Nahum 2

Chinese TTVH 2021 (現代台語譯本漢字版)

← Chapter 1 Jump to: Chapter 3 →

1尼尼微，彼個欲拍碎列國的已經出兵攻擊恁；著顧守堡壘，防備要道，集中力量，準備應戰。

2雖然敵人有給雅各搶劫，毀壞以色列的葡萄園，上主欲回復𪜶的榮光，回復𪜶的繁榮。

3伊的勇士攑紅的盾牌，戰士攏穿朱紅色的制服；佇交戰的日，戰車的鋼鐵親像火焰焰熠，𪜶攑槍舞來舞去。

4戰車佇街路快速直衝，佇開闊的所在闖前闖後；𪜶看起來親像火把，衝來衝去親像熠爁。

5軍官受召集，青青碰碰趕倚來，拼到城牆頂，將防衛的擋牌𫞼起來。

6水門攏拍開，宮殿沖無去。

7王后受凌辱互人掠去；宮女搥胸，哀哭親像粉鳥的聲。

8尼尼微早前親像貯水的水池，今人一直逃走出去；有人喝「停咧，停咧」，毋拘無人越倒轉來。

9搶噢，搶伊的銀！劫伊的金！城內有算𣍐了的財寶，有逐款的寶貝。

10尼尼微攏空空啦，滅亡啦，荒廢啦！人的心失膽，腳頭窩皮皮惙，腰無力，面青筍筍。

11獅的洞穴，獅仔子食物的所在佇叨位？連獅公、獅母、獅仔子四界行，無受嚇驚的所在嘛攏無去啦。

12獅公為著獅仔子拆裂夠額的食物，為著獅母咬死獵物；伊將拆裂的囤滿伊的洞，將咬著的，積滿伊的穴。

13上主 — 萬軍的統帥講：「你看，我欲攻擊你，放火燒毀你的戰車，用刀劍刣死你的戰士。我欲對地上毀掉你的戰利品；人𣍐閣聽著你的使者的聲。」

← Chapter 1 Jump to: Chapter 3 →