Ephesians 1

Chinese TTVH 2021 (現代台語譯本漢字版)

Jump to: Chapter 2 →

1我是保羅，奉上帝的旨意作基督耶穌的使徒；我寫批互住佇以弗所，屬基督耶穌忠信的信徒。

2願咱的父上帝及主耶穌基督賜恁恩典及平安！

3著稱讚咱的主耶穌基督的父上帝！因為伊有將天頂逐款屬靈的福氣，通過咱及基督結連，賜互咱。

4創世以前，上帝已經通過基督揀選咱，互咱佇伊面前成做聖潔無缺點的人。因為上帝疼咱，

5早就決定欲通過耶穌基督互咱作伊的子兒歸伊；這是伊所歡喜的，是伊的旨意。

6咱著頌讚上帝榮耀的恩典，因為伊有將伊所疼的子無條件賜互咱！

7對基督，通過伊的死，咱得著自由，罪過得著赦免。上帝的恩典實在真豐富；

8伊有將此個恩典充充足足賜互咱。伊用逐款的智慧及理解，

9照伊所歡喜的旨意，互咱知伊早就決定通過基督來完成奧妙的計劃。

10此個計劃，上帝欲佇時機成熟的時完成，通互天頂及地上一切的被造物攏尊基督作頭，聯合做一個。

11萬有攏照上帝的計劃及決定來完成。上帝照伊代先決定的旨意，通過基督揀選阮來承接伊的家業。

12按呢是欲互阮諸個代先將向望囥佇基督的人通頌讚上帝的榮耀。

13通過基督，恁嘛有聽著真理的信息，就是彼個互恁得救的福音，彼時恁有信，上帝就賜恁所應允的聖神，給恁蓋印證明恁屬伊。

14聖神保證咱通承接上帝所應允的家業，直到互屬伊的人得著完全的自由，通頌讚伊的榮耀。

15因為按呢，我一下聽著恁對主耶穌有信心，對所有的信徒有疼心，

16就為著恁不時啲感謝上帝。我佇祈禱中數念恁，

17祈求咱的主耶穌基督的上帝，榮耀的天父，賜聖神互恁有智慧及啟示通認識伊。

18我懇求上帝開恁的心眼，互恁通知伊選召恁來得著的向望是什麼。伊對伊的信徒所應允的祝福偌仔呢豐富，

19佇咱信伊的人中間啲運行的權能偌仔呢大。伊有運用此個氣力互基督對死人中閣活，閣互基督佇天頂坐佇伊家己的正旁，

21佇遐超越所有的統領者、掌權者、權力者、主政者，以及一切現在及將來會當稱呼的銜頭。

22上帝互萬有攏屈服佇基督的腳下，互伊作教會的元首，統治萬有。

23教會是基督的身體，是充滿萬有的基督所完全充滿的。

Jump to: Chapter 2 →