Matthew 19

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 18 Jump to: Chapter 20 →

1耶穌講了這兜話，就離開加利利，來到約旦河東片个猶太地區。

2一大群人跈等佢；在該位，佢醫好佢等當中个病人。

3有兜法利賽人來見耶穌，想愛害佢，問佢講：「請教你，無論理由係麼介，𠊎等个法律准老公離掉𡜵娘，係麼？」

4耶穌應講：「你等無讀過這站經文係麼？太初，創造主所造个人，『有男也有女』。

5上帝講：『因為恁樣，男人愛離開爺𡟓，㧯𡜵娘結合，兩儕成做一體。』

6既然係恁樣，夫妻就毋係兩個人，係一體。所以，上帝所配合个，人做毋得拆開。」

7法利賽人又問講：「恁樣，摩西做麼介給𠊎等一條誡命講，做老公个寫一張離婚書給𡜵娘就做得離掉姖呢？」

8耶穌應講：「摩西准你等離掉𡜵娘，係因為你等个心盡硬；總係在世界創造个起頭並毋係恁樣。

9𠊎㧯你等講，除了做𡜵娘个違犯貞節，無論麼人離掉𡜵娘，重新㧯別个婦人家結婚，就係犯姦淫。」

10學生對耶穌講：「老公㧯𡜵娘个關係若係恁樣，無結婚反轉較好。」

11耶穌講：「這種講法毋係逐個人會接受，只有得到上帝特別恩賜个人正會。

12因為人無結婚个理由盡多：有兜係出世就結婚毋得；有兜係人為个原因無結婚个；另外有兜係為到天國个緣故無愛結婚。有法度接受个人就接受。」

13有人帶細人仔來見耶穌，希望耶穌為佢等按手祈禱；總係學生責備該兜人。

14耶穌講：「俾細人仔來𠊎這位，毋好禁止佢等，因為天國个子民就像這種个人。」

15耶穌就為佢等按手祝福，然後離開該所在。

16有一擺，有人來見耶穌，講：「先生，𠊎愛做麼介善事正做得承受永遠个生命啊？」

17耶穌應講：「你樣般問𠊎關係『善』个事呢？只有一位係善个。你若係想愛承受永遠个生命，就愛遵守誡命。」

18佢就問講：「麼介誡命？」耶穌講：「做毋得㓾人；做毋得犯姦淫；做毋得偷拿；做毋得做假見證；

19愛孝敬爺𡟓；愛惜鄰舍，就像惜自家一樣。」

20該後生人應講：「這兜誡命，𠊎全部已經遵守了，還愛做麼介呢？」

21耶穌講：「你若係愛做完全个人，去賣你所有个產業，將錢送給窮苦人，你就會有財產積存在天頂；然後你來跈𠊎。」

22該後生人一聽到這個話，就心情沈重來離開，因為佢个產業盡多。

23耶穌就對學生講：「𠊎實在㧯你等講，有錢人愛做天國个子民，真難噢！

24𠊎再㧯你等講，有錢人愛做上帝國个子民，比駱駝穿過針鼻還較難！」

25學生聽到這個話，十分奇怪，就問：「恁樣，麼人有可能得救呢？」

26耶穌注目看佢等，講：「在人這係無可能，總係在上帝萬事都能。」

27該時，彼得對佢講：「你看，𠊎等已經放掉一切來跈你，𠊎等將來會得到麼介呢？」

28耶穌對佢等講：「𠊎實在㧯你等講，在將來个新時代，人子坐在佢榮耀个寶座上个時，你等跈𠊎个人會坐在十二隻寶座上，來審判以色列个十二支族。

29無論麼人，為到𠊎个緣故來放掉房屋、兄弟、姊妹、爺𡟓、子女、抑係田地，攏總會得到百倍个獎賞，又會得到永遠个生命。

30總係，盡多在最頭前个會做背尾；盡多在最背尾个會做頭前。」

← Chapter 18 Jump to: Chapter 20 →