Nahum 2

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 1 Jump to: Chapter 3 →

1尼尼微啊，該愛毀滅你个來攻擊你了！愛集中全力，顧好城堡！愛嚴防通路，準備相㓾！

2(上主愛恢復雅各个光榮，像以色列个光榮共樣，雖然打劫个將佢等打劫到淨淨，將佢等个葡萄園毀壞了。)

3敵人个軍隊拿等紅盾牌，著紅制服；佢等當準備愛進攻。佢等个戰車金到皓光！佢等个戰馬雄壯緊猋！

4戰車在街項猋到像飛，在廣場頂高撞來撞去。它兜个形狀像火把，又像𥍉爧恁樣飛射。

5官長被王喊去；佢等搖搖擺擺走等來。侵入者盡撞城牆，佢等就架起保護个大盾牌。

6水庫崩裂；王宮橫掉。

7王后被人侮辱、捉走；宮女捶心肝悲傷緊噭，噭聲像月鴿仔。

8尼尼微城像水庫崩掉共樣，人民逃難像水庫水大瀉。有人緊喊：毋好走！毋好走！總係無人回頭。

9搶銀仔！搶金仔！城肚有堆山个財寶！到處有逐樣个寶物！

10尼尼微毀滅了，滿片空空荒涼！人心嚇到跔掉，膝頭緊顫，氣力消失，面色癧青。

11該隻大城這下在㖠位？該隻像獅仔个窿、餵細獅仔个地方在㖠位？公獅母獅出入、細獅仔自由自在个地方在㖠位？

12公獅打來个獵物，擘給母獅㧯細獅仔；窿肚堆滿正擘碎个肉。

13上主 — 萬軍个元帥講：「尼尼微啊，𠊎係你个敵人；𠊎愛燒掉你个戰車。你該兜少壯獅仔愛被刀劍吞滅；𠊎愛將你對別人該位搶來个東西搶走。無人再聽到你該兜使者个聲了。」

← Chapter 1 Jump to: Chapter 3 →