2 Kings 20

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 19 Jump to: Chapter 21 →

1該時，希西家王病到會死。亞摩斯个孻仔先知以賽亞去見王，對佢講：「上主恁樣講：『你愛留遺言、交帶後事，因為你个病毋會好，一定會死。』」

2希西家翻身面向壁，祈禱講：

3「上主啊，求你紀念𠊎識誠心誠意事奉你，做你看做著个事。」希西家忍毋住就開聲大噭。

4以賽亞出來，還吂行過王宮中央个庭院，上主㧯佢講：

5「你轉到吾子民个領袖希西家該位，對佢講：『上主 — 若祖先大衛个上帝恁樣講：𠊎已經聽到你个祈禱，也看到你个目汁。𠊎愛醫好你；到第三日，你就會上聖殿去。

6𠊎愛俾你食加十五年。𠊎也愛拯救你㧯耶路撒冷脫離亞述皇帝个手；為到𠊎自家个緣故，也為到吾僕人大衛个緣故，𠊎愛親自保護這城。』」

7以賽亞對王个僕人講：「拿一垤無花果膏藥來！貼在粒仔頂，王就會好。」

8希西家問以賽亞講：「有麼介兆頭證明上主愛醫治𠊎，到第三日𠊎就會上聖殿去呢？」

9以賽亞應講：「這係上主給你个兆頭，來證明佢一定會成就佢所講个：你愛日頭影向前十步，抑係倒退十步呢？」

10希西家講：「日頭影向前十步容易，𠊎愛它倒退十步！」

11先知以賽亞向上主祈禱，上主就使亞哈斯王日晷个日頭影倒退十步。

12這時，巴拉但个孻仔巴比倫王米羅達‧巴拉但聽到希西家王發病，特別送來問安信㧯禮物。

13希西家歡迎使者，又向佢等展佢所有个財富 — 金、銀、香料、香水、㧯武器倉庫；佢將全國逐所在个寶庫㧯佢王宮肚所有个全部俾佢等看。

14事後，先知以賽亞去見希西家王，問佢：「這兜人對㖠位來？佢等㧯你講麼介？」希西家應講：「佢等係對一個當遠个國家巴比倫來个。」

15以賽亞問：「佢等在王宮肚看到麼介？」希西家應講：「𠊎所有个，佢等全部看到；𠊎將寶庫个各樣東西全部給佢等看。」

16所以，以賽亞對希西家講：「你愛聽上主个話：

17『時間一定會到，你王宮肚所有个東西，㧯若祖先留下來个逐項東西，全部會被人搬到巴比倫去，無留半項。』這係上主講个。

18『連你个後代有兜也會被人捉去，在巴比倫王宮肚做太監。』」

19希西家想，這預言係講到在佢還生个日仔，佢還做得享受和平㧯安全，所以佢應以賽亞講：「你所傳上主个話當好！」

20希西家其他个事，佢英勇个行為㧯佢樣般作陂塘，挖圳溝，俾水透到城肚个事，全部記在《猶大列王史》底背。

21希西家死掉；厥孻仔瑪拿西承接佢做王。

← Chapter 19 Jump to: Chapter 21 →