2 Peter 2

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 1 Jump to: Chapter 3 →

1頭擺有假先知在以色列民間出現；共樣，也會有假教師在你等中間出現。佢等會暗中帶入毀滅性个異端，甚至毋承認救贖佢等个主宰，盡遽就自取滅亡。

2雖然恁樣，還係有盡多人會跈佢等去行淫亂个事，致到真道因為佢等个行為受到譭謗。

3這兜假教師為到愛滿足自家个貪心，會用捏造个故事來騙你等个財物。自古以來，佢等个刑罰一直無延纏；佢等个滅亡必定遽遽來到！

4上帝並無饒該兜犯罪个天使，反轉將佢等㧒落地獄，關在烏暗中，等候審判。

5上帝也無饒上古个世代，反轉用大水浸死該兜心中無上帝个人，只有拯救傳揚正義个挪亞㧯其他七個人。

6上帝責罰所多瑪㧯蛾摩拉兩座城，降火將它兜燒掉，做毋敬虔个人个鑑戒。

7佢搶救好人羅得；羅得為到壞人个淫亂行為大大憂愁。

8該好人住在壞人中間，逐日看到又聽到該兜邪惡个事，心肝非常痛苦。

9主知愛樣般拯救敬虔个人脫離試煉，也知愛樣般將壞人拘留起來，特別係該兜放縱肉體个情慾、藐視上帝主權个人，好在審判該日刑罰佢等。這班假教師大膽、自傲，毋單淨毋尊敬該兜在天頂有榮光个，反轉侮辱佢等；

11連該兜力量㧯權能強過這班假教師个天使也無用侮辱个話在主个面前告佢等。

12總係，這班人像無靈性个禽獸，天生就係愛被人捉被人㓾个；佢等照本能去行，譭謗自家無了解个事。佢等會像禽獸共樣堵到毀滅。

13佢等多行不義，最後會食到不義个報應。對佢等來講，所謂快樂就係在光天白日之下滿足肉體个情慾。佢等非常屙糟㧯污穢！佢等同你等共桌食飯个時，就拿詭詐來準做快樂！

14佢等好色个目珠專看淫婦，犯罪个慾望一直無滿足。佢等誘惑軟弱个人；佢等習慣貪心；佢等係上帝所咒詛个人！

15佢等離開正路，行歪路，同比珥个孻仔巴蘭行共條路。巴蘭貪愛不義个錢財；

16因為自家所犯个罪受到責罰。毋會講話个驢仔竟然發出人个聲音來攔阻先知个戇檔。

17這兜人像燥掉个泉源，像暴風吹散个水氣；上帝為到佢等保留个地方係在烏暗个深淵底背。

18佢等講肨風个空話，用肉體个情慾誘惑該兜正對糜爛个生活中脫出來个人。

19佢等答應愛給人自由，自家反轉做腐敗生活个奴才；因為人被麼介制伏，就係麼介个奴才。

20若係人通過認識𠊎等个主 — 救主耶穌基督，脫離這世界腐敗个各種勢力，以後又被它兜捉去，被它兜制伏，這種人个結局就比先前還較慘。

21佢等知有正義个道路，還敢對佢等所承受該神聖个命令離開；這種人莫知有正義个道路還較贏。

22俗語講盡著：「狗仔回頭食牠所嘔出來个」；抑係「豬仔洗淨，又搵湳泥」。佢等个情形就像恁樣。

← Chapter 1 Jump to: Chapter 3 →