2 Kings 6

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 5 Jump to: Chapter 7 →

1有一日，以利沙所帶領个一群先知對佢發怨言講：「看哪，𠊎等㧯你所住个地方忒狹了！

2請准𠊎等到約旦河滣頭，逐儕取一枝樹料轉來，另外起一間屋仔。」以利沙講：「好，你等去！」

3佢等當中有一儕請以利沙㧯佢等共下去，以利沙就答應佢。

4所以佢等共下去，到約旦河，大家就開始斬樹仔。

5有一儕斬樹仔个時，斧頭𢫫掉，跌落水肚。佢向以利沙喊講：「慘了！先生，樣般好呢？該斧頭係㧯人借个！」

6神人以利沙問佢：「斧頭跌落㖠位？」該人就指給佢看。以利沙斬一枝樹仔，㧹落水肚，斧頭就浮起來。

7以利沙講：「拿起來啊！」該人就伸手將斧頭拿起來。

8敘利亞王㧯以色列人相㓾。佢㧯官員參詳，選某一個地方安營。

9神人以利沙派人去㧯以色列王警告講：「你愛細膩，毋好對該位過，因為敘利亞人埋伏在該位。」

10所以以色列王就派人到神人警告佢等个地方去，加強防備。共樣个事發生好多擺。

11敘利亞王為這事發閼；佢就召集官員，問佢等：「你等當中有麼人向以色列王走漏消息？」

12其中一個講：「國王，毋係𠊎等。係以色列个先知以利沙講个；佢將你在間肚講个話全部㧯以色列王講。」

13王下令講：「去查佢在㖠位；𠊎愛派人去捉佢！」有人㧯王講以利沙在多坍。

14王就派大軍隊、戰馬㧯戰車去該位；佢等半夜去到，黏時就將該城包圍起來。

15第二日打早，以利沙个僕人䟘起來到屋外去，看到敘利亞人个軍隊並佢等个戰馬㧯戰車將城圍困。佢就喊：「壞了！先生，𠊎等慘了。愛樣般好呢？」

16以利沙講：「毋使驚！㧯𠊎等共下个比㧯佢等共下个還較多。」

17然後佢祈禱講：「上主啊，求你開佢个目珠，使佢看得到！」上主聽以利沙个祈求。以利沙个僕人就看到滿山有火馬㧯火戰車圍等以利沙。

18敘利亞人打過來个時，以利沙祈禱講：「上主啊，求你使該兜人个目珠看毋到！」上主聽以利沙个祈禱，使佢等目珠看毋到。

19然後以利沙到佢等該位講：「你等行毋著路了；這毋係你等愛尋个城。跈𠊎來，𠊎帶你等到你等愛尋个人該位去。」以利沙就將佢等帶到撒馬利亞。

20佢等一入城，以利沙就祈禱講：「上主啊，求你開佢等个目珠，使佢等看得到。」上主聽以利沙个祈求，開佢等个目珠，佢等就看到自家在撒馬利亞城內。

21以色列王看到敘利亞人，就問以利沙：「阿爸啊，𠊎做得將佢等㓾掉麼？𠊎做得將佢等㓾掉麼？」

22以利沙講：「做毋得！就係你在戰場上捉到个兵仔也做毋得㓾。給佢等東西食，給佢等水啉；放佢等轉佢等个王該位去。」

23所以，以色列王為佢等準備當滂沛个桌席，等佢等食飽啉足，就俾佢等轉到敘利亞王該位。對這以後，敘利亞个軍隊無再侵犯以色列个土地。

24經過一段時間，敘利亞王便‧哈達召集全軍攻打以色列，圍困撒馬利亞城。

25結果，城內糧食缺乏，連驢仔个頭那也一隻值八十隻銀幣，野生个蔥仔兩百公克值五隻銀幣。

26一日，以色列王對城牆頂經過；有一個婦人家喊講：「國王啊，請幫助𠊎！」

27王講：「若係上主毋幫助你，𠊎能幫助你麼介？𠊎敢還有麥仔抑係酒係麼？

28你个困難係麼介？」該婦人家應講：「這婦人家對𠊎講：『今晡日先將若孻仔拿來食，天光日正食吾孻仔。』

29所以𠊎等將吾孻仔煮來食。第二日，𠊎對姖講：『輪到食若孻仔。』姖卻將厥孻仔囥起來！」

30王聽到這事，就扯裂衫；佢繼續在城牆頂行等過个時，人民看到佢底背著个係粗麻衫。

31王講：「𠊎今晡日毋將沙法个孻仔以利沙个頭那剁掉，願上帝嚴嚴責罰𠊎！」

32王就派人去捉以利沙。這時，以利沙堵好㧯來見佢个長老坐共下。王派來个人還吂到以前，以利沙對該兜長老講：「你等看，該隻兇手派人愛來斬𠊎个頭那了！佢到這位个時，你等愛關門，毋好俾佢入來。在佢後背敢毋係有王个腳步聲嗎？」

33以利沙話還吂講煞，王就到了。佢講：「這災禍係上主降給𠊎等个；𠊎做麼介還愛等上主个幫助呢？」

← Chapter 5 Jump to: Chapter 7 →