Song of Solomon 1

Chinese TTVH 2021 (現代台語譯本漢字版)

Jump to: Chapter 2 →

1所羅門詩歌中的詩歌。

2來，用你的嘴給我唚；你的愛情比酒較好。

3你的芳油實在真芳；你的名親像倒出來的芳油；所以，無一個查某囝仔無愛你。

4請牽我，咱緊來走！王啊，導我入去你的房間，咱來歡喜快樂；你的愛情比酒較好，莫怪所有的查某囝仔攏愛你。

5耶路撒冷的查某囝仔啊，我烏，毋拘生做媠，親像基達的布棚，親像所羅門的帳簾。

6毋通因為我皮膚烏烏直直給我看，彼是日頭曝的。我的兄弟對我受氣，叫我去顧葡萄園；我煞𣍐當照顧家己的園。

7我心愛的啊，給我講，你佇什麼所在啲飼羊，中晝佇叨位互羊歇睏，我才免佇你同伴的羊群中四界尋你。

8查某囝仔中上媠的啊，你若毋知我佇叨位，隨羊群的腳跡去，佇牧者的布棚邊飼你的山羊仔。

9我的愛人，我看你親像法老戰車的馬。

10你鬢邊的妝飾互你的面真媠；你的頷頸掛真珠鍊真好看。

11阮欲給你做金的鍊仔，鑲銀的鈕仔。

12王坐桌的時，我的哪噠芳油淐出芳味。

13我親愛的，你是一包沒藥，掛佇我的胸前。

14我親愛的，你是一葩指甲花，佇隱‧基底的葡萄園內啲開。

15我的愛人，你真媠，實在真媠！你的目睭親像粉鳥。

16我親愛的，你真英俊，我真合意！咱用青翠的草埔做床舖，

17用柏香柴做厝的樑，松柏柴做桷仔。

Jump to: Chapter 2 →