1 Thessalonians 3

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 2 Jump to: Chapter 4 →

1𠊎等既然忍毋住了，就決定自家留在雅典，

2派𠊎等个兄弟提摩太去你等該位；佢係𠊎等个同工，為上帝傳基督个福音。𠊎等派佢去个目的係愛堅固㧯幫助你等个信心，

3使你等毋會有人因為受迫害來搖動。你等知，這迫害也係𠊎等定著愛經歷个。

4同你等共下个時，𠊎等輒輒先㧯你等講，𠊎等會堵到迫害。這個事正經就發生；這係你等所知个。

5因為恁樣，𠊎正派提摩太去；𠊎實在忍毋住了。𠊎派佢去，係愛知你等个信心到底樣般。𠊎驚怕你等已經被魔鬼迷惑，𠊎等个勞碌變無採工！

6這下，提摩太已經對你等該位轉來了。佢帶轉關係你等个信心㧯愛心个好消息。佢講，你等常常思念𠊎等，迫切希望見到𠊎等，像𠊎等迫切希望看到你等一樣。

7所以，兄弟姊妹啊，𠊎等在一切患難㧯困苦之中，因為你等个信心就得到鼓勵。

8既然你等對主有堅定个信心，𠊎等就毋使愁到會死。

9這下，𠊎等做得盡量為到你等感謝𠊎等个上帝。𠊎等感謝佢，因為你等使𠊎等在佢面前得到歡喜。

10𠊎等日夜對佢迫切祈求，俾𠊎等會有好親身去看你等，來補滿你等信心个需要。

11願上帝 — 𠊎等在天頂个阿爸㧯𠊎等个主耶穌親自開路，俾𠊎等會有好去到你等該位。

12願主使你等有彼此相惜㧯惜眾人个心，日日增長，像𠊎等恁惜你等一樣。

13恁樣，佢會堅定你等个心，在𠊎等个主耶穌㧯所有屬佢个人降臨个時，使你等在𠊎等个阿爸上帝面前成做聖潔，無好嫌。

← Chapter 2 Jump to: Chapter 4 →