1 Timothy 4

Chinese TTVH 2021 (現代台語譯本漢字版)

← Chapter 3 Jump to: Chapter 5 →

1聖神明明講，佇後來的時期有一寡人會背信，去趁迷惑人的邪靈及鬼神的教示。

2此款的教示是對欺騙者的白賊來的；𪜶的良心已經互魔鬼用炰紅紅的鐵印焐記號。

3𪜶禁止嫁娶，禁戒一寡食物，就是上帝創造欲互信閣明白真理的人用感謝來領受的。

4因為上帝一切的創造攏是好，若用感謝來領受，就無半項通拒絕；

5通過上帝的話及人的祈禱就成做聖。

6你若將下面的事教示兄弟姊妹，就會對所信的信息及所順趁健全的教示得著培養，成做基督耶穌的好差用。

7著拒絕粗俗及空洞無影跡的傳說。為著敬虔的生活，著繼續操練家己。

8操練身軀有淡薄利益，毋拘敬虔對逐項攏有利益，因為有現今及將來活命的應允。

9此句話通相信，值得完全接受。

10為著此個，咱出力著磨，因為咱的向望在佇真活的上帝；伊是眾人，特別是信的人的救主。

11你著將諸個代誌給𪜶勸勉及教示。

12毋通因為你的少年互人看輕；著佇講話、行做、疼心、信心、純潔，做信徒的模範。

13著致意宣讀聖經，勸勉，及教示，直到我來。

14毋通忽略你所領受屬靈的恩賜，就是通過先知的信息及長老團的按手賜互你的。

15諸個代誌，你著專心致意去做，互眾人通看著你的進步。

16你家己著謹慎，你的教示嘛著謹慎；諸個代誌著堅持去做，按呢做會救你本身及聽趁你的人。

← Chapter 3 Jump to: Chapter 5 →