Luke 22

kangri

1अखमीरी रोटिया दा त्योहार जेह्ड़ा फसह दे नांऐ जाणेयां जांदा ऐ, नेड़े था;

2कने प्रधान याजक कने सास्त्री इस सोच बचारे च रैंह्दे थे कि यीशुये जो किंआं जान्नी ते मारन, अपर सैह़ लोकां ते डरदे थे।

3ताह़लू सैतान यहूदा च समाईया, जेह्ड़ा इस्करियोती नांऐ ते जाणेयां जांदा था कने यीशुये दे बारांह चेलेयां च गिणेयां जांदा था।

4तिन्हीं जाई नैं प्रधान याजकां कने अधिकारियां नैं गल्ल-बात कित्ती कि यीशुये जो किंआं तिन्हां दे हुआलैं करैं।

5सैह़ खुस होये, कने तिसियो पैसे दैणे दा वादा कित्ता।

6तिन्हीं मन्नी लेआ, कने मौका तोपणा लग्गा कि जाह़लू भीड़ ना होयैं तां यीशुये जो तिन्हां दे हुआलैं करी दिंगा।

7ताह़लू अखमीरी रोटिया दे त्योहारे दा दिन आया, जिस च फसह दा मेम्ना बल़ि चढ़ाणा जरूरी था।

8यीशुयैं पतरसे नैं कने यूहन्ने जो एह़ ग्लाई नैं घल्लेया, “जाई नैं अहां दे खाणे तांई फसह त्यार करा।”

9तिन्हीं तिसते पुछया, “तू अहां ते फसह दी त्यारी कतांह करवाणा चांह़दा ऐ, कि अहां त्यार करन?”

10तिन्हीं तिन्हां नैं ग्लाया, “दिक्खा, सैहरे च पुज्जदे ई इक्क माणु पांणिये दा घड़ा लेई नैं चलेया तुहां जो मिलगा; जिस घरे च सैह़ जां तुहां तिसदे पचांह़ चली जान्नेयों,

11कने तिस घरे दे मालके नैं ग्लाणा, कि ‘गुरू तिज्जो नैं ग्ला दा ऐ कि सैह़ कमरा कुत्थू ऐ जिस च मैं अपणे चेलेयां सौगी फसह खां?’

12सैह़ तुहां जो इक्क सज्जियो सज्जाइयो बौड़ दस्सगा; तित्थु ई त्यारी करनेयों।

13तिन्हां जाई नैं, जिंआं यीशुयैं तिन्हां जो ग्लाया था, तिंआं ई होएया कने फसह दा खाणा त्यार कित्ता।”

14जाह़लू बग्त आई रेह्आ, तां सैह़ खास बारांह चेलेयां सौगी खाणा खाणे बैठा।

15कने तिन्हीं तिन्हां नैं ग्लाया, “मिन्जो बड़ी लालसा थी कि दुख झेलणे कने मरने ते पैहल्लैं एह़ फसह दी धाम तुहां सौगी खां।

16क्जोकि मैं तुहां नैं ग्लांदा ऐ, कि जाह़लू तिकर सैह़ परमात्मे दे राज्जे च पूरा नीं होयैं, ताह़लू तिकर मैं फसह दिया धामा जो कदी नीं खांगा।”

17ताह़लू तिन्हीं अंगूरा दे रसे दा कटोरा लेई नैं परमात्मे धन्यावाद कित्ता कने ग्लाया, “इसियो लेआ कने अप्पु च बंडी लेआ।

18क्जोकि मैं तुहां नैं ग्लांदा ऐ कि जाह़लू तिकर परमात्मे दा राज्ज नीं औयें ताह़लू तिकर मैं अंगूरा दा रस अज्जे ते बाद कदी नीं पींगा।”

19भिरी तिन्हीं रोटी लेई, कने परमात्मे दा धन्यावाद करी नैं तोड़ी, कने तिन्हां जो एह़ ग्लाई नैं दित्ती, “एह़ रोटी मेरा सरीर ऐ, जेह्ड़ा तुहां तांई दित्ता जांदा ऐ, मेरिया यादा तांई ऐई करा-करा।”

20इस तरीके नैं तिन्हीं खाणे ते बाद अंगूरा दे रसे दा कटोरा भी एह़ ग्लाई नैं दित्ता, “एह़ अंगूरा दे रसे दा कटोरा मेरे तिस खूने च जेह्ड़ा तुहां तांई बहाया जांदा ऐ, नौआं वादा ऐ।

21अपर दिक्खा, मेरे पकड़ुआणे आल़े दा हत्थ मिन्जो सौगी खाणा खा दा ऐ।

22क्जोकि मैं माणुये दा पुत्तर तां जिंआं तिस तांई ठैहराया गेआ ऐ, तिस बग्त जाणा ई ऐ, अपर हाय तिस माणुये पर जिसदिया बज़ाह ते सैह़ पकड़ुआया जांदा ऐ।”

23ताह़लू सैह़ अप्पु च पुछणा लग्गे कि अहां च कुण ऐ, जेह्ड़ा एह़ कम्म करगा।

24तिन्हां च एह़ बैंह्स भी होई तिन्हां च बड़ा कुण समझेया जांदा ऐ।

25तिन्हीं तिन्हां नैं ग्लाया, “होरनी जाति दे राजे तिन्हां पर हकुमत करदे हन; कने जेह्ड़े तिन्हां पर हक्क रखदे हन, सैह़ भलाई करणे आल़े नांऐ ते जाणे जांदे हन।

26अपर तुहां ऐदेय मत हुंदे; अपर जेह्ड़ा तुहां च बड्डा ऐ, सैह़ लोक्के साइआं कने जेह्ड़ा प्रधान ऐ, सैह़ दासे साइआं बणैं।

27क्जोकि बड्डा कुण ऐ, सैह़ जेह्ड़ा खाणा बैठेया ऐ, या सैह़ जेह्ड़ा सेवा करदा ऐ? क्या सैह़ नीं जेह्ड़ा खाणा बैठेया ऐ? अपर मैं तुहां बिच्च दासे साइआं ऐ।

28“तुहां सैह़ हन, जेह्ड़े मेरिया परीक्षा दे बग्त लगातार मिन्जो सौगी रैह्;

29कने जिंआं मेरे पितैं मेरे तांई इक्क राज्ज ठैहराया ऐ, तिंआं ई मैं तुहां तांई ठैहरांदा ऐ,

30तांजे तुहां मेरे राज्जे च मेरी मेज्जे पर खांगे-पींगे, अपर सिंहासणे पर बेई नैं इस्राएल देसे दे बारांह गोत्रां दा न्याय करा।

31“शमौन, हे शमौन। सुण, सैताने तुहां लोकां जो मंगी लेआ ऐ तांजे कणका साइआं फटके।

32अपर मैं तिज्जो तांई परमात्मे नैं विणती कित्ती, कि तेरा बसुआस मिन्जो ते चली नीं जां; कने जाह़लू तू मने बदलें तां अपणे भाऊआं जो भी मिन्जो पर बसुआस करणे तांई मजबूत कर।”

33तिन्हीं यीशुये नैं ग्लाया, “हे प्रभु, मैं तिज्जो सौगी जेला च जाणे जो कने मरने जो भी त्यार ऐ।”

34यीशु ग्लाणा लग्गा, “ओ पतरसा, मैं तिज्जो नैं ग्लांदा ऐ कि अज्ज कुक्ड़े दे बांग दैंणे ते पैहल्लैं तैं त्रै बरी मिन्जो पणछैणने ते मुकरना कि तू मिन्जो नीं जाणदा।”

35भिरी यीशुयैं अपणे चेलेयां नैं ग्लाया, “जाह़लू मैं तुहां जो बटुए, कने झोल़ी, कने जूते बगैर परमात्मे दा सुसमाचार लोकां जो सणाणे तांई घल्लेया था, तां क्या तुहां जो कुसी चीज्जा दी कमी होई थी?”

36तिन्हीं तिन्हां नैं ग्लाया, “अपर हुण लोक अहां दे बरोध च हन, तां जिस अल्ल बटुआ होयैं सैह़ तिसियो लैं, कने तिंआं ई झोल़िया भी लैं कने जिस अल्ल तलवार ना होयैं, सैह़ अपणे कपड़े बेची नैं खरीदी लैं।

37क्जोकि मैं तुहां नैं ग्लांदा ऐ, कि एह़ जेह्ड़ा पवित्रशास्त्रे च लिख्या ऐ। कने एह़ दस्सदा कि सैह़ अपराधियां सौगी गिणेयां गेआ, तिसदा मिन्जो च पूरा होणा जरूरी ऐ। क्जोकि मेरे बारे च लिखियां गल्लां पूरियां होणे पर हन।”

38तिन्हां ग्लाया, “हे प्रभु, दिक्ख, ऐत्थु दो तलवारा हन।” यीशुयैं तिन्हां नैं ग्लाया, “बड़ियां हन।”

39ताह़लू यीशु बाहर निकल़ी नैं, अपणी रीतिया मताबक जैतून दे प्हाड़े पर गेआ, कने चेले तिसदे पचांह़ चली पै।

40तिसा जगाह पुजी नैं यीशुयैं तिन्हां नैं ग्लाया, “प्रार्थना करा कि तुहां परीक्षा च नीं पोन।”

41भिरी यीशु अपणे चेलेयां ते लगभग तीई मीटर दूर गेआ, कने गोड्डेयां भार बेई नैं प्रार्थना करणा लग्गा,

42“हे पिता, जे तू चां तां इस दुखे दे बग्ते जो मिन्जो ते दूर करी दे, भिरी भी मेरी नीं अपर तेरी ई इच्छा पूरी होयैं।”

43ताह़लू सुअर्गे ते इक्क सुअर्गदूत तिसियो दुस्सेया जेह्ड़ा तिसियो सामर्थ दिंदा था।

44सैह़ बड़िया मुसीबता ते व्याकुल होई नैं होर भी जोरे नैं प्रार्थना करणा लग्गा; कने यकिन करा कि तिसदा पसीना खूने दियां बड्डियां-बड्डियां टिप्पियां साइआं धरतिया पर पेआ।

45ताह़लू सैह़ प्रार्थना ते उठेया कने अपणे चेलेयां अल्ल आई नैं तिन्हां जो उदासी दे मारे सुतेया दिख्या,

46कने यीशुयैं तिन्हां नैं ग्लाया, “क्जो सुतेयो हन? उठा, प्रार्थना करा कि परीक्षा च ना पोन।”

47सैह़ एह़ ग्ला दा ई था कि इक्क माणुआं दी भीड़ आई, कने तिन्हां बारांह चेलेयां च इक्क जिसदा ना यहूदा था तिन्हां गांह-गांह ओआ दा था। सैह़ यीशुये दा पुक्का लैणे तांई तिस अल्ल आया।

48यीशुयैं तिस नैं ग्लाया, “हे यहूदा, क्या तैं पुक्का लेई नैं माणुये दे पुत्तरे जो धोखे नैं पकड़ुआणा आया ऐ?”

49तिसदेयां साथियां कने जाह़लू दिख्या कि क्या होणे आल़ा ऐ, तां ग्लाया, “हे प्रभु, क्या अहां तलवार चलान?”

50कने तिन्हां च इक्की महायाजके दे दासे पर तलवार चलाई नैं तिसदा सज्जा कंन्न बड्डी दित्ता।

51इसा गल्ला पर यीशुयैं ग्लाया, “हुण बस करा।” कने तिसदा कंन्न छुई नैं तिसियो ठीक कित्ता।

52ताह़लू यीशुयैं प्रधान याजकां कने मंदरे दे चौकीदारां दे सरदारां कने स्याणेयां यहूदी नेतेयां नैं, जेह्ड़े तिस पर चढ़ी आएयो थे, ग्लाया, “क्या तुहां मिन्जो डाकू समझी नैं तलवारां कने डांगा लेई करी पकड़णा निकल़ेयो हन?

53जाह़लू मैं मंदरे च हर दिन तुहां सौगी था, तां तुहां मिन्जो पर हत्थ नीं पाया; अपर एह़ तुहां दा बग्त ऐ, कने नेहरे दा हक्क ऐ।”

54भिरी सैह़ यीशुये जो पकड़ी करी लेई चल्ले, कने महायाजके दे घरेयो लेई गै। कने पतरस डरदा-डरदा तिसदे बड़ी पचांह़ चलेया था;

55कने जाह़लू सैह़ अँगणे च अग्गी सल़गेरी नैं किठ्ठे बैठे, तां पतरस भी तिन्हां बिच्च बेई गेआ।

56कने ताह़लू इक्क दासिया तिसियो अग्गी दिया लौई च बैठेयो दिक्खी नैं कने तिसदे पास्से ताक्की नैं ग्लाणा लग्गी, “एह़ भी तां तिस सौगी था।”

57अपर तिन्हीं एह़ ग्लाई नैं ना कित्ती, “हे नारी, मैं तिसियो नीं जाणदा।”

58थोड़िया देरा बाद कुणकी होरनी भी तिसियो दिक्खी नैं ग्लाया, “तू भी तां तिन्हां च ऐ।” पतरसैं ग्लाया, “हे माणु, मैं नीं ऐ।”

59कुच्छ घंटे बाद इक्क होर माणु बसुआसे नैं ग्लाणा लग्गा, “पक्का एह़ भी तां तिस सौगी था, क्जोकि एह़ गलीली माणु ऐ।”

60पतरसैं ग्लाया, “हे माणु, मैं नीं जाणदा कि तू क्या ग्ला दा ऐ।” सैह़ ग्ला दा ई था कि तिस बग्त ई कुक्ड़ैं बांग दित्ती।

61ताह़लू प्रभुयैं पचांह़ मुड़ी नैं पतरसे पास्से दिख्या, कने पतरसे जो प्रभु दी सैह़ गल्ल याद आई जेह्ड़ी तिन्हीं ग्लाईयो थी, “अज्ज कुक्ड़े दे बांग दैणे ते पैहल्लैं, तैं त्रै बरी मिन्जो पणछैणने ते मुकरना।”

62कने सैह़ बाहर निकल़ी नैं अखीं भरी-भरी नैं रोणा लग्गा।

63जिन्हां माणुआं यीशुये जो पकड़ेया था, सैह़ तिसियो मजाक करी नैं मारणा-कुटणा लग्गे;

64कने तिसदियां अखीं ढक्की नैं तिसते पुछया, “हे गुरू भविष्यवाणी करी नैं दस्स कुणी मारेया।”

65कने तिन्हां मतिआं होर भी निंदा दियां गल्लां तिसदे खलाफ ग्लाईयां।

66जाह़लू दिन होएया तां लोकां दे स्याणे कने प्रधान याजक कने सास्त्री किठ्ठे होये, कने तिसियो अपणिया महासभा च अंणी करी पुछया,

67“जे तू मसीह ऐ, तां अहां नैं ग्लाई दे।” तिन्हीं तिन्हां नैं ग्लाया, “जे मैं तुहां नैं ग्लां, तां तुहां बसुआस नीं करणा

68जे पुछैं, तां तुहां जवाब नीं दैणा।

69अपर हुण ते मैं माणुये दा पुत्तर सर्वशक्तिमान परमात्मे दी सज्जे पास्से बैठेया रैंह्गा।”

70इसा गल्ला पर सारेयां ग्लाया, “तां क्या तू परमात्मे दा पुत्तर ऐ?” तिन्हीं तिन्हां नैं ग्लाया, “तुहां अप्पु तां ग्लांदे हन, क्जोकि मैं ऐ।”

71ताह़लू तिन्हां ग्लाया, “हुण अहां जो होर गवाहिया दी क्या जरूरत ऐ; क्जोकि अहां अप्पु तां तिसदे मुँऐ ते सुणी लेआ।”

← Chapter 21 Jump to: Chapter 23 →