Ephesians 6

Chinese TTVH 2021 (現代台語譯本漢字版)

← Chapter 5 Jump to:

1作兒女的，著順服父母，這是信主的人應該有的本分。

2「著孝敬父母」，這是頭一條附帶應允的誡命，「按呢做恁就會逐項好勢，佇此個地久長徛起。」

4作父母的，毋通激恁的兒女受氣，著照主的管教及教示給𪜶培養。

5作奴隸的，及順服基督仝款，著用敬畏及驚惶專心順服恁佇世上的主人。

6毋通佇人的面前故意做互人看，互人歡喜；著作基督的奴隸，對心內遵趁上帝的旨意，

7甘心樂意盡奴隸的本分，親像啲服事主，毋是啲服事人。

8著知，無論是奴隸抑是自由的，主攏會照逐個人的好行為給𪜶報答。

9作主人的，嘛著用仝款的態度對待恁的奴隸；毋通給𪜶威脅。著知，恁及恁的奴隸攏屬仝一位天頂的主人；伊用仝款的標準對待逐個人。

10最後，我勸恁著及主結連，靠伊的大能力做堅強的人。

11著穿上帝所賜全套的武裝，互恁徛在，通抵抗魔鬼的詭計。

12因為咱毋是及有血有肉的人啲交戰，是及天界的邪靈，就是此個烏暗世代的宇宙統領者、權力者、掌權者啲交戰。

13所以，著用上帝所賜全套的武裝裝備家己，通佇邪惡的日子會當抵抗對敵的攻擊，堅持到底持守陣地。

14所以，著徛在，用真理做帶縖，用正義做護胸甲穿，

15用準備好勢的和平的福音做鞋穿。

16著不時用信心做盾牌，通拍化邪惡者射來火的箭。

17著用拯救做頭盔，用聖神做劍，就是上帝的話。

18著靠聖神全心祈禱，常常祈求。著不時警醒，時常為著所有的信徒祈禱；

19嘛為著我祈禱，求上帝賜我信息，通好膽開嘴宣揚福音的奧祕。

20為著此個福音，我現在做一個掛鐵鍊的大使。著為著我祈禱，互我通好膽宣揚應該講的。

21咱親愛的兄弟，嘛是主忠實的差用推基古，會報恁知我的代誌及近況。

22我差伊去恁遐，目的是欲報恁知阮遮的情形，互恁的心得著鼓勵。

23願父上帝及主耶穌基督賜平安、仁愛，及信心互眾兄弟姊妹！

24願上帝的恩典及所有用不變的疼來疼咱的主耶穌基督的人同在！

← Chapter 5 Jump to: