1 Thessalonians 1

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

Jump to: Chapter 2 →

1𠊎係保羅；𠊎同西拉㧯提摩太寫信仔給帖撒羅尼迦教會，就係屬阿爸上帝㧯主耶穌基督个眾信徒。願你等大家得到恩典㧯平安！

2𠊎等一直為到你等大家感謝上帝，在祈禱中常常提起你等，

3在𠊎等阿爸上帝个面前，一直紀念你等樣般將所信个實行出來，樣般用愛心辛苦工作，又樣般堅持對𠊎等主耶穌基督个盼望。

4兄弟姊妹啊，𠊎等知上帝痛惜你等，揀選了你等。

5𠊎等將這福音傳給你等，毋係單靠話語，同時也係靠聖靈个能力㧯對福音个確信。你等知，在你等該位个時，𠊎等个生活係樣般；一切个所做攏總係為到你等个好處。

6你等有效法𠊎等，也效法主；雖然你等堵到大苦難，還係用聖靈所賜个歡喜來領受真道。

7因為恁樣，你等成做馬其頓㧯亞該亞所有信徒个模範。

8主个真道毋單淨對你等該位傳到馬其頓㧯亞該亞，你等對上帝有信心个消息也傳到遠近逐所在；毋使𠊎等加講麼介。

9該兜人攏總恁樣傳講：在𠊎等訪問你等个時，你等樣般接待𠊎等；你等樣般棄絕偶像，歸向上帝，來事奉又生又真个上帝，

10同時，等候佢个孻仔對天頂降臨。這個孻仔係上帝使佢對死復活个耶穌；佢救𠊎等脫離將來會臨到个上帝个大發譴。

Jump to: Chapter 2 →