Amos 2

Chinese TTVH 2021 (現代台語譯本漢字版)

← Chapter 1 Jump to: Chapter 3 →

1上主按呢講：「摩押人一遍閣一遍犯罪，我一定欲刑罰𪜶；因為𪜶將以東王的骨頭燒甲變火灰。

2我欲放火燒摩押，燒毀加略的宮殿；摩押會佇嘩嘩哮喝喊歕哨角的中間死亡。

3我會將摩押的統治者處死，刣死王及伊所有的官員。」上主按呢宣告。

4上主按呢講：「猶大人一遍閣一遍犯罪，我一定欲刑罰𪜶；因為𪜶拒絕上主的律法，無守伊的規例；𪜶隨𪜶的祖先拜假神，受引誘行迷路。

5所以我欲放火燒猶大，燒毀耶路撒冷的宮殿。」

6上主按呢講：「以色列人一遍閣一遍犯罪，我一定欲刑罰𪜶；因為𪜶為著銀出賣義人，為著一雙鞋賣散赤人。

7𪜶踐踏散赤人的頭殼，親像啲踏土粉；𪜶剝奪困苦人的權利；老父及子公家一個少女，致到褻瀆我的聖名。

8𪜶佇逐個祭壇邊，用散赤人提來抵押的外衫做床巾；佇𪜶的上帝的殿，飲剝削得著的錢買的酒。

9我曾佇𪜶面前除滅亞摩利人；許個人高大親像柏香樹，勇壯親像橡樹；總是我毀掉𪜶頂面的果子，斬斷𪜶下面的根。

10我嘛有帶恁對埃及地出來，四十年久導恁經過曠野，互恁得著亞摩利人的地做產業。

11我對恁的子孫中間揀選先知，閣對恁的少年人中間選立拿細耳人。以色列人啊，豈毋是按呢？」上主按呢宣告。

12「毋拘恁互拿細耳人飲酒，禁止先知傳達上帝的話。

13所以，我欲給恁扼佇土腳，親像載滿麥捆的車給恁硩甲𣍐振動。

14逃命的走𣍐離，勇壯的失去氣力，勇士嘛𣍐當救家己；

15射箭的徛𣍐在，腳緊的走𣍐赴，騎馬的嘛𣍐當救家己的性命。

16佇彼日，連上勇敢的戰士嘛會放拺武器逃走。」上主按呢宣告。

← Chapter 1 Jump to: Chapter 3 →