Joel 3

Chinese TTVH 2021 (現代台語譯本漢字版)

← Chapter 2 Jump to:

1恁看，佇許個日，時一下到，我欲回復猶大及耶路撒冷的繁榮，

2我欲聚集萬國，導𪜶落去約沙法山谷，佇遐給𪜶審判，因為𪜶將我的子民，就是我的產業以色列，分散去列國，閣分我的土地。

3𪜶抽籤分我的子民，用查甫囝仔換妓女，賣查某囝仔買酒飲。

4泰爾、西頓、非利士所有地區的人啊，恁欲給我按怎？欲給我報復是無？恁若給我報復，我就欲隨時給恁報應。

5恁搶我的金銀，奪我貴重的財寶，扛入去恁的神廟，

6閣給猶大及耶路撒冷的人賣互希臘人，互𪜶遠離鄉土。

7我欲催迫𪜶對恁給𪜶賣去的所在倒轉來。我欲照恁的所做給恁報應。

8我欲將恁的子查某子賣互猶大人；猶大人會給𪜶轉賣互遠遠的示巴人。上主按呢宣布。

9著對萬國宣布：準備開戰！喚起勇士的鬥志，召集全體戰士參戰。

10著將恁的犁頭拍做刀劍，將恁的鐮刀拍做槍。軟弱的著講：「我真勇！」

11四圍的列國啊，趕緊集合。上主啊，派你的勇士落來。

12著喚起萬國的人攏上來約沙法山谷；佇遐我欲坐啲審判四圍的列國。

13著攑鐮𠠝仔割，收割的時到啦。來，踏落去，因為酒窟滿啦，酒池溢出來啦，𪜶的罪惡貫滿。

14有千千萬萬的人佇宣判的山谷，因為上主的日欲臨到審判谷。

15日月無光，星辰暗淡。

16上主佇錫安發出親像獅啲哮的聲，佇耶路撒冷發出親像雷啲彈的聲，天地就大振動；毋拘上主欲做伊子民的避難所，做以色列人的堡壘。

17彼時，恁就會知我是上主 — 恁的上帝，徛起佇錫安我的聖山。耶路撒冷會成做聖城，𣍐閣互外族人侵犯。

18佇彼日，大山會滴新酒，小山會流奶，猶大的溪攏有水啲流；有水泉會對上主的殿流出來，潤澤什亭谷。

19埃及會拋荒，以東會變做荒廢的曠野，因為𪜶虐待猶大人，佇𪜶的地流無辜的人的血。

20總是猶大會永遠有人徛起，耶路撒冷會存續到萬代。

21早前我毋曾洗清𪜶刣人流血的罪，現在欲給𪜶洗清。上主永遠佇錫安徛起！

← Chapter 2 Jump to: