Esther 3

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 2 Jump to: Chapter 4 →

1這兜事以後，亞哈隨魯王提升亞甲人哈米大他个孻仔哈曼做宰相。

2王命令所有王宮个守衛，喊佢等愛向哈曼跪拜，表示尊敬。佢等全部遵從王个命令，只有末底改毋肯跪拜。

3王宮中其他个官員問末底改，樣毋服從王个命令。

4佢等日日勸佢，總係佢還係毋聽。後來，佢私下向佢等講：「𠊎係猶太人，做毋得向哈曼跪拜。」所以佢等去㧯哈曼講，看佢忍得下末底改个行為麼。

5哈曼知末底改毋肯向佢跪拜，就大發脾氣。

6當佢又知末底改係猶太人，就決定毋單淨除掉末底改一儕；佢計劃好勢，愛滅掉亞哈隨魯王國內所有个猶太人，就係末底改个本族人。

7亞哈隨魯王統治个第十二年正月，就係尼散月，哈曼命令人在佢面前抽籤 (又喊做抽普珥)，抽出个籤指明十二月 (亞達月) 十三日，進行佢个計劃。

8哈曼㧯亞哈隨魯王講：「有一個民族分散住在王國逐省。佢等有自家个風俗習慣，㧯所有其他个民族無共樣；毋單淨恁樣，佢等也毋遵守王个法律。留恁樣个人對國王無好處。

9若係國王看做好，請下命令消滅佢等。𠊎保證有可能得到三十四萬公斤个銀仔，來增加國庫个收入。」

10所以，王剝下佢手指戴等个印仔交給猶太人个對敵 — 亞甲人哈米大他个孻仔哈曼。

11王對佢講：「這兜人㧯佢等个銀仔全部交給你；你愛樣般做就樣般做！」

12正月十三，哈曼就喊王个書記來，愛佢等發出通告，用該時王國內逐省逐族个文字寫下來，給所有个省長、總督，㧯各族个族長。這通告係奉亞哈隨魯王个名寫个，頓等王手指所戴个印仔。

13送信个人將通告送到王國个逐省去，限定大家愛在十二月 (亞達月) 十三這一日將所有个猶太人，無論男女老幼，全部㓾掉、滅淨淨，並愛沒收佢等个財物。

14通告送到逐省，愛俾民眾知，好在該日到來个時，逐個人全部準備好。

15照王个命令，送信个人趕緊出發，也將這通告在首都書珊公佈。書珊城个人全部著驚亂掉去，總係王㧯哈曼坐下來啉酒。

← Chapter 2 Jump to: Chapter 4 →