2 Peter 1

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

Jump to: Chapter 2 →

1𠊎係西門‧彼得，耶穌基督个僕人㧯使徒。𠊎寫信仔給該兜通過𠊎等个上帝㧯救主耶穌基督个義，同𠊎等得到共樣寶貴信仰个人：

2願你等通過認識上帝㧯𠊎等个主耶穌得到豐豐富富个恩典㧯平安！

3上帝已經用佢神聖个能力，將𠊎等過敬虔生活所需要个一切賜給𠊎等了；這個恩賜係通過認識該呼召𠊎等來分享佢自家个榮光㧯良善个主來个。

4恁樣，佢將佢所應許最大㧯最寶貴个恩賜賜給𠊎等；通過這兜恩賜，你等就做得脫離世間毀滅性个慾望，來分享上帝个神性。

5為到這個緣故，你等愛盡力使你等在信心上加上美德，美德加上智識，

6智識加上節制，節制加上忍耐，忍耐加上敬虔，

7敬虔加上愛兄弟姊妹个情，愛兄弟姊妹个情又加上惜眾人个心。

8這兜係你等應該培養个德行，又日見日多；恁樣，你等就會還較有效、更加深刻認識𠊎等个主耶穌基督。

9總係，無這兜德行个人就係近視，甚至瞙目，毋記得自家往日个罪已經得到洗淨了。

10所以，兄弟姊妹啊，你等愛更加努力，使上帝个呼召㧯揀選成做你等永久个經驗；有這兜經驗，你等就毋會跌倒。

11恁樣，你等會領受充分个權利，有好進入𠊎等个主 — 救主耶穌基督永遠个國。

12所以，雖然你等已經知這兜事，也在所領受个真理上企到在在，𠊎還係愛一直提醒你等。

13𠊎想，𠊎還在世間一日，𠊎應當常常幫助你等記得這兜事。

14𠊎知，過無幾久，𠊎會脫離這會腐爛个身體；這係𠊎等个主耶穌基督指示𠊎个。

15𠊎愛想盡辦法使你等在𠊎離開世間以後還會常常記得這兜事。

16𠊎等以前將有關𠊎等个主耶穌基督个大能㧯再臨个事㧯你等講，並毋係根據該兜捏造出來無影無跡个傳說。𠊎等有親眼看過佢个偉大。

17佢對阿爸上帝接受尊貴㧯榮光个時，𠊎等也攏總在場。該時，至高榮光个上帝對佢講：「這係𠊎所惜个孻仔，𠊎所歡喜个。」

18𠊎等同佢共下在聖山頂高，親耳聽到這對天頂來个聲音。

19恁樣，𠊎等對眾先知所宣佈个話更加確信。你等愛好好留意這個話；因為它係像一盞明燈光照烏暗个所在，直到天光，到朝晨頭个星仔在你等心中發出光該日。

20最重要个一點，你等愛記得：聖經底背个預言，無一個係照自家个意思來解釋个；

21因為，從來無一個預言係對人个意思來个，其實係人受聖靈个感動將上帝个話傳出來个。

Jump to: Chapter 2 →