1 Corinthians 1

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

Jump to: Chapter 2 →

1𠊎係保羅；對上帝个旨意，𠊎蒙召做基督耶穌个使徒。𠊎㧯所提尼兄弟，

2寫信仔給在哥林多城上帝个教會。你等㧯在逐所在求喊𠊎等主耶穌基督个名个人，共樣係在基督耶穌底背神聖、蒙召做聖徒來歸屬上帝个。基督係佢等个主，也係𠊎等个主。

3願𠊎等个阿爸上帝㧯主耶穌基督賜恩典、平安給你等。

4𠊎常常為你等感謝𠊎个上帝，因為佢通過基督耶穌賜恩典給你等，

5使你等在基督底背逐方面富足，也盡有智識㧯口才。

6有關𠊎為基督所做个見證，已經堅立在你等个當中，

7所以，在等𠊎等个主耶穌基督顯現个時，你等一樣恩賜也無少。

8主一定會堅固你等到底，使你等在𠊎等个主耶穌基督降臨該日無好嫌。

9上帝係信實可靠个；佢呼召你等，使你等同佢个孻仔 — 𠊎等个主耶穌基督共下享受團契个生活。

10兄弟姊妹啊，𠊎奉𠊎等个主耶穌基督个名勸你等：大家愛講一樣个話，毋好分裂；愛團結，想法㧯目標愛共樣。

11𠊎个兄弟姊妹啊，有女信徒革來屋下該兜人識㧯𠊎講，你等中間有相爭。

12𠊎个意思係，你等一儕講一樣。有人講「𠊎屬保羅」；有人講「𠊎屬亞波羅」；有人講「𠊎屬彼得」；有人講「𠊎屬基督」。

13基督卻被你等分做幾下析！敢係保羅代你等釘死在十字架頂嗎？你等敢係奉保羅个名領洗禮嗎？

14𠊎感謝上帝，除了基利司布㧯該猶，𠊎並無為你等中間个一儕行洗禮，

15所以，無人能講，你等係奉𠊎个名領洗禮个。

16(還有，𠊎也為司提法那㧯厥屋下个人行過洗禮，其他還為麼人行過洗禮，𠊎就毋記得了。)

17基督派𠊎，毋係愛𠊎行洗禮，係愛𠊎傳福音，毋用人類智慧个言論，免得基督在十字架頂个死失效。

18因為基督死在十字架頂个道理，對該兜向滅亡行等去个人來看，係戇檔个；總係對𠊎等得救个人來講，係上帝个大能。

19因為聖經講：𠊎愛除滅聰明人个智慧；𠊎也愛廢掉學者个學問。

20聰明人在㖠位呢？學者在㖠位呢？世間个辯論家在㖠位呢？上帝已經使這世間个智慧成做戇檔了！

21上帝照自家个智慧，使世間人無法度用自家个智慧來認識佢；顛倒，上帝決定愛通過𠊎等所傳、人看做「戇檔」个道理來拯救相信个人。

22猶太人求神蹟，希臘人尋智慧，

23總係𠊎等傳釘死在十字架頂个基督。這個道理，對猶太人來看係絆腳石，對外邦人來看係戇檔；

24總係上帝選召个人，無論係猶太人抑係外邦人，對佢等來講，基督係上帝个大能，係上帝个智慧。

25因為，「上帝个戇檔」贏過人个智慧；「上帝个軟弱」也贏過人个堅強。

26兄弟姊妹啊，愛記得上帝呼召你等个時，你等个情形係樣般。照人个看法，你等有智慧个毋多，有能力个毋多，社會地位高个也毋多。

27總係，上帝偏偏揀選世間人看做無智慧个，來使有智慧个人見笑；上帝揀選世間人看做軟弱个，來使堅強个人見笑。

28上帝也揀選世間人所看輕、所惱、看做小可个，來廢掉該兜人看做重要个，

29使所有个人在上帝个面前誇口毋得。

30係上帝使你等有好同基督耶穌結連，又使佢成做𠊎等个智慧；通過佢，𠊎等同上帝有正確个關係，成做上帝聖潔个子民，也得到自由。

31就像聖經所講：「愛誇口个人，就愛誇口主。」

Jump to: Chapter 2 →