intizár meṉ merí áṉkheṉ rah gayíṉ: Maiṉ yihí kahtá rahá ki Tú mujhe kab tasallí degá?

83Maiṉ us mashkíze kí mánind ho gayá jo dhuweṉ meṉ ho, Taubhí maiṉ tere áín ko nahíṉ bhúltá.

84Tere bande ke din hí kitne haiṉ? Tú mere satánewáloṉ par kab fatwá degá?

85Mag̣rúroṉ ne, jo terí sharí‘at ke pairau nahíṉ, Mere liye gaṛhe khode haiṉ.

86Tere sab farmán barhaqq haiṉ: Wuh náhaqq mujhe satáte haiṉ; tú merí madad kar.

87Unhoṉ ne mujhe zamín par se faná kar hí ḍálá thá, Lekin maiṉ ne tere qawánín ko tark na kiyá.

88Tú mujhe apní shafaqat ke mutábiq zinda kar, To maiṉ tere muṉh kí shahádat ko mánúṉgá.

89Ai Ḳhudáwand, terá kalám Ásmán par abad tak qáim hai.

90Terí wafádárí pusht dar pusht hai: Tú ne zamín ko qiyám baḳhshá aur wuh qáim hai.

91Wuh áj tere ahkám ke mutábiq qáim haiṉ, Kyúṉki sab chízeṉ terí ḳhidmatguzár haiṉ.

92Agar terí sharí‘at merí ḳhushnúdí na hotí To maiṉ apní musíbat meṉ halák ho játá.

93Maiṉ tere qawánín ko kabhí na bhúlúṉgá, Kyúṉki tú ne un hí ke wasíle se mujhe zinda kiyá hai.

94Maiṉ terá hí húṉ, mujhe bachá le; Kyúṉki maiṉ tere qawánín ká tálib rahá húṉ.

95Sharír mujhe halák karne ko ghát meṉ lage rahe, Lekin maiṉ terí shahádatoṉ par g̣aur karúṉgá.

96Maiṉ ne dekhá ki har kamál kí intihá hai; Lekin terá hukm niháyat wasí‘ hai.

97Áh, maiṉ terí sharí‘at se kaisí mahabbat rakhtá húṉ! Mujhe din bhar usí ká dhyán rahtá hai.

98Tere farmán mujhe mere dushmanoṉ se ziyáda dánishmand banáte haiṉ, Kyúṉki wuh hamesha mere sáth haiṉ.

99Maiṉ apne sab ustádoṉ se ‘aqlmand húṉ, Kyúṉki terí shahádatoṉ par merá dhyán rahtá hai.

100Maiṉ ‘umrrasída logoṉ se ziyáda samajh rakhtá húṉ, Kyúṉki maiṉ ne tere qawánín ko máná hai.

101Maiṉ ne har burí ráh se apne qadam rok rakkhe haiṉ, Táki terí sharí‘at par ‘amal karúṉ.

102Maiṉ ne tere ahkám se kanára nahíṉ kiyá, Kyúṉki tú ne mujhe ta‘lím dí hai.

103Terí báteṉ mere liye kaisí shírín haiṉ! Wuh mere muṉh ko shahd se bhí míṭhí ma‘lúm hotí haiṉ.

104Tere qawánín se mujhe fahm hásil hotá hai, Is liye mujhe har jhúṭhí ráh se nafrat hai.

105Terá kalám mere qadamoṉ ke liye chirág̣ Aur merí ráh ke liye raushní hai.

106Maiṉ ne qasam kháí hai, aur is par qáim húṉ, Ki terí sadáqat ke ahkám par ‘amal karúṉgá.

107Maiṉ baṛí musíbat meṉ húṉ: Ai Ḳhudáwand, apne kalám ke mutábiq mujhe zinda kar.

108Ai Ḳhudáwand, mere muṉh se razá kí qurbáníáṉ qubúl farmá: Aur mujhe apne ahkám kí ta‘lím de.

109Merí ján hamesha hathelí par hai, Taubhí maiṉ terí sharí‘at ko nahíṉ bhúltá.

110Sharíroṉ ne mere liye phandá lagáyá hai, Taubhí maiṉ tere qawánín se nahíṉ bhaṭká.

111Maiṉ ne terí shahádatoṉ ko apní abadí mírás banáyá hai; Kyúṉki un se mere dil ko shádmání hotí hai.

112Maiṉ ne hamesha ke liye Tere áín mánne par dil lagáyá hai.

113Mujhe dodiloṉ se nafrat hai; Par terí sharí‘at se mahabbat rakhtá húṉ.

114Tú mere chhipne kí jagah aur merí sipar hai: Mujhe tere kalám par i‘timád hai.

115Ai badkirdáro, mujh se dúr ho jáo, Táki maiṉ apne Ḳhudá ke farmán par ‘amal karúṉ.

116Tú apne kalám ke mutábiq mujhe sambhál, táki zinda rahúṉ, Aur mujhe apne i‘timád se sharmindagí na uṭháne de.

117Mujhe sambhál, aur maiṉ salámat rahúṉgá, Aur hamesha tere áín ká liház rakkhúṉgá.

118Tú ne un sab ko haqír jáná hai jo tere áín se bhaṭak játe haiṉ, Kyúnki un kí dag̣ábází ‘abas hai.

119Tú zamín ke sab sharíroṉ ko mail kí tarah chháṉṭ detá hai, Is liye maiṉ terí shahádatoṉ ko ‘azíz rakhtá húṉ.

120Merá jism tere ḳhauf se káṉptá hai, Aur maiṉ tere ahkám se ḍartá húṉ.

121Maiṉ ne ‘adl aur insáf kiyá hai: Mujhe un ke hawále na kar jo mujh par zulm karte haiṉ.

122Bhaláí ke liye apne bande ká zámin ho; Mag̣rúr mujh par zulm na kareṉ.

123Terí naját aur terí sadáqat ke kalám ke intizár meṉ Merí áṉkheṉ rah gayíṉ.

124Apne bande se apní shafaqat ke mutábiq sulúk kar; Aur mujhe apne áín sikhá.

125Maiṉ terá banda húṉ, mujh ko fahm ‘atá kar, Táki terí shahádatoṉ ko samajh lúṉ.

126Ab waqt á gayá ki Ḳhudáwand kám kare, Kyúṉki unhoṉ ne terí sharí‘at ko bátil kar diyá hai.

127Is liye maiṉ tere farmán ko sone se Balki kundan se bhí ziyáda ‘azíz rakhtá húṉ.

128Is liye maiṉ tere sab qawánín ko barhaqq jántá húṉ, Aur har jhúṭhí ráh se mujhe nafrat hai.

129Terí shahádateṉ ‘ajíb haiṉ: Is liye merá dil un ko mántá hai.

130Terí bátoṉ kí tashríh núr baḳhshtí hai; Wuh sádadiloṉ ko ‘aqlmand banátí hai.

131Maiṉ ḳhúb muṉh kholkar háṉptá rahá, Kyúṉki maiṉ tere farmán ká mushtáq thá.

132Merí taraf tawajjuh kar aur mujh par rahm farmá, Jaisá tere nám se mahabbat rakhnewáloṉ ká haqq hai.

133Apne kalám meṉ merí rahnumáí kar; Koí badkárí mujh par tasallut na páe.

134Insán ke zulm se mujhe chhuṛá le, To tere qawánín par ‘amal karúṉgá.

135Apná chihra apne bande par jalwagar farmá, Aur mujhe apne áín sikhá.

136Merí áṉkhoṉ se pání ke chashme járí haiṉ, Is liye ki log terí sharí‘at ko nahíṉ mánte.

137Ai Ḳhudáwand, tú sádiq hai, Aur tere ahkám barhaqq haiṉ.

138Tú ne sadáqat aur kamál wafádárí se Apní shahádatoṉ ko záhir farmáyá hai.

139Merí g̣airat mujhe khá gayí, Kyúṉki mere muḳhálif terí báteṉ bhúl gaye.

140Terá kalám bi’lkull ḳhális hai, Is liye tere bande ko us se mahabbat hai.

141Maiṉ adná aur haqír húṉ, Taubhí maiṉ tere qawánín ko nahíṉ bhúltá.

142Terí sadáqat abadí sadáqat hai, Aur terí sharí‘at barhaqq hai.

143Maiṉ taklíf aur ‘azáb meṉ mubtalá húṉ, Taubhí tere farmán merí ḳhushnúdí haiṉ.

144Terí shahádateṉ hamesha rást haiṉ: Mujhe fahm ‘atá kar, to maiṉ zinda rahúṉgá.

145Maiṉ púre dil se du‘á kartá húṉ, ai Ḳhudáwand, mujhe jawáb de: Maiṉ tere áín par ‘amal karúṉgá.

146Maiṉ ne tujh se du‘á kí hai, mujhe bachá le; Aur maiṉ terí shahádatoṉ ko mánúṉgá.

147Maiṉ ne pau phaṭne se pahle faryád kí: Mujhe tere kalám par i‘timád hai.

148Merí áṉkheṉ rát ke har pahar se pahle khul gayíṉ, Táki tere kalám par dhyán karúṉ.

149Apní shafaqat ke mutábiq merí faryád sun: Ai Ḳhudáwand, apne ahkám ke mutábiq mujhe zinda kar.

150Jo sharárat ke darpai rahte haiṉ, wuh nazdík á gaye; Wuh terí sharí‘at se dúr haiṉ.

151Ai Ḳhudáwand, tú nazdík hai, Aur tere sab farmán barhaqq haiṉ.

152Terí shahádatoṉ se mujhe qadím se ma‘lúm húá Ki tú ne un ko hamesha ke liye qáim kiyá hai.

153Merí musíbat ká ḳhayál kar, aur mujhe chhuṛá, Kyúṉki maiṉ terí sharí‘at ko nahíṉ bhúltá.

154Merí wakálat kar aur merá fidya de: Apne kalám ke mutábiq mujhe zinda kar.

155Naját sharíroṉ se dúr hai, Kyúṉki wuh tere áín ke tálib nahíṉ haiṉ.

156Ai Ḳhudáwand, terí rahmat baṛí hai: Apne ahkám ke mutábiq mujhe zinda kar.

157Mere satánewále aur muḳhálif bahut haiṉ, Taubhí maiṉ ne terí shahádatoṉ se kanára na kiyá.

158Maiṉ dag̣ábázoṉ ko dekhkar malúl húá, Kyúṉki wuh tere kalám ko nahíṉ mánte.

159Ḳhayál farmá ki mujhe tere qawánín se kaisí mahabbat hai: Ai Ḳhudáwand, apní shafaqat ke mutábiq mujhe zinda kar.

160Tere kalám ká ḳhulása sachcháí hai: Terí sadáqat ke kull ahkám abadí haiṉ.

161Umará ne mujhe besabab satáyá hai, Lekin mere dil meṉ terí bátoṉ ká ḳhauf hai.

162Maiṉ baṛí lúṭ pánewále kí mánind Tere kalám se ḳhush húṉ.

163Mujhe jhúṭh se nafrat aur karáhiyat hai, Lekin terí sharí‘at se mahabbat hai.

164Maiṉ terí sadáqat ke ahkám ke sabab se Din meṉ sát bár terí sitáish kartá húṉ.

165Terí sharí‘at se mahabbat rakhnewále mutma’inn haiṉ; Un ke liye ṭhokar kháne ká koí mauqa‘ nahíṉ.

166Ai Ḳhudáwand, maiṉ terí naját ká ummedwár rahá húṉ, Aur tere farmán bajá láyá húṉ.

167Merí ján ne terí shahádateṉ mání haiṉ, Aur wuh mujhe niháyat ‘azíz haiṉ.

168Maiṉ ne tere qawánín aur shahádatoṉ ko máná hai, Kyúṉki merí sab rawisheṉ tere sámne haiṉ.

169Ai Ḳhudáwand, merí faryád tere huzúr pahuṉche: Apne kalám ke mutábiq mujhe fahm ‘atá kar.

170Merí iltijá tere huzúr pahuṉche: Apne kalám ke mutábiq mujhe chhuṛá.

171Mere laboṉ se terí sitáish ho, Kyúṉki tú mujhe apne áín sikhátá hai.

172Merí zabán tere kalám ká gít gáe, Kyúṉki tere sab farmán barhaqq haiṉ.

173Terá háth merí madad ko taiyár rahe, Kyúṉki maiṉ ne tere qawánín iḳhtiyár kiye haiṉ.

174Ai Ḳhudáwand, maiṉ terí naját ká mushtáq rahá húṉ, Aur terí sharí‘at merí ḳhushnúdí hai.

175Merí ján zinda rahe, to wuh terí sitáish karegí, Aur tere ahkám merí madad kareṉ.

176Maiṉ khoí húí bheṛ kí mánind bhaṭak gayá húṉ; apne bande ko talásh kar, Kyúṉki maiṉ tere farmán ko nahíṉ bhúltá.