Ezra 3

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 2 Jump to: Chapter 4 →

1到第七月，以色列人在自家个家鄉全部安頓下來；該時佢等同心一意聚集在耶路撒冷。

2約撒達个孻仔耶書亞㧯佢該兜祭司同事，並撒拉鐵个孻仔所羅巴伯㧯佢該兜親戚，重新起以色列上帝个祭壇，照神人摩西法律書个指示，在壇頂獻燒化祭。

3因為轉來个人驚該地方个人，佢等就在祭壇原來个地基頂重新起祭壇；然後，佢等開始在壇頂逐朝晨暗晡向上主獻燒化祭。

4佢等照規定守搭寮仔節，逐日照數額照規例奉獻應該獻个燒化祭；

5另外，佢等又照常例獻燒化祭，並在初一㧯所有敬拜上主个節期獻祭，還有向上主獻甘心祭。

6雖然人民還吂開始重起聖殿，總係對第七月初一，佢等已經開始向上主獻燒化祭了。

7民眾出工錢給打石師傅、木匠，又拿食物、飲料、橄欖油㧯泰爾城並西頓城个人換黎巴嫩个香柏樹。這兜樹料愛經過大海運到約帕。這事得到波斯皇帝塞魯士个許可。

8民眾轉來耶路撒冷以後，第二年个第二月，佢等在上帝聖殿个老地方開始動工。撒拉鐵个孻仔所羅巴伯、約撒達个孻仔耶書亞、㧯其他个同胞，就係祭司、利未人㧯所有對流亡轉來耶路撒冷个人，全部參加這工作。所有二十歲以上个利未人全部受派來監督重建上主聖殿个工程。

9利未人耶書亞㧯佢个子孫、親屬，並甲篾㧯佢个子孫 ( 何達威雅宗族)，全部聯合起來監督重建上帝聖殿个工程。利未人希拿達个子孫、親屬也來𢯭手監督。

10上主个聖殿開始打地基个時，祭司全部著禮服，企在逐儕个位所，手拿喇叭；利未人亞薩个子孫拿鑇仔企在該位。佢等照以色列王大衛傳下來个禮儀讚美上主。

11佢等彼此對唱，感謝讚美上主講：上主係至善；佢對以色列个慈愛永遠長存。逐個人全部大聲喊，讚美上主，因為聖殿打地基个工程已經開始了。

12當多年老个祭司、利未人㧯族長識看過以前个聖殿，這下親目看到這聖殿打地基，忍毋住開聲大噭；其他在場个人盡多歡喜到大聲嘶。

13無人分得出大聲嘶个聲抑係大噭个聲，因為聲音十分大，盡遠个所在也聽得到。

← Chapter 2 Jump to: Chapter 4 →