2 Timothy 1

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

Jump to: Chapter 2 →

1𠊎係保羅；𠊎奉上帝个旨意做基督耶穌个使徒，來宣佈上帝通過基督耶穌所應許个新生命。

2𠊎寫信仔給你 — 𠊎所親愛个孻仔提摩太：願阿爸上帝㧯𠊎等个主基督耶穌賜恩典、憐憫、平安給你！

3𠊎日夜祈禱个時，無一擺無想念你；想到你，𠊎就感謝上帝，就係𠊎同祖先共樣用清白个良心所敬拜个上帝。

4一想到離別个時你所流个目汁，𠊎就迫切想愛見你；看到你，𠊎正會滿心歡喜。

5𠊎記得你該種純真个信心；這信心先前在若姐婆羅綺㧯若姆友妮基个心肚；𠊎深信，這信心也在你个心肚。

6所以，𠊎提醒你：𠊎為你按手个時，上帝賜給你个恩賜，你愛使它像火恁樣𤏸下去。

7因為，上帝所賜給𠊎等个靈，毋係愛使𠊎等變無膽；顛倒，佢个靈會使𠊎等充滿力量、愛心、㧯節制。

8因為恁樣，為𠊎等个主做證這件事，你毋好看做見笑，也毋好因為𠊎為主个緣故成做囚犯來感覺見笑。你愛照上帝所賜个力量，為福音相共來分擔苦難。

9上帝拯救𠊎等，呼召𠊎等做佢聖潔个子民，並毋係𠊎等有麼介好行為，係因為佢个旨意㧯恩典。在萬世以前，佢已經通過基督耶穌將這恩典賜給𠊎等了；

10這下，通過𠊎等个救主基督耶穌个降臨，這恩典就顯明出來。基督已經毀滅死个權勢，通過福音將毋會滅亡个生命表明出來。

11為到這個福音，上帝指派𠊎做傳道人、使徒，㧯教師。

12所以，𠊎正會受到這兜苦難。總係，𠊎毋會感覺見笑，因為𠊎認識𠊎所信靠个上帝，也深信佢會保守佢所交託𠊎个，直到主再來該日。

13你愛堅持遵守對𠊎所學該健全个真道，看做規範，也愛堅持𠊎等同基督耶穌結連所得到个信心㧯愛心。

14你愛倚靠住在𠊎等內心个聖靈，好好保守所交託你个真道。

15你知，在亞細亞省个人全部離開𠊎，包含腓吉路㧯黑摩其尼。

16願主憐憫阿尼色弗一家；因為佢好多擺鼓勵𠊎，使𠊎心神爽快。佢無因為𠊎成做囚犯來感覺見笑，

17反轉，一到羅馬就熱心尋𠊎，直到尋到。

18願主在自家再來該日施恩，使佢得到上主个憐憫！佢在以弗所為𠊎做盡多事情，這係你清楚知个。

Jump to: Chapter 2 →