Nahum 1

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

Jump to: Chapter 2 →

1下背係有關尼尼微个信息，係記錄伊勒歌斯人那鴻所看到个異象。

2上主係當惱邪惡个上帝，毋准人㧯佢對立；上主實行報復，譴起來非常厲害。佢責罰㧯佢作對个人；佢向佢个仇敵大發譴。

3上主無隨便發譴，總係大有能力；佢絕對毋會將有罪个準做無罪。上主行過个所在，就捲起暴風㧯龍捲風；雲係佢經過个時腳下个灰塵。

4佢責備海，海就燥掉；佢使江河變到燥燥。佢使巴珊个草場枯乾，迦密山變黃，黎巴嫩个花謝掉。

5群山在上主面前緊顫；山岡也在佢个面前鎔掉。上主出現，地就震動；全世界攏總愊愊掣。

6佢一發譴，麼人企得住呢？佢个怒氣，麼人奈得何呢？佢个發譴像火燒到當猛；巖石在佢面前裂到碎碎。

7上主係至善个，佢保護在患難中个子民；佢照顧該兜信靠佢个人。

8佢像發大水，徹底消滅佢个敵人；佢將㧯佢作對个人逐入去陰間。

9你等設麼介陰謀來反對上主呢？佢定著會將你等毀滅到淨淨；無人有可能再反抗佢一擺。

10像繷絞絞个竻仔㧯燥燥个麥稈，你等酒醉个人會被火燒淨淨！

11尼尼微啊，對你該位有一個詭計多端个人出來，陰謀攻擊上主。

12上主對佢个子民猶大恁樣講：「亞述人雖然又強又多，佢等會受毀滅，被人除掉。𠊎个子民啊，𠊎識使你等受苦，總係𠊎毋會再喊你等受苦了。

13𠊎這下愛結束亞述對你等个管轄，打斷捆你等个鎖鍊。」

14下背係上主關係亞述人个宣告：「屬你等名下个人無好傳種。𠊎愛除掉你等神廟中个偶像。𠊎愛為你等預備塚埔，因為你等壞到無資格生存！」

15看啊，有報好消息个人攀山過嶺來！佢來報和平个好消息！猶大人啊，愛慶祝你等个節期，向上帝還你等所起个願！壞人毋會再來侵犯你等个土地。佢等已經全部消滅了。

Jump to: Chapter 2 →