Song of Solomon 8

Chinese TTVH 2021 (現代台語譯本漢字版)

← Chapter 7 Jump to:

1你若是我的兄弟，𠲿過阮老母的奶，毋知偌好！按呢，我佇外面抵著你，及你唚嘴，就無人會看輕我。

2我會導你入去阮老母的厝，伊會教示我；我會互你飲調和的酒及石榴的汁。

3你用倒手扶我的頭殼，用正手攬我。

4耶路撒冷的查某囝仔啊，我懇切給恁吩咐，毋通拍醒，毋通攪擾阮的愛情，到阮歡喜滿足。

5對曠野上來，撐佇伊親愛的的身軀彼個是啥人？我佇蘋果樹腳給你叫醒；你的老母佇遐懷孕，佇遐經過催陣的痛苦生你。

6互我親像印，蓋佇你的心內；親像印，頓佇你的手骨。因為愛情親像死赫呢有力，情熱親像陰府赫呢強烈，所發出的炎熱親像火焰，親像極猛烈的火焰。

7大水𣍐當拍化愛情；溪水𣍐當給伊消滅。人若用伊所有的財產來買愛情，一定互人藐視。

8阮有一個細漢小妹，伊的奶猶未發育成熟；人來提親，阮著按怎給伊設法？

9伊若是牆，阮欲佇伊的頂面起銀塔；伊若是門，阮欲用柏香柴板給伊圍起來。

10我是牆，我的奶親像兩個塔；我親愛的一下看著我，就心滿意足。

11所羅門佇巴力‧哈們有一坵葡萄園；伊將此坵葡萄園租互顧守的人；𪜶逐個人為著𪜶的果子著納一千個銀。

12我有葡萄園，是我家己的；所羅門啊，彼一千你提去，兩百互顧守果子的人。

13𫢶佇園內的查某囝仔啊，同伴攏啲聽你的聲，你嘛互我聽一下。

14我親愛的啊，趕緊來，親像羚羊，親像鹿仔，來到淐出芳味的山！

← Chapter 7 Jump to: