1 John 4

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 3 Jump to: Chapter 5 →

1親愛个朋友啊，一切个靈，你等毋好全部相信，一定愛察驗該兜靈係毋係對上帝來个，因為已經有盡多个假先知逐所在出現。

2你等愛樣般認出係上帝个靈呢？麼人公開承認耶穌基督係成做肉身來个，麼人就有對上帝來个靈。

3麼人毋公開承認耶穌，佢就無對上帝來个靈；佢所有个係該隻敵基督个靈。你等有聽過這個靈愛來，這下已經在世間了。

4親愛个子女啊，你等係屬上帝个，也已經贏過假先知了，因為在你等底背个靈比屬世界个人底背个靈較有力量。

5該兜假先知講論世間个事，世間人聽從佢等，因為佢等係屬世界个。

6總係，𠊎等係屬上帝个。認識上帝个人就聽從𠊎等；毋屬上帝个人就毋聽從𠊎等。照這點，𠊎等知愛樣般認出真理个靈㧯錯誤个靈。

7親愛个朋友啊，𠊎等愛彼此相惜，因為愛心係對上帝來个。該有愛心个，係上帝所𫱔个，也認識上帝。

8該無愛心个，毋識上帝，因為上帝就係愛。

9上帝差派佢獨一个孻仔到世間來，使𠊎等通過佢得到生命；上帝用恁樣來顯明佢惜𠊎等。

10這就係愛：毋係𠊎等敬愛上帝，係上帝惜𠊎等，差派佢个孻仔，為到𠊎等犧牲，贖𠊎等个罪。

11親愛个朋友啊，既然上帝恁惜𠊎等，𠊎等也應該彼此相惜。

12無人見過上帝，總係𠊎等若彼此相惜，上帝就在𠊎等个生命底背，佢个痛惜在𠊎等个當中就完全實現了。

13上帝將佢个靈賜給𠊎等，因為恁樣，𠊎等知𠊎等在佢个生命底背，佢也在𠊎等个生命底背。

14天頂个阿爸差派佢个孻仔來做世界个救主；這係𠊎等所看到、所見證个。

15麼人公開承認耶穌係上帝个孻仔，上帝就在佢个生命底背，佢也在上帝个生命底背。

16所以，𠊎等知，也相信，上帝惜𠊎等。上帝就係愛；生命肚有愛心个人就在上帝个生命底背，上帝也在佢个生命底背。

17恁樣，愛就在𠊎等个當中完全實現，使𠊎等在審判該日好膽無驚；因為𠊎等在世間有同基督共樣个生命。

18在愛底背無驚；完全个愛心能逐走一切个驚。所以，會驚个人就係無完全个愛心，因為驚㧯刑罰係連做一下个。

19𠊎等愛，因為上帝先惜𠊎等。

20若有人講「𠊎敬愛上帝」，還怨恨自家个兄弟姊妹，佢就係講花撩个人；佢既然毋惜該看得到个兄弟姊妹，就無法度敬愛該看毋到个上帝。

21這係𠊎等對基督所領受个命令：敬愛上帝个，也應當惜兄弟姊妹。

← Chapter 3 Jump to: Chapter 5 →