Esther 6

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 5 Jump to: Chapter 7 →

1該暗晡，王睡毋落覺，就命令人將官方个歷史拿來讀給佢聽。

2佢等讀个記錄有一段恁樣講：「兩個掌門个太監辟探㧯提列，計謀暗殺亞哈隨魯王，末底改將這事發覺報告。」

3王問：「𠊎等有為這事給末底改麼介尊榮抑係地位麼？」王个僕人應講：「麼介都無。」

4王問：「有麼人在宮廷肚？」這時，哈曼堵好入到宮廷外，愛求王將末底改吊在佢所預備个絞刑架頂。

5僕人就應講：「哈曼在這位，愛見王。」王講：「帶佢入來！」

6哈曼入來。王對佢講：「有一個人，𠊎當想愛賜佢尊榮；𠊎愛樣般做呢？」哈曼心肚想：「王想愛賜佢尊榮个人還有麼人呢？當然係𠊎啊！」

7所以，哈曼向王建議：「王愛恁樣獎賞佢想愛賜佢尊榮个人：

8喊人帶一身王著過个王袍來，還愛牽一隻王騎過个馬仔來、頭愛戴等王馬个冕旒，

9然後命令王最尊貴个大臣㧯這個人著王袍，扶佢上馬，並為佢牽馬在城肚个廣場遊行。佢等遊行个時，這大臣愛在佢頭前喊講：『看啊，王恁樣獎賞佢想愛賜佢尊榮个人！』」

10王對哈曼講：「趕緊將王袍㧯馬仔準備好勢，照你个建議，將尊榮賜給該坐在王宮門口个猶太人末底改，一樣也做毋得少！」

11所以，哈曼將王袍㧯馬仔準備好勢。佢㧯末底改著王袍，扶佢上馬，並為佢牽馬在城肚个廣場遊行，在頭前緊行緊向民眾喊：「看啊，王恁樣獎賞佢想愛賜佢尊榮个人！」

12遊行結束，末底改轉到王宮門口，總係哈曼心肝艱苦到擎頭毋起，遽遽轉屋下去。

13佢將所有个事講給𡜵娘細利斯㧯所有个朋友聽。厥𡜵娘㧯該兜聰明个朋友講：「你已經奈毋何末底改了。就算佢係猶太人，你也無辦法對付佢；在佢面前，你一定會橫到貼貼。」

14佢等講等話个時，王宮个太監來到，催哈曼趕緊去參加以斯帖个筵席。

← Chapter 5 Jump to: Chapter 7 →