Psalms 18

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 17 Jump to: Chapter 19 →

1Ai Ḳhudáwand, ai merí quwwat, maiṉ tujh se mahabbat rakhtá húṉ.

2Ḳhudáwand merí chaṭán aur merá qil‘a aur merá chhuṛánewálá hai: Merá Ḳhudá, merí chaṭán, jis par maiṉ bharosá rakkhúṉgá; Merí sipar aur merí naját ká síṉg; merá úṉchá burj.

3Maiṉ Ḳhudáwand ko jo sitáish ke láiq hai pukárúṉgá; Yúṉ maiṉ apne dushmanoṉ se bacháyá jáúṉgá.

4Maut kí rassiyoṉ ne mujhe gher liyá, Aur bedíní ke sailáboṉ ne mujhe daṛáyá;

5Pátál kí rassiyáṉ mere chaugird thíṉ: Maut ke phande mujh par á paṛe the.

6Apní musíbat meṉ maiṉ ne Ḳhudáwand ko pukárá, Aur apne Ḳhudá se faryád kí: Us ne apní haikal meṉ se merí áwáz suní, Aur merí faryád jo us ke huzúr thí us ke kán meṉ pahuṉchí.

7Tab zamín hil gayí aur káṉp uṭhí: Paháṛoṉ kí bunyádoṉ ne jumbish kháí Aur hil gayíṉ, is liye ki wuh g̣azabnák húá.

8Us ke nathnoṉ se dhuwáṉ uṭhá, Aur us ke muṉh se ág nikalkar bhasam karne lagí: Koele us se dahak uṭhe.

9Us ne ásmánoṉ ko bhí jhuká diyá, aur níche utar áyá, Aur us ke páṉwoṉ tale gahrí táríkí thí.

10Wuh karúbí par sawár hokar uṛá, Balki wuh tezí se hawá ke bázúoṉ par uṛá.

11Us ne zulmat ya‘ní abr kí táríkí aur ásmán ke daldár bádaloṉ ko Apne chaugird apne chhipne kí jagah aur apná shámiyána banáyá.

12Us ki huzúrí kí jhalak se us ke daldár bádal phaṭ gaye, Ole aur angáre.

13Aur Ḳhudáwand ásmán meṉ garajá, Haqq Ta‘álá ne apní áwáz sunáí; Ole aur angáre.

14Us ne apne tír chalákar un ko paráganda kiyá, Balki tábaṛtoṛ bijlí se un ko shikast dí.

15Tab terí ḍáṉṭ se, ai Ḳhudáwand, Tere nathnoṉ ke dam ke jhoke se Pání kí tháh dikháí dene lagí, Aur jahán kí bunyádeṉ namúdár húíṉ.

16Us ne úpar se háth baṛhákar mujhe thám liyá, Aur mujhe bahut pání meṉ se kheṉchkar báhar nikálá.

17Us ne mere zoráwar dushman aur mere ‘adáwat rakhnewáloṉ se Mujhe chhuṛá liyá, kyúṉki wuh mere liye niháyat zabardast the.

18Wuh merí musíbat ke din mujh par á paṛe: Par Ḳhudáwand merá sahárá thá.

19Wuh mujhe kusháda jagah meṉ nikál bhí láyá; Us ne mujhe chhuṛáyá, is liye ki wuh mujh se ḳhush thá.

20Ḳhudáwand ne merí rástí ke muwáfiq mujhe jazá dí, Aur mere háthoṉ kí pákízagí ke mutábiq mujhe badla diyá,

21Kyúṉki maiṉ Ḳhudáwand ki ráhoṉ par chaltá rahá, Aur sharárat se apne Ḳhudá se alag na húá.

22Kyúṉki us ke sab faisale mere sámne rahe, Aur maiṉ us ke áín se bargashta na húá.

23Maiṉ us ke huzúr kámil bhí rahá, Aur apne ko apní badkárí se báz rakkhá.

24Ḳhudáwand ne mujhe merí rástí ke muwáfiq Aur mere háthoṉ kí pákízagí ke mutábiq jo us ke sámne thí badla diyá.

25Rahmdil ke sáth tú rahím hogá; Aur kámil ádmí ke sáth kámil;

26Nekokár ke sáth nek hogá; Aur kajrau ke sáth ṭeṛhá.

27Kyúṉki tú musíbatzada logoṉ ko bacháegá, Lekin mag̣rúroṉ kí áṉkhoṉ ko níchá karegá.

28Is liye ki tú mere chirág̣ ko raushan karegá: Ḳhudáwand merá Ḳhudá mere andhere ko ujálá kar degá.

29Kyúṉki terí badaulat maiṉ fauj par dháwá kartá húṉ; Aur apne Ḳhudá kí badaulat díwár pháṉd játá húṉ.

30Lekin Ḳhudá kí ráh kámil hai: Ḳhudáwand ká kalám táyá húá hai: Wuh un sab kí sipar hai jo us par bharosá rakhte haiṉ.

31Kyúṉki Ḳhudáwand ke siwá âur kaun Ḳhudá hai? Aur hamáre Ḳhudá ko chhoṛkar âur kaun chaṭán hai?

32Ḳhudá hí mujhe quwwat se kamarbasta kartá hai, Aur merí ráh ko kámil kartá hai.

33Wuhí mere páṉw harniyoṉ ke se baná detá hai, Aur mujhe merí úṉchí jagahoṉ meṉ qáim kartá hai.

34Wuh mere háthoṉ ko jang karná sikhátá hai, Yaháṉ tak ki mere bázú pítal kí kamán ko jhuká dete haiṉ.

35Tú ne mujh ko apní naját kí sipar baḳhshí: Aur tere dahine háth ne mujhe sambhálá, Aur terí narmí ne mujhe buzurg banáyá hai.

36Tú ne mere níche mere qadam kusháda kar diye, Aur mere páṉw nahíṉ phisale.

37Maiṉ apne dushmanoṉ ká píchhá karke un ko já lúṉgá; Aur jab tak wuh faná na ho jáeṉ, wápas nahíṉ áúṉgá.

38Maiṉ un ko aisá chhedúṉgá ki wuh úṭh na sakeṉge: Wuh mere páṉwoṉ ke níche gir paṛeṉge.

39Kyúṉki tú ne laṛáí ke liye mujhe quwwat se kamarbasta kiyá, Aur mere muḳhálifoṉ ko mere sámne zer kiyá.

40Tú ne mere dushmanoṉ kí pusht merí taraf pher dí, Táki maiṉ apne ‘adáwat rakhnewáloṉ ko káṭ ḍálúṉ.

41Unhoṉ ne duháí dí, par koí na thá jo bacháe; Ḳhudáwand ko bhí pukárá, par us ne un ko jawáb na diyá.

42Tab maiṉ ne un ko kúṭ kúṭkar hawá meṉ uṛtí húí gard kí mánind kar diyá; Maiṉ ne un ko galí kúchoṉ kí kíchaṛ kí tarah nikál pheṉká.

43Tú ne mujhe qaum ke jhagṛoṉ se bhí chhuṛáyá: Tú ne mujhe qaumoṉ ká sardár banáyá hai: Jis qaum se maiṉ wáqif bhí nahíṉ, wuh merí mutí‘ hogí.

44Merá nám sunte hí wuh merí farmánbardárí kareṉge: Pardesí mere tábi‘ ho jáeṉge.

45Pardesí murjhá jáeṉge, Aur apne qil‘oṉ se thartharáte húe nikleṉge.

46Ḳhudáwand zinda hai; merí chaṭán mubárak ho; Aur merá naját denewálá Ḳhudá mumtáz ho:

47Wuhí Ḳhudá jo merá intiqám letá hai, Aur ummatoṉ ko mere sámne zer kartá hai.

48Wuh mujhe mere dushmanoṉ se chhuṛátá hai, Balki tú mujhe mere muḳhálifoṉ par sarfaráz kartá hai: Tú mujhe tundḳhú ádmí se riháí detá hai.

49Is liye, ai Ḳhudáwand, maiṉ qaumoṉ ke darmiyán terí shukrguzárí Aur tere nám kí madhsaráí karúṉgá.

50Wuh apne bádsháh ko baṛí naját ‘ináyat kartá hai, Aur apne mamsúh Dáúd aur us kí nasl par Hamesha shafaqat kartá hai.

← Chapter 17 Jump to: Chapter 19 →