Matthew 25

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 24 Jump to: Chapter 26 →

1「在該日，天國可比這個故事：有十個細阿妹仔擐等油燈，出去迎接新郎。

2其中五個係戇个，五個係聰明个。

3戇个擐等燈，總係無另外帶油；

4聰明个擐等燈，另外又帶幾罐油。

5新郎停跎个時，細阿妹仔全部啄目睡到睡掉去。

6「到半夜，有人喊講：『新郎來囉，你等出來迎接佢！』

7十個細阿妹仔攏總䟘起來，將油燈挑較光兜。

8該時，戇个對聰明个講：『拜託，分一些油給𠊎等，因為𠊎等个油燈會烏掉了！』

9該兜聰明个應講：『做毋得噢，𠊎等个油分給你等，驚怕大家會毋罅用；你等自家去店項買。』

10戇个細阿妹仔去買油个時節，新郎就到了。該五個有準備个細阿妹仔就跈等新郎入去，共下參加筵席；門就關起來。

11「其他个細阿妹仔無幾久也到；姖等喊講：『主啊，主啊！請㧯𠊎等開門！』

12新郎應講：『𠊎實在㧯你等講，𠊎根本毋識你等。』」

13耶穌講：「所以，你等愛警醒，因為你等毋知該日仔、該時間幾時會到。

14「天國又可比這個故事：有一個人愛出去旅行，佢喊僕人來，將產業交給佢等。

15佢照佢等逐儕个才調，一個給五千隻銀幣，一個給兩千，一個給一千，然後就出發。

16該領五千个，黏時去做生理，賺到五千隻銀幣。

17該領兩千个，也共樣恁樣賺到兩千隻銀幣。

18總係該領一千个出去，在地泥下挖一個孔仔，將主人个錢埋起來。

19「過盡久，該幾個僕人个主人轉來，同佢等算數。

20該領五千个，帶等另外个五千入來，講：『頭家，你給𠊎五千隻銀幣；你看，𠊎又賺到五千。』

21主人講：『盡好，你這好又忠心个僕人！你在細細个事頂高有忠心，𠊎愛委託你經營大事。入來同你个主人共下享受快樂噢！』

22「該領兩千个，也入來，講：『頭家，你給𠊎兩千隻銀幣；你看，𠊎又賺到兩千。』

23主人講：『盡好，你這好又忠心个僕人！你在細細个事頂高有忠心，𠊎愛委託你經營大事。入來同你个主人共下享受快樂噢！』

24「該時，該領一千个也入來，講：『頭家，𠊎知你係厲害个人；你無種个地方也愛收割，無委種个所在也愛收成。

25𠊎盡驚，就將你个錢埋在地泥下。請看，你个錢在這位。』

26「佢个主人講：『你這壞又懶尸个僕人！既然你知𠊎無種个地方也愛收割，無委種个所在也愛收成，

27你就應該將𠊎个錢存入銀行，等𠊎轉來个時，好連本帶利共下領轉來。

28你等將佢个錢拿給該有一萬隻銀幣个。

29因為已經有个，愛給佢還較多，俾佢有好賸；無个，連佢所有个一些些仔也愛搶走。

30這個無用个僕人，你等將佢逐到外背个烏暗肚去；俾佢在該位大噭，咬牙切齒。』

31「當人子在佢个榮光中降臨个時，眾天使同佢共下，佢愛坐在榮耀个寶座頂；

32萬民全部愛聚集在佢个面前。佢愛將佢等分做兩群，像掌羊个人將綿羊對山羊中分開來一樣。

33佢愛將綿羊放在右片，山羊放在左片。

34然後，王會對在佢右片个人講：『得到吾爸賜福个人啊，你等來！來承受對創造世界以來就為你等準備个國。

35因為𠊎肚飢，你等給𠊎食；𠊎嘴燥，你等給𠊎啉；𠊎出外流浪，你等接待𠊎去你等屋下；

36𠊎打赤膊，你等給𠊎著；𠊎發病，你等照顧𠊎；𠊎坐監，你等來看𠊎。』

37「該時，該兜義人會應講：『主啊，𠊎等幾時看到你肚飢，給你食；抑係嘴燥，給你啉？

38幾時看到你出外流浪，接待你去𠊎等屋下；抑係看到你打赤膊，給你著？

39幾時看到你發病抑係坐監，𠊎等去看顧你啊？』

40王會應講：『𠊎實在㧯你等講，你等樣般對待𠊎這兄弟姊妹中最微細个一儕，就係對待𠊎一樣！』

41「然後，王會對在佢左片个人講：『受到上帝咒詛个人啊，你等離開𠊎！入去為魔鬼㧯佢个爪牙所準備永遠不滅个火底背！

42因為𠊎肚飢，你等無給𠊎食；嘴燥，你等無給𠊎啉；

43𠊎出外流浪，你等無接待𠊎去你等屋下；𠊎打赤膊，你等無給𠊎著；𠊎發病抑係坐監，你等無看顧𠊎。』

44「這時，佢等會講：『主啊，𠊎等幾時看到你肚飢抑係嘴燥，抑係出外流浪，抑係打赤膊，抑係發病抑係坐監，無服事你啊？』

45王會應佢等講：『𠊎實在㧯你等講，你等毋幫助這兜人中間最微細个一儕，就係毋幫助𠊎。』

46這種个人愛受永遠个刑罰；總係該兜義人，佢等一定會得到永遠个生命。」

← Chapter 24 Jump to: Chapter 26 →