Joel 1

Chinese TTVH 2021 (現代台語譯本漢字版)

Jump to: Chapter 2 →

1下面是上主對比土珥的子約珥講的話：

2老人啊，著聽！此所在的住民啊，攏著注意聽！佇恁的日，抑是恁列祖的日，豈曾發生此款代誌？

3著將此個代誌傳互恁的子兒，子兒傳互孫，孫傳互後代。

4大隻草蜢食賰的，草蜢來食；草蜢食賰的，草蜢仔子來食；草蜢仔子食賰的，草蜢公來食。

5酒醉的人啊，著醒，著哭；好酒的人啊，著為著新酒哀哭；因為恁無閣有酒通飲啦。

6有一群草蜢來侵犯我的地，強猛，數目算𣍐了；𪜶的齒親像獅公的齒，𪜶的牙親像獅母的牙；

7𪜶毀壞我的葡萄樹，給我的無花果樹的樹皮剝甲光溜溜，放啲互死。

8你著哀哭，親像少女腰縖麻布，為著伊佇少年的時失去未婚夫哀哭。

9上主的殿無素祭及奠酒祭通獻；服事上主的祭司嘛哀哭。

10田園荒廢，地悲哀；因為五穀毀壞，新酒焦去，油欠缺。

11作穡人啊，著見笑；栽種葡萄的人啊，著哀哭，因為大麥小麥及田園的收成攏無去。

12葡萄樹焦去，無花果樹枯焦，石榴樹、椰棗樹、蘋果樹，連田野一切的樹木攏枯焦；人間的快樂嘛攏消失。

13祭司啊，著縖麻布啼哭；佇祭壇服事的人啊，著哀哭；做我的上帝差用的人啊，著來，穿麻衫過暝；因為無人提素祭及奠酒祭來恁的上帝的殿奉獻。

14恁著設一個聖日來禁食，召集嚴肅會，招集序大，及國內所有的住民來上主 — 恁的上帝的殿，對上主哀求。

15彼日恁慘啊！因為上主的日近啦，全能者欲來毀滅啦。

16糧食佇咱的目睭前斷絕啦！歡喜快樂佇咱上帝的殿消失啦！

17種籽佇土裡爛去；倉庫荒廢，粟倉倒壞，因為無五穀通收成。

18牲生哮甲真悽慘，牛群亂亂闖，因為無草；羊群嘛受苦。

19上主啊，我求叫你，因為火燒滅曠野的草埔，火焰燒盡田野的樹木。

20田野的走獸嘛對你哀叫，因為溪水焦去，火燒滅曠野的草埔。

Jump to: Chapter 2 →