1 Kings 8 — Makhuwa VMK (Emakhuwa Bible)

1Vano mwene Salomoni aawiitthana oYerusaleemu asitokweene ootheene a aYixrayeli; asitokweene ootheene a ipuumba sa oYixrayeli ni mapwattapwattha ootheene a oYixrayeli weera yaakuxe oSiyoni, esidade ya Davide, Arka* a Wiiraana a Yave.

6Vahoolowaya asaserdoti* yaahaakuxasa Arka* a Wiiraana a Yave yaaroihaka vanipuroniwaya mukwartuni wa mpuwaxa, eyo tiiyo Nipuro Nootteelaxa*, enawiikaathi owaathi maphupa a akerubini*.

7Mapupha ookungeyeene a akerubini* yaakuttelela Arka*, ni Arka* ni ikopo yaakuxeriwaayano.

8Ikopo iye saari soorakama omakoteloniwaya waamooneya weemenleene hata ohoolo wa Nipuro Nootteelaxa*, mene khawooneyaru mpatta wa omokoni wa Empa ya Yave. Vano iye sookhala mpaka olelo.

9Kheeyamomo etthu mwarkani* sihikhanle itthaabwa piili sa maluku Moisesi iikaathiyaawemo oHorebi, mwa weiwo Yave aapankaawe wiiraana ni aYixrayeli vahoolo wa okhumawaya wExipitu.

10Asaserdoti* evenyaka Nipuro Nootteelaxa*, nihutte naasareya Mpaani mwa Yave

11moota wooweera asaserdoti* khayaawenre okwanihera mitekosaya niwoko na nihutte weenre ovuwa wa Yave wasareya Mpaanimwawe.

12Vanonto Salomoni aaheera: “Yave eenre weera onookhala munihutteni nooriipaxa.

13Vekhaikhai kohootekelani Empa etokotoko weera mmakemo, nipuro muneeraanyu mukhaleke mahuku ootheene.”

14aYixrayeli ootheene ethukumanneene yeemelelo, mwene aarukunuwa, anaareeliha,

15eeraka: “Atthapeliwe Yave, Muluku a oYixrayeli. Owo aakwanihera ni matataawe yeeyo aaroromelinghaawe atithaka Davide ni eyaanowaawe eenraawe:

16‘Okhuma nihuku nne kaakhuminghaaka mulokwaaka aYixrayeli wExipitu, nkithanlaleru naari esidade emoha variyari wa ipuumba sa oYixrayeli weera kitekelemo empa Nsinanaka, mene koomuthanla Davide weera alamule mulokwaaka.’

17Atithaka Davide yannatthunaxa oteka Empa ettittimiherelaka Nsina na Yave, Muluku a aYixrayeli.

18Wa soothesene, Yave aaweerela atithaka Davide: ‘Moopaka nnene wookhalano muupuwelo vamurimani okitekela empa muttittimiherelaka Nsinanaka.

19Vaheera khamuhiyono nyuwo muneera muteke, mene mwaninyu mulopwana xaxaxa – ti yoowo aneera atekele Empa Nsinanaka.’

20Yave ookwanihera yoororomelihaawe – miyo ti namarandela a Davide ni vano kookilaathela ehice ya emwene wa aYixrayeli, ntoko Yave aaroromelinghaawe, ni kootekela Empa Nsina na Yave, Muluku a aYixrayeli.

21Koohiyamo nipuro noowiikaathi Arka* mwa mwemmo siraayamo itthaabwa sa Wiiraana wa Yave, wiiraanawene weiwe aapakenlaawe makholowaahu aakhumingheene wExipitu.”

22Vano Salomoni aaheemela ohoolo wa altaari* a Yave vamaithoni wa muthukumano wootheene, anatheteela matataawe wiirimu,

23anavekela: “Ii! Yave, Muluku a aYixrayeli, khoowowo muluku mukina onlikana ni Nyuwo wiirmu hata elapo ya vathi. Nyuwo mookwanihera wiiraanawanyu wa osivela ni arumeiyaanyu, mwa yaawo anoorumeelani ni murima wootheene.

24Mookwanihera yoororomelihaanyu wa murumeiyaanyu Davide, atithaka. Mwaaroromeliha ni eyanowaanyu ni mookwanihera ni matataanyu – ntoko onooneyaaya olelo.

25Vano, Yave, Muluku a aYixrayeli, mukwanihere yoororomelihaanyu wa murumeiyaanyu Davide, atithaka mweenraanyu: ‘Anamwaniinyu yiipasoopa nnenesene weera yeette mphironimwaka ntoko mweenttaanyu, munookhalano namarandela anaalamule aYixrayeli vamaithoniwaka wa mahuku ootheene.’

26Vano Muluku a aYixrayeli, yeeyo mwaamuroromelinghaanyu murumeiyaanyu Davide, atithaka, ekwaniheriweke.

27Woohihovela Yave khamaka elapo ya vathi ela. Muluku ti Mutokweene woopwahaxa wiirimu ni mapuro a musulusulu. Wootepaxa Empa ela kitenkaaka!

28Hata hiiho, Yave, Mulukwaaka, mwiiwe nivekelo na murumeiyaanyu ni yoovekaawe ya ikharari. Mwiiwe okhuwela ni nivekelo murumeiyaanyu ompakaawe vamaithoniwanyu olelo.

29Ngwehe Empa ela ohiyu ni othana, niwoko nri nipuro nyuwo mweenraanyu: ‘Nsinanaka nnookhalamo.’ Mahuku ootheene mwiiweke mavekelowaaka ankhuma mu.

30Mwiiwe mavekelo a murumeiyaanyu ni a mulokwaanyu aYixrayeli, awo yaavekelaka mu. Wiirimu iwo mwiiwe munkhalaanyuwo ni mwiiwaka, mulevelele.

31Mulopwana amutthekela mukhwaawe, anamunyesereriha olipela, anaphiya ohoolo wa altaaraanyu* Mpaanimwanyumu,

32vano mwiiwe wiirimu ni mwaakhuleke. Muthanleke variyari wa arumeiyaanyu, munthorihaka yoowo orino nthowa munttaruxelaka yoonanara opankaawe. Mumpakele ekhaikhai yoowo oohinthowa, mooniheraka hiiho weera khanono mulattu.

33Mulokwaanyu aYixrayeli waawiniwaka ni amwiittanaaya niwoko na wootthekelani Nyuwo, owo wahokoleela wa Nyuwo wiitthanaka Nsinananyu, ovekelaka ni odyoonttelelaka Mpaanimwanyumu,

34vano mwiiwe wiirimu ni mulevelele soottheka sa mulokwaanyu aYixrayeli ni muhokoloxere elapo mwaavanghaanyu makholowaaya.

35yaahiyaka orupa epula, enathowa maahi niwoko na wootthekelani mulokwaanyu, ni owo warwa wa nipuro nna wiitthanaka Nsinananyu ohiyaka sootthekasaya niwoko na ottaruxawanyu,

36vano mwiiwe wiirimu ni mulevelele soottheka sa arumeiyaanyu aYixrayeli, mulokwaanyu. Muxuttihe ephiro ya ekhaikhai, murumihele epula elapwaanyu ela mvanghaanyu mulokwaanyu ntoko yoohiyeriwa.

37Yaavolaka etala hoye hoye nihooxo mweelaponi, hata soowaaliwa suuma niwoko na oviha, naari aaphiyaka nasope hoye hoye axiitthu akina hoye hoye mwiittana mukina awanano musidadenimwaya emoha – nakhalaru nihooxo hoye hoye iretta –

38ni mukina a mulokwaanyu aYixrayeli avekela hoye hoye adyoonttelela ni murima woosareya othananaxa, anatheteya matataawe Mpaanimwanyumu,

39vano mwiiwe wiirimu munkhalaanyuwo ni mulevelele. Mumvahe khula mutthu yeeyo omphwanelaawe, niwoko Nyuwo munsuwela mirima sa atthu ootheene. Aani ti Nyuwo paahi munsuwela murima wa khula mutthu.

40Hiiho awosa anoowoovani mahuku ootheene eneeraaya ekhale mweelaponi mwaavanghaanyu makholowaahu.

41Anamarwa mwa yaawo ahikhanle mpatta wa mulokwaanyu aYixrayeli yarwa elapo ya ottaiwene niwoko na Nsinananyu,

42ni niwoko noowiiwa sa Nsinananyu ntokotoko, soopakasanyu ni owerawanyu, yarwa ovekela Mpaanimwanyumu,

43vano mwiiwe wiirimu munkhalaanyuwo ni mukwanihere yeeyo namarwa aneeraawe oovekeleni weera miloko sootheene sa elapo ya vathi sisuwele Nsinananyu ni siwooveeni, ntoko mulokwaanyu aYixrayeli, ni weera sisuwele weera Empaanyu ela kootekenlaakani yookhalano Nsinananyu.

44Mulokwaanyu warowa waawanano amwiittanaaya yakhalaru mapuro muntthunaanyu weera orowe ni woovekelani Nyuwo ohokoleela esidade ela muthanlalaanyu ni wa Empa ya Yave kitekenlaaka Nsinananyu,

45vano mwiiwe wiirimu nivekelonaya ni odyoonttelelawaya, mwaakihaka mulattwaaya.

46Onoowereya aYixrayeli wootthekelani, niwoko khaawo ohinttheka. Yootthekelani, Nyuwo munimwaanyoonyeriwa ngwinnyereraka mmatatani mwa amwiittana weera yaavare ootthukiweene yaaronghaka elapwaaya – ekhalaka ya ottai hoye hoye ya vakhiviru.

47Vano mweelaponi ya otthukiwawaya awosa yawuupuwelelani erukunxaka murima yoodyoonttelelakaniwo: ‘Noottheka, noopaka yoonanara neettaka ntoko anamatakhala.’

48Awosa yoohokoleelani Nyuwo ni mirimasaya ni okumaaya wootheene mweelaponi ya amwiittanaaya, mwa yaawo yaakunxe ootthukiweene, ni yoovekelani Nyuwo ohokoleela elapo ela mwaavanghaanyu makholowaaya ni wa esidade muthanlalaanyu ni Empa ya Yave kitekenlaaka Nsinananyu,

49vano mwiiwe wiirimu munkhalaanyuwo nivekelonaya ni odyoonttelelawaya, mwaakihaka mulattwaaya.

50Mulevelele mulokwaanyu wootthekenleni; mulevelele soonanara sootheene woopakenlaayani ni muceendye mirima sa amwiittanaaya weera emorele ikharari.

51Muupuwelele weeratho ti mulokwaanyu ni yoohiyeraanyu mwa yoowo mukhumihalalaanyu wExipitu, mmavihoni.

52Maithwaanyu ewehawehe mavekelo a murumeiyaanyu ni a mulokwaanyu aYixrayeli ni Ngwiiweke yaawo yoodyoonttelelakani.

53Vano ti Nyuwo Yave Muluku muthanlale variyari wa miloko sootheene sa elapo ya vathi weera okhale yoohiyeraanyu, ntoko mweenraanyu mwa murumeiyaanyu Moisesi, mwaakhumihaleene makholowaahu wExipitu.”

54Salomoni amalihakaru soovekela ni soodyoonttelela sootheene iye wa Yave, aaheemela ohoolo wa altaari* a Yave, mwa weiwo aakokhonraawe atheteelaka matataawe wiirimu.

55Aaheemela, anareeliha muthukumano wootheene, akhuwelaka:

56“Yave atthapeliwe, mwa Yoowo ovanghe mulokwaawe aYixrayeli wiitthuuwa, ntoko aaroromelinghaawe. Ookwanihera soororomeliha sooreera sootheene aavanghaawe mwa murumeiyaawe Moisesi.

57Yave Mulukwaahu akhaleke ni hiyo ntoko aaraawe ni makholowaahu; Owo ahinihiye naari ahinithaame.

58Owo aceendye mirimasahu weera neette ntoko ontthunaawe ni niiwelele malamulowaawe, ikanosawe ni soolamulasawe aavanghaawe makholowaahu.

59Masu ala kivekenlaaka vamaithoni wa Yave ekhaleke vakhiviru wa Yave Mulukwaahu ohiyu ni othana weera alipihere mulattu wa murumeiyaawe ni mulokwaawe aYixrayeli ntoko sootthuneya sa khula nihuku.

60Hiiho miloko sootheene sa elapo ya vathi sinoosuwela weera Yave ti Muluku ni khoowowo muluku mukina.

61Ontthuneya weera mirimasanyu sikhaleke sa Yave Mulukwaahu. Mwiiwelele ikanosawe ni malamulowaawe mahuku ootheene ntoko mumpakaanyu olelo.”

62Vahoolowaya mwene ni aYixrayeli ootheene yaapaka sooveleela vamaithoni wa Yave.

63Salomoni aampakela sooveleelela murettele Yave – imombe 22 000 ni ikhondoolo ni ipuri 120 000. Hiiho mwene ni aYixrayeli ootheene yaari vaavaale yaatteeliha Empa ya Yave.

64Nihuku nenenenne mwene aatteeliha mpatta wa nipuwa ohoolo wa Empa ya Yave anapakawo sooveleela soohisa, sa etrigu ni sooneneva sa sooveleelela murettele, niwoko altaari* a ebronze* ohoolo wa Yave yaayevaxa, ohikwanaka opakelawo sooveleela soohisa, sa etrigu ni sooneneva sa sooveleelela murettele sootheene.

65Mweehuhuni yeele Salomoni ni aYixrayeli ootheene aapaka efesta. Waakhala muthukumano mutokotoko; atthu yaarwa okhuma oLebo-Hamati mpaka nxaapwa na wExipitu. Yaapaka efesta vamaithoni wa Yave Mulukwaahu wa mahuku muloko ni maxexe.

66Oxaawaya Salomoni aalamulela muloko ohokoleela mmawannyaaya. Muloko waamureeliha mwene, onarowa woohakalaleene mmirimanimwaya niwoko na itthu sooreera sootheene Yave aampakenlaawe murumeiyaawe Davide ni wa mulokwaawe aYixrayeli.