2 Timothy 2

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 1 Jump to: Chapter 3 →

1𠊎个孻仔啊，你愛通過基督耶穌所賜个恩典剛強起來。

2你在盡多證人面前對𠊎領受个教訓，你也應該交託給該兜你所信用又能教別人个人。

3身為基督耶穌个精兵，你愛相共來分擔苦難。

4一個當兵个人愛爭取長官个稱讚，就毋好俾營外个事情纏身。

5運動員比賽个時若無遵守規則，就毋使想愛得到獎賞。

6煞猛耕種个農夫應當先享受所收成个。

7你愛好好思想𠊎所講个話，因為主一定會使你明白一切事情。

8你愛記得耶穌基督；佢係大衛个後代，佢已經對死人中復活了；這就係𠊎所傳个福音。

9𠊎因為這福音受痛苦，甚至被人像囚犯恁樣䌈等；總係，上帝个話毋會被人䌈等。

10所以，𠊎為上帝所揀選个子民忍受這一切，好使佢等也會得到對基督耶穌來个拯救㧯永遠个榮耀。

11下背這站話係真實可信个：𠊎等若同佢共下死，就會同佢共下生。

12𠊎等若係忍耐到底，就會同佢共下掌權。𠊎等若係毋認佢，佢也會毋認𠊎等。

13𠊎等若係無信用，佢還係真實可信，因為佢毋會違背自家。

14你愛提醒大家，在上帝面前嚴嚴警戒佢等：毋好摳字眼；這係無利益个事，只會敗壞聽到个人。

15愛盡力在上帝面前做一個堪得考驗、毋會見笑个工人，正確講解上帝个真道。

16愛閃開無根無據个空談，因為這類个談論會害人離開上帝；

17佢等所講个係像毒瘡，緊遰緊大𣽛。這兜人當中，有許米乃㧯腓理徒；

18佢等離開真理，主張復活个事已經過掉了，害別人信心搖動。

19總係，上帝所立堅固个根基係毋會搖動个；在這地基頂高刻等：「主認識屬佢个人」，又刻等：「凡自認屬主个，一定愛棄絕邪惡。」

20每一個大家庭攏總有盡多器皿，毋單淨有金器銀器，也有樹仔个、缶仔个；有兜係為到貴重个用途，有兜係為到卑賤个用途。

21人若自潔，脫離一切卑賤个事，就會做貴重个器皿，成做聖潔，被主所用，來行各種个善事。

22你毋好像後生人恁樣憑情慾行事；愛同該兜心純潔，求主幫助个人相共追求正義、信心、愛心、並和平。

23愛棄絕該兜戇戇無知个辯論；你知，這種辯論常常會惹起冤家。

24主个僕人做毋得冤家；佢應該和和氣氣來對待眾人，認真教導人，存心忍耐，

25用溫柔勸話反對个人。或者上帝會給佢等悔改个機會，使佢等認識真理。

26恁樣，雖然魔鬼將佢等捉去，強迫佢等順服，佢等也可能會醒過來，對佢个羅網底背走出來。

← Chapter 1 Jump to: Chapter 3 →