Colossians 3

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 2 Jump to: Chapter 4 →

1你等已經同基督共下復活，你等就定著愛追求天頂个事；在該位，基督坐在上帝正片个寶座上。

2你等愛專心天頂个事，毋係地上个事。

3因為你等已經同基督共下死，你等个生命同佢共下囥在上帝个底背。

4基督係你等个真生命；佢顯現个時，你等也愛同佢共下顯現，分享佢个榮耀。

5所以，你等一定愛治死在你等身上作怪个該兜屬世个慾望，像淫亂、污穢、邪情、色慾，㧯貪心 (貪心係一種个拜偶像)。

6因為這兜事，上帝个發譴會臨到該兜悖逆佢个人。

7你等頭擺也識順這兜慾望去生活，被它兜牽等走。

8總係這下，你等愛棄絕這一切个事：毋好再有發閼、發譴，㧯怨恨；也做毋得講譭謗㧯垃圾个話。

9毋好講花撩騙來騙去，因為你等已經脫掉舊人㧯舊人个習慣，

10著上新人。這新人係被創造佢个上帝照自家个形像緊換新，來完全認識上帝。

11因為恁樣，希臘人㧯猶太人就無分別；也無分麼介有受割禮个、無受割禮个，野蠻个、吂開化个，做奴隸个、抑係自由人等等。總講，基督就係一切，基督住在大家个底背。

12上帝惜你等，揀選你等做佢聖潔个子民。所以，你等愛用憐憫、慈愛、謙卑、溫柔，㧯忍耐做衫來著。

13有紛爭个時，愛彼此包容，互相原諒。主樣般赦免你等，你等也愛樣般赦免別人。

14這一切德行以外，還愛著上愛心；因為使全部連結成做完全个就係愛心。

15基督所賜个和平愛在你等个心內做主；為到使你等有這個和平，上帝揀選你等，使你等合做一體。還有，你等愛心存感謝。

16你等愛俾基督个真道豐豐富富住在你等个心內。愛用各樣个智慧互相教導㧯勸話，用詩篇、聖詩、㧯屬靈个詩歌，對心底發出感謝个聲來頌讚上帝。

17無論做麼介，講麼介，你等攏總愛奉主耶穌个名，通過佢感謝阿爸上帝。

18做𡜵娘个，你等愛順服老公；因為這係基督徒个本份。

19做老公个，你等愛惜𡜵娘，毋好苦毒姖等。

20做子女个，你等愛凡事聽從爺𡟓；因為這係主所歡喜个。

21做阿爸个，毋好刺傷你等个子女，免得佢等灰心失志。

22做奴僕个，你等愛凡事聽從世間个主人。毋係愛做給主人看，來得到佢等个歡喜；愛因為你等係敬畏主个人，真心真意來做。

23無論做麼介，你等愛專心去做，像係為主做，毋係為人做。

24愛知，你等會得到主个獎賞，就係佢為佢个子民所保存个。你等服事个係主基督。

25做壞事个，無論佢係麼人，一定會受報應，因為上帝係用共樣个標準來對待每一個人。

← Chapter 2 Jump to: Chapter 4 →