Psalms 119

Tshivenda (BIVHILI KHETHWA Mafhungo Madifha)

← Chapter 118 Jump to: Chapter 120 →

1Vha na mashudu vho faraho nḓila i sa solisei, vha tevhedza mulayo wa Muṋe washu.

2Vha na mashudu vha no vhulunga nyeletshedzo dzawe, vha ḓidinela Ene nga mbilu yoṱhe.

3A vha tshinyi, vha tshimbila nḓilani dzawe.

4Wo vhea ndaela dzau, wa ri dzi tevhelwe nga vhuronwane.

5Ngavhe ndi tshi tevhedza zwe wa vhofha ndi sa tseki!

6Arali milayo yau nda i dzhiela nzhele, ndi hone ndi sa ḓo shona.

7Ndi ḓo guda pfanelo dze wa vhea dzi sa khakhi, nda u renda nga mbilu yo ṱambaho.

8Ndi ḓo tevhedza zwe wa vhofha; yawee, u songo nṱamba tshoṱhe!

9Mutuka a nga swiela hani nḓila yawe naa? Ndi nga u tevhedza zwine wa amba.

10Nṋe ndi ḓo ḓidinela Iwe nga mbilu yoṱhe; nndededze ndi si pambuwe milayoni yau.

11Ipfi ḽau ndi ḓo ḽi vhulunga mbiluni yanga, uri ndi si vhuye nda u khakhela na kathihi.

12Nga hu rendwe Iwe Muṋe washu! Mpfunze u tevhedza zwe wa vhofha.

13Pfanelo dzoṱhe dze wa vhea ndi dzi ḓivhadza nga mulomo wanga.

14Ndi takalela u tevhedza nyeletshedzo dzau unga muthu a tshi takalela lupfumo lunzhi.

15Ndi ḓo dzula ndi tshi elekanya ndaela dzau, nda sedza nḓila dzau.

16Ndi ḓo ḓiphiṋa nga u tevhedza zwe wa vhofha, ipfi ḽau ndi nga si ḽi hangwe.

17Ntonde nṋe mulanda wau, ndi tshile ndi tshi tevhedza ipfi ḽau.

18Mmbonyolose, ndi vhone maanḓa a kanukisaho a mulayo wau.

19Nṋe ndi mudali fhano shangoni, u songo nnzumbela milayo yau.

20Mbilu yanga i tou swa nga tshiṱuvho, i swela u tevhedza pfanelo dze wa vhea i sa fhidzi.

21Iwe u kaidza vhadzia-u-ḓihudza, vho teketelwa, vho nyadza pfanelo dze wa vhea.

22Nṱanzwe maṱamba avho na luswetho, hufha ndi tshi tevhedza nyeletshedzo dzau.

23Naho vhavhusi vha dzula vha nndangana, nṋe mulanda wau ndi ḓo dzula ndi tshi elekanya milayo yau.

24Nṋe ndi takalela nyeletshedzo dzau, ndi vhone vhaeletshedzi vhanga.

25Ndo tsumbudzwa buseni, dovha u nṋee maanḓa unga wo amba.

26Ndo u vhudza zwi nndemelaho, wa mphalala; mpfunze u tevhedza zwe wa vhofha.

27Ndi tama hani u ṱalukanya ndaela dzau, uri ndi dzule ndi tshi elekanya mishumo yau i kanukisaho!

28Ndi lala ndo donola maṱo nga u ḽa mbilu; nkhwaṱhise unga wo mpfulufhedzisa.

29Ntsendedze kule na vhufhura, u ntonde nga u mpfunza mulayo wau.

30Ndo ḓinangela u tshila nga u fulufhedzea, ndo ṱanganedza pfanelo dze wa vhofha.

31Muṋe washu, ndi nambatela nyeletshedzo dzau; u songo vhuya wa ntshonisa.

32U nnyengedza ṱhalukanyo; ndi ḓo tevhedza milayo yau nga mbilu yoṱhe.

33Muṋe washu, mpfunze u tevhedza zwe wa vhofha, ndi hone ndi tshi ḓo zwi vhulunga nda ṱhaphudza.

34Nṋee ṱhalukanyo, ndi kone u vhulunga mulayo wau, ndi u tevhedze nga mbilu yanga yoṱhe.

35Nnyendedze nḓilani ya milayo yau, ndi a i takalela!

36Tshingamisela mbilu yanga kha nyeletshedzo dzau, hu si kha u ḽeledza vhaṅwe.

37Sudzulusa maṱo anga kha zwi si na mushumo, u nnyendedze, ndi kone u tshila.

38Khunyeledza zwe wa mpfulufhedzisa, wa zwi fulufhedzisa na vhoṱhe vhane vha u ofha.

39Ndi ofha u nyadziwa, ntinyise hone; pfanelo dze wa vhofha dzo naka hani!

40Ndi ṱuvha hani u ita zwe wa laya! Nṋee vhutshilo, hufha u tshi fulufhedzea.

41Ntonde Muṋe washu, hufha lufuno lwau lu sa dzinginyei, ntshidze unga wo mpfulufhedzisa.

42Ndi hone ndi tshi ḓo kona u fhindula vha sa nkhumeli; nṋe ndi fulufhela ipfi ḽau.

43U songo vhuya wa tenda ndi tshi litsha u amba ngoho; ndo ḓiimisela u tevhedza pfanelo dze wa vhofha.

44Ndi ḓo dzula ndi tshi vhulunga mulayo wau lini na lini.

45Ndi ḓo tshila ndo vhofholowa tshoṱhe, nge nda tevhedza ndaela dzau nga vhuronwane.

46Ndi ḓo ḓivhadza mahosi nyeletshedzo dzau, a thi nga vhuyi nda shona.

47Milayo yau ndi a i funa, ndi tou ḓiphiṋa ngayo.

48Ndi a i hulisa, a thi i funi zwone, ndi dzula ndi tshi elekanya zwe wa vhofha.

49Elelwa zwe wa mmbudza; zwo ita uri ndi u fulufhele.

50Zwe wa mpfulufhedzisa zwo nṋea vhutshilo, ndi zwone zwi mphumulaho miṱodzi.

51Naho vhadzia-u-ḓihudza vha sa nngoḓi zwone, nṋe a thi pambuwi mulayoni wau.

52Muṋe washu, ndi tshi elekanya pfanelo dze wa vhea kale na kale, ndi rudza mbilu.

53Ndi tou nga ndi sa balea ndi tshi vhona vhavhi vha tshi nyadza mulayo wau.

54Ndo sika nyimbo dzi no renda zwe wa vhofha, ndi tshi kha ḓi tshila fhano shangoni.

55Na vhusiku ndi elelwa dzina ḽau, Muṋe washu, uri ndi vhulunge mulayo wau.

56Zwe nda ḓowela ndi u vhulunga ndaela dzau.

57Muṋe washu, a hu na tshithu tshi ntakadzaho arali e si Iwe; ndi fulufhedzisa u vhulunga maipfi au.

58Ndo u luvhelela nga mbilu yoṱhe; nkhathutshele unga wo amba.

59Ndi tshi elekanya zwine nda ḓo ita, ndi ḓiimisela u ita zwe wa nnyeletshedza.

60A thi ongolowi u tevhedza milayo yau, ndi a ṱavhanya.

61Nangwe vhavhi vho ntanda nga thambo, a thi hangwi mulayo wau.

62Vhukati ha vhusiku ndi a vuwa nda u renda, ndi tshi elekanya pfanelo dze wa vhofha, dzi sa khakhi.

63Ndi konana na vhoṱhe vhane vha u ofha, vha vhulunga ndaela dzau.

64Muṋe washu, ḽifhasi ḽo ḓala lufuno lwau; mpfunze zwe wa vhofha.

65Muṋe washu, wo ntonda unga wo amba.

66Mpfunze, ndi vhe na nḓivho na ṱhalukanyo, nṋe ndi fulufhela milayo yau.

67Zwiḽa ndi sa athu pfiswa vhuṱungu ndo vha ndi tshi ḓi pambuwa, huno zwino ndi vhulunga ipfi ḽau.

68U na vhuthu, u ita zwivhuya; mpfunze u tevhedza zwe wa vhofha.

69Naho vhadzia-u-ḓihudza vha tshi ri ndi mudzia-u-zwifha, nṋe ndi vhulunga ndaela dzau nga mbilu yanga yoṱhe.

70Naho vhone vhe na mbilu ya mbwane, nṋe ndi ḓiphiṋa nga mulayo wau.

71Ndo ita zwone nda tambudzwa; zwo nngudisa zwe wa vhofha.

72Mulayo une wa vhea u tou vha dzanga kha nṋe; ú fhira vhunzhi ha musuku na siliva.

73Ndo itwa nga zwanḓa zwau, ndi zwone zwo mmbumbaho; mphe ṱhalukanyo ndi kone u guda milayo yau.

74Vhane vha u ofha vha ḓo mmbona vha takala, nge nda fulufhela ipfi ḽau.

75Muṋe washu, ndi a ḓivha uri khaṱhulo dzau a dzi khakhi; u tshi mpfisa vhuṱungu zwo vha zwo tea.

76Ngavhe lufuno lwau lu tshi mphumula miṱodzi, unga wo mpfulufhedzisa.

77Nkhathutshele ndi kone u tshila; nṋe ndi ḓiphiṋa nga mulayo wau.

78Ngavhe vhadzia-u-ḓihudza vha tshi shoniswa nge vha nkhakhela ndi si na mulandu; nṋe tshanga hu ḓo vha u elekanya ndaela dzau.

79Ngavhe vhane vha u ofha vha tshi ima na nṋe, vhone vhane vha ḓivha nyeletshedzo dzau.

80Ngavhe mbilu yanga i sa pfuki zwe wa vhofha, ndi sa ḓo shoniswa.

81Ndo no tou ṋoka nga u lindela u tshidzwa nga Iwe, huno ndo fulufhela ipfi ḽau.

82Maṱo anga o neta nga u lavhelela zwe wa mpfulufhedzisa, ndi ri, “U ḓo mphumudza lini?”

83Naho ndo onyana unga mukumba u vhutsini, thi hangwi zwe wa vhofha.

84Ndi ḓo lindela u swika lini? Vha ntovholaho u ḓo vha lifhedza lini?

85Vhadzia-u-ḓihudza vhane vha landula mulayo wau, vha a mmveela khunḓa.

86Milayo yau yoṱhe i na ngoho; mpfarise, vhathu vha khou ntovhola ndi si na tshe nda tshinya.

87Vho ṱoḓou nthutha fhano shangoni, naho zwo ralo a tho ngo furalela ndaela dzau.

88Ntshidze u tshi itela lufuno lwau, ndi kone u tevhedza nyeletshedzo dzau.

89Muṋe washu, ipfi ḽau ḽo ṱoka midzi ḽiṱaḓulu, a ḽi tseki lini na lini.

90U fulufhedzea hau hu vhonala kha mirafho na mirafho; wo sika ḽifhasi ḽa ḓi ima ḽo ralo.

91Zwithu zwoṱhe zwo ḓi raḽa na ṋamusi nge wa ri zwi ralo; zwoṱhe zwi pfi zwi shumele Iwe.

92Arali ho vha hu si u ḓiphiṋa nga mulayo wau, ndo vha ndi tshi ḓo ri u tambudzwa nda lovha.

93Thi nga vhuyi nda hangwa ndaela dzau; ndi dzone dzo ntshidzaho.

94Ntshidze, ndi muthu wau, ndi ṱoṱoredza ndaela dzau.

95Vhavhi vho nndalela uri vha mmbulahe, hone nṋe ndi tevhedza nyeletshedzo dzau.

96Zwoṱhe zwine ha pfi zwo khunyelela, na u khunyelela házwo ndi vhona zwi tshi guma, hone milayo yau yo ṱanḓavhuwa u pfuka ndinganyo, a i gumi.

97Mulayo wau ndi u funa hani! Ḓuvha ḽoṱhe ndi elekanya wone fhedzi.

98Milayo yau i nṱalifhisa nda fhira maswina anga; ndi dzula ndi nayo.

99Ndi ṱalukanya u fhira vhafunzi vhanga vhoṱhe, nge nda dzula ndi tshi elekanya nyeletshedzo dzau.

100Vhunga ndi tshi vhulunga ndaela dzau nḓivho yanga i fhira ya ṱhoho tshena.

101Ndi tata u fara nḓila yo vhifhaho; tshanga ndi u vhulunga ipfi ḽau.

102Thi pambuwi kha pfanelo dze wa vhea, hufha wo mpfunza.

103Maipfi au ha nnḓifheli zwone, a ḓifha u fhira mutoli.

104Ndaela dzau dzi nṋea ṱhalukanyo, ndi zwine nda vhenga nḓila dzoṱhe dza magombikwa.

105Ipfi ḽau ḽi vhonetshela hune nda tshimbila, ḽa vha luvhone nḓilani yanga.

106Ndo ana nda khwaṱhisa, nda ri ndi ḓo vhulunga pfanelo dzau dzi sa khakhi.

107Ndo tambudzwa nda zwi pfa; Muṋe washu, ntshidze unga wo amba.

108Muṋe washu, ngavhe nduvho yanga ya tshirendo i tshi u takadza, u mpfunze u tevhela pfanelo dze wa vhea.

109Naho ndi tshi dzula ndi khomboni ya lufu, a zwi nndini, mulayo wau a thi u hangwi.

110Naho vhavhi vho nthetshela tshikwekwe, a thi pambuwi kha ndaela dzau.

111Nyeletshedzo dzau ndi ifa ḽanga ḽa lini na lini, ndi dzone dzi takadzaho mbilu yanga.

112Ndo ḓiimisela u ita zwe wa vhofha, nda vhuya nda fa.

113Ndi nyala vhathu vha no nga muya wa murwelahoṱhe, tshanga ndi u funa mulayo wau.

114Iwe u vhudzumbamo hanga, u tshiṱangu tshanga; ndi fulufhela ipfi ḽau.

115Inwi vhavhi, nṱutsheleni, ndi kone u vhulunga milayo ya Mudzimu wanga!

116Ntike unga wo mpfulufhedzisa, ndi hone ndi tshi ḓo tshila; ndi songo shoniswa nga zwe nda fulufhela.

117Ntike ndi tshile, ndi dzule ndi tshi vhulunga zwe wa vhofha.

118U landula vhoṱhe vhane vha nyadza zwe wa vhofha; vhumbulu havho a vhu farisi tshithu.

119Vhavhi vhoṱhe vha ḽifhasi u vha laṱa unga malambelo, zwenezwo nṋe ndi funa nyeletshedzo dzau.

120Muṱoḓo wanga u a tumuwa nga u ofha Iwe; ndi ofha khaṱhulo dzau.

121Ndo ita zwi re zwone, zwo teaho; u songo nkovhela vha nkandeledzaho.

122Nnyimelele, u songo tenda vhadzia-u-ḓihudza vha tshi ntambudza.

123Maṱo anga o neta nga u dzula ndo donolela u tshidzwa hanga nga Iwe, ndó lavhelela zwe wa mpfulufhedzisa, hufha u tshi fulufhedzea.

124Hufha lufuno lwau lu sa dzinginyei, ntonde, u mpfunze u tevhedza zwe wa vhofha.

125Nṋe ndi mulanda wau, mmbonetshele ndi ṱalukanye nyeletshedzo dzau.

126Muṋe washu, mulayo wau wo pfukiwa, tshifhinga tshau tsha u lifhedza tsho swika.

127Ndi funa milayo yau u fhira musuku, musuku u songo vangwaho.

128Thi vhuyi nda pambuwa kha ndaela dzau, ndi vhenga nḓila dzoṱhe dza magombikwa.

129Nyeletshedzo dzau dzi takadza hani! Ndi zwine nda dzi vhulunga.

130Maipfi ane wa bula a a vhonetshela, vha shayaho nḓivho a vha funza u ṱalukanya.

131Ndi tou femeleka nga u takalela milayo yau.

132Nndavhelese u nkhathutshele, sa zwine wa ḓi ita kha vhane vha u funa.

133Nndededze ndi si pambuwe kha zwe wa amba; u songo vhuya wa tenda ndi tshi vhuswa nga vhuvhi.

134Ntshidze zwanḓani zwa vha nkandeledzaho, ndi kone u vhulunga ndaela dzau.

135Ngavhe u tshi nndavhelesa nga vhuthu, wa mpfunza u ita zwe wa vhofha.

136Maṱo anga a tou shuluwa nga u vhona vhathu vha sa vhulungi mulayo wau.

137Muṋe washu, a u na tshiṱalula, khaṱhulo dzau a dzi khakhi.

138Wo vhea milayo yau nga nḓila yo teaho, i fulufhedzea tshoṱhe.

139Ndi ḽa mbilu nda fhelela nga u vhona maswina anga a sa londi maipfi au.

140Zwe wa amba zwo wanala zwi ngoho fhedzi, ndi zwi funa hani!

141Naho ndi si tshithu, ndi tshi nyadzea, a thi hangwi ndaela dzau.

142Iwe u ḓi dzula u tshi fulufhedzea lini na lini; mulayo wau ndi wa ngoho.

143Naho ndo welwa nga zwi ofhisaho, ndi ḓi ḓiphiṋa nga milayo yau.

144Nyeletshedzo dzau a dzi khakhi lini na lini; mpfunze u dzi ṱalukanya, ndi kone u tshila.

145Ndi khou u vhidzelela nga mbilu yanga yoṱhe; Muṋe washu, mphindule, ndi ḓo vhulunga zwe wa vhofha.

146Ndi u ṱavhela mukosi, ntshidze, ndi ḓo konou ita zwe wa nnyeletshedza.

147Ndi vuwa nda u ṱavhela mukosi mapfuvhi a sa athu tswuka, nda lindela phindulo yau.

148Ndi lala ndo donola maṱo vhusiku hoṱhe, nda elekanya zwe wa fulufhedzisa.

149Lufuno lwau a lu dzinginyei, ipfa ipfi ḽanga! Muṋe washu, ntshidze, hufha u tshi fulufhedzea.

150Vha ntovholaho lu shonisaho ngevha, vha vho ṱoḓou nkhovha! Vha nyadza mulayo wau.

151A vha Iwe Muṋe washu, u tsini hanga, milayo yau yoṱhe ndi ya ngoho.

152Ndi kale ndo guda nyeletshedzo dzau, wo dzi tetshela lini na lini.

153Edzou sedza u vhone u shengedzwa hanga – a u nndamukisi? Hufha mulayo wau ndi sa u hangwi.

154Ntsengele u mmbofholole; ntshidze unga wo mpfulufhedzisa.

155U tshidzwa hu kule na vhavhi; a vha londi zwe wa vhofha.

156Muṋe washu, u na khathutshelo i si na vhukono; ntshidze nga khaṱhulo yau i sa khakhi.

157Maswina anga ane a ntovhola ndi manzhi, huno nṋe a thi pambuwi kha nyeletshedzo dzau.

158Zwifheṱi zwi a nnengisa, vha nyadza zwine wa amba.

159Muṋe washu, edzou vhona uri ndaela dzau ndi dzi funa hani; lufuno lwau a lu dzinginyei, ntshidze!

160Ngoho ndi yone tshivhindi tsha mulayo wau; khaṱhulo dzau dzi sa ṱaluli ndi dza lini na lini.

161Vhavhusi vha ntovhola ndi si na tshe nda tshinya; hone tshine mbilu yanga ya tshi ofha ndi ipfi ḽau.

162Ndi takalela ipfi ḽau, nda nga o thubaho lupfumopfumo.

163Ndi vhenga vhufhura nda tou vhu nengwa, mulayo wau wone ndi a u funa.

164Ndi u renda kaṱanu-na-kavhili nga ḓuvha, ndi tshi itela khaṱhulo dzau dzi sa ṱaluli.

165Vha funaho mulayo wau vha na mulalo vhukuma, a hu na tshine tsha vha khukhula.

166Ndo lindela u tshidzwa nga Iwe, Muṋe washu, ndi tevhedza milayo yau.

167Nyeletshedzo dzau ndi dzi funa u pfuka ndinganyo; ndi a dzi thetshelesa.

168Ndi tevhedza ndaela dzau na nyeletshedzo dzau; Iwe u ḓivha nḓila dzanga dzoṱhe.

169Muṋe washu, ngavhe tshililo tshanga tshi tshi swika ha Iwe! Nṋee ṱhalukanyo unga wo amba.

170Ngavhe khumbelo dzanga dzi tshi swika ha Iwe! Ntshidze unga wo amba.

171Ndi ḓo u fhululedza nga wanga mulomo; u mpfunza zwe wa vhofha.

172Lulimi lwanga lu ḓo imba ipfi ḽau; milayo yau yoṱhe ndi ya ngoho.

173Ngavhe tshanḓa tshau tshi tshi mpfarisa; ndi tevhedza ndaela dzau.

174Ndo ṱulutshela u tshidzwa nga Iwe, Muṋe washu; ndi tou ḓiphiṋa nga mulayo wau.

175Ngavhe ndi tshi tshila, nda konou u renda; khaṱhulo dzau ngavhe dzi tshi ntika.

176Ndi tendeleka unga nngu yo xelaho; iḓa u nṱoḓe, milayo yau a thi i hangwi.

← Chapter 118 Jump to: Chapter 120 →