Lamentations 4

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 3 Jump to: Chapter 5 →

1慘了！𠊎等个純金變質、全無光彩！聖殿个石頭被人㧒在街路！

2錫安青年本來像純金恁高貴，總係這下被人看做粗缶一樣。

3野狗還知愛俾幼子食乳，總係𠊎个人民像曠野个鴕鳥恁無情。

4佢等由在孲𤘅仔嘴燥到會死；細人仔討食，也無人拿給佢等。

5一溜裡食山珍海味个人，這下在街頭巷尾無人插；一溜裡過奢華生活个人，這下橫在垃圾堆尋食物。

6𠊎个人民所承受个責罰，比所多瑪人民所受个還較重。所多瑪一𥍉目就消滅掉，毋使受到麼介攻擊。

7𠊎等个貴族一溜裡比雪比乳較白淨；佢等个面色紅潤，身強力壯。

8這下佢等在街項無人識；佢等个面比火炭還較烏，皮包骨，瘦到像燥柴一樣。

9被刀劍㓾死个，比餓死个人較幸福；餓死个愛忍受枵个痛苦，慢慢拖到死。

10𠊎个人民所受个災難非常得人驚，慈愛个阿姆親手煮自家个細人仔來食！

11上主將佢个大發譴盡拚出來；佢點𤏸烈火將錫安燒做平地。

12世間無人相信，連列國个君王也毋相信：侵略者能進入耶路撒冷个城門。

13總係恁樣个事正經發生；這係因為姖个先知㧯祭司犯罪，在城肚將無罪个人處死刑。

14姖該兜領袖像瞙目个在街項撞來撞去；佢等膏到滿身个血，無人敢去摸到佢等。

15人民大聲盡咄佢等講：「走開，你這兜屙糟東西！做毋得行兼𠊎這位來！」因為恁樣，佢等到處流浪，無一個國家肯收留佢等。

16上主無愛再關心佢等；佢自家將佢等逐出去。人民無看重祭司，也無好款待領袖。

17𠊎等盼望有人來幫助，總係盼望到目珠花掉。根本無國家有力幫助𠊎等！𠊎等還一直在守望台緊望。

18仇敵像打獵恁樣追𠊎等，致到𠊎等毋敢在街項行。𠊎等个日仔滿了！𠊎等个結局到了。

19追𠊎等个人比空中个鷹鳥還較遽；佢等在山頂追𠊎等，在曠野䀯等𠊎等。

20佢等捉到上主膏油所立个王，就像收走𠊎等透个氣。𠊎等原旦確信佢會保護𠊎等；佢會救𠊎等脫離強敵个君王。

21住在烏斯个以東人啊，做你等盡量歡喜快樂！苦難个酒杯也會傳給你等，你等會像人醉到赤身露體。

22錫安个罪惡已經受到責罰；上主毋會使𠊎等長久流亡。總係以東啊，上主愛責罰你；佢愛將你个罪惡顯明出來！

← Chapter 3 Jump to: Chapter 5 →