Amos 6

Chinese TTVH 2021 (現代台語譯本漢字版)

← Chapter 5 Jump to: Chapter 7 →

1恁住佇錫安無掛無慮，住佇撒馬利亞山無煩無惱的人，恁慘啊！恁想講家己是以色列人民所倚靠，是萬國有名望的領導者。

2恁著過去甲尼看，閣去大城哈馬，然後落去非利士的迦特，看恁兩國豈有比𪜶較強？恁的領土豈有比𪜶的較闊？

3恁想講有給災禍的日拺遠遠，顛倒互強暴的統治倚來。

4恁倒佇象牙的眠床，凭佇撐椅，食羊群中上好的羊仔，牛椆內肥閣軟的牛仔，

5逍遙唱歌，親像大闢彈琴作詩。

6恁飲酒一碗續一碗，抹上好的芳油；毋拘無為著以色列啲欲毀滅悲傷。

7所以恁會代先受掠，逍遙宴樂會結束。

8至高上主 — 萬軍的統帥上帝指家己立誓講：我厭惡以色列的驕傲，討厭𪜶的宮殿；我欲將𪜶的城及城內的一切交互對敵。

9一間厝若猶賰十個查甫人，𪜶嘛攏會死。

10死人的親成來拖身屍去燒的時，會對厝內的人講：「猶有人及你做夥無？」伊會應講：「無！」閣講：「毋通出聲！毋通提起上主的名。」

11因為上主發出命令，伊會給大間厝摃碎，給細間厝摃甲碎糊糊。

12馬豈會當佇巖石頂奔跑？人豈會互牛佇海裡耕作？恁竟然互公平成做毒菜，互公義的果子成做苦草。

13恁諸個征服羅‧底巴的人誇耀講：「阮豈毋是靠家己的氣力攻佔加寧？」

14上主 — 萬軍的統帥上帝按呢講：「以色列啊，我欲興起一國攻擊恁；𪜶會壓制恁，對哈馬隘口到亞拉巴的山谷。」

← Chapter 5 Jump to: Chapter 7 →