1 John 1

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

Jump to: Chapter 2 →

1𠊎等寫這封信仔來對你等講論該對太初就存在个生命之道。這生命之道，𠊎等識聽過，也親眼看過；毋單淨看過，也親手摸過。

2這生命出現个時，𠊎等有看到；所以，𠊎等對你等做見證，並傳揚該永遠个生命，就係原來同天頂个阿爸共下、也識對𠊎等顯現个。

3𠊎等將所看到、所聽到个這下也傳給你等，好使你等分享𠊎等个團契；這團契就係𠊎等同天頂个阿爸㧯佢个孻仔耶穌基督共有个。

4𠊎等寫這兜係愛俾𠊎等大家个歡喜得到圓滿。

5這下𠊎等愛將對上帝个孻仔所聽到个道理傳給你等：上帝係光，佢完全無烏暗。

6恁樣，若係𠊎等講𠊎等同佢有團契个關係，總係還生活在烏暗中，𠊎等就係講花撩，無實行真理。

7顛倒，若係𠊎等生活在光明中，像上帝在光明中，𠊎等就彼此有團契个關係，佢个孻仔耶穌个血也洗淨𠊎等一切个罪。

8若係𠊎等講自家無罪，就係欺騙自家，真理無在𠊎等个底背。

9若係𠊎等對上帝認罪，佢係信實又公義个，佢會赦免𠊎等个罪，洗淨𠊎等一切个不義。

10若係𠊎等講自家無犯過罪，𠊎等就係看上帝做講花撩个，佢个道就無在𠊎等个底背了。

Jump to: Chapter 2 →