Colossians 2

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 1 Jump to: Chapter 3 →

1𠊎希望你等知，為到你等㧯老底嘉人，並盡多𠊎還吂見過面个人，𠊎盡心盡力工作。

2𠊎个目的係愛大家得到鼓勵，用愛心來團結，滿有對真實个了解所帶來个信心，好認識上帝个奧秘；這奧秘就係基督本身。

3一切智慧㧯智識个寶貝全部囥在佢底背。

4𠊎講這兜話，免得有人用花言巧語來迷惑你等。

5雖然𠊎个身體無在你等該位，總係𠊎个心同你等共下。𠊎非常歡喜看到你等凡事照秩序，對基督个信仰也盡堅定。

6既然你等接受基督耶穌做主，你等愛同佢連結來行事，

7在佢底背釘根，建造，堅固信心；這係你等所領受个教訓。還有，你等也愛滿心感謝！

8你等愛細膩，毋好被麼人用虛空㧯欺騙个哲學所轄制。因為該種學理係照人个傳統；它个根源係宇宙間所謂星宿个神靈，毋係基督。

9因為上帝神性个豐盛成做形體住在基督底背，

10恁樣，你等同基督結連就得到豐盛个生命。佢係頭，超過一切靈界个執政者㧯掌權者。

11你等在基督底背已經受割禮；這割禮毋係人个手所行个，係基督除掉你等肉體个情慾所完成个割禮。

12因為，你等領洗禮个時，就係同基督共下埋葬；同時，因為上帝已經使基督對死復活，你等通過信上帝个大能也同佢共下復活了。

13頭擺，你等屬靈个生命係死个，因為你等有罪，又因為你等係無摩西法律个外邦人。總係，上帝使你等同基督共下再生過來。佢赦免𠊎等一切个過犯，

14取消該愛控告𠊎等、法律上䌈等𠊎等个犯罪記錄，將它釘在十字架頂廢掉。

15在十字架頂，基督親身除掉該兜靈界个執政者㧯掌權者个權勢，將佢等公開示眾，像被人捉來个敵人在勝利个遊行之中一樣。

16所以，毋好俾人在飲食、節期、初一，抑係安息日這兜問題頂高用規則來䌈等你等。

17這一切不過係未來事情个影定定；基督正係本體。

18毋好俾該兜堅持表面謙卑㧯拜天使个人害到，使你等失掉得到獎賞个機會。佢等自誇有特別个異象，就照自家个妄想，無緣無故來自高自大，

19切斷佢等同基督个關係。基督就係身體个頭；佢使全身得到滋養，關節㧯筋骨互相連絡，照上帝个旨意來長大。

20既然你等同基督共下死，脫離該兜星宿个神靈，你等做麼介還同世俗个人共樣恁樣生活，繼續守該兜「毋好動，毋好嘗，毋好摸」个禁忌呢？

22該兜禁忌所講到个東西一使用就敗壞了；因為禁忌係對人个規則㧯教訓來个。

23恁樣看起來，照自家个意思敬拜、表面謙卑、㧯肉身个苦修等等，當像盡有智慧；其實，對制伏肉體个情慾係無麼介效果个。

← Chapter 1 Jump to: Chapter 3 →