Nahum 3

Chinese TTVH 2021 (現代台語譯本漢字版)

← Chapter 2 Jump to:

1慘啊，刣人流血的城，詭詐強暴滿滿，不時有搶劫。

2馬鞭嗶爆叫，車輪浪浪哮，戰馬奔跑，戰車砊砊叫；

3馬兵衝進前，刀劍光爁爁，槍焰焰熠；受刣的真多，身屍疊歸堆，屍體算𣍐了，人互屍體㧎倒，

4因為此個城是妖嬌的娼妓，迷惑人的尪姨；伊用淫行引誘列國，用邪術迷惑萬族。

5上主 — 萬軍的統帥講：「你看，我欲攻擊你；我欲掀你的裙，掀到蓋著你的面，互列國看著你的下體，互列邦看見你的見笑。

6我欲將可惡污穢的物㧒佇你的身上，給你侮辱，公開示眾。

7看見你的，攏會走閃，講：『尼尼微荒廢啦！啥人會為伊哀傷？』我欲去叨位尋著安慰你的人？」

8你豈有比底比斯較堅固？伊佇尼羅河的河邊，有河做伊的堡壘，水做伊的城牆。

9古實及埃及做伊無限量的氣力；弗及利比亞及伊聯盟。

10猶久伊互人掠去，流放去外國；伊的嬰仔互人摔死佇逐個街路頭。伊的貴族互人抽籤，分去；官員互人用鐵鍊縛啲，掠去。

11尼尼微啊，你嘛會酒醉，顛來顛去，欲尋所在避難，閃避對敵。

12你的要塞攏親像無花果樹，樹頂結滿初熟的果子；一下搖，果子就落落去欲食的人的嘴內。

13你看，恁的戰士攏親像軟汫的查某人；門閂互火燒去；城門開開，出在對敵攻擊。

14你著汲水，準備受圍困；著加強防衛；著去土窟踏黏土，修理磚仔窯。

15毋拘，佇遐你會互火燒滅，互刀刣死；你會受毀滅，親像農作物互草蜢仔子食了了。出在你加添人數親像草蜢仔子，出在你加添人數親像草蜢赫多。

16你加添你的生理人，多甲親像天頂的星；毋拘𪜶親像草蜢仔子搋翼飛走。

17你的貴族親像草蜢，你的官員親像歸陣的草蜢公，天氣冷，歇佇籬笆，日出就飛去，人毋知𪜶去叨位。

18亞述王啊，你的官員啲盹佝，你的貴族啲睏；你的人民四散佇山頂，無人給𪜶招集。

19你的傷𣍐醫得；你受拍真傷重；聽著你的消息的，攏會拍噗仔。啥人毋曾因為你的殘忍受害？

← Chapter 2 Jump to: